3 Veivuke Mo Vosota na iTuvaki Dredre

Eso na leqa ena gauna qo ena sega ni drovaki se wali rawa. Kena ivakaraitaki, de dua o na sega ni cakava rawa e dua na ka ni takali e dua drau veivolekati se ni o tauvimate bibi. O sa na rairai vaqara ga na sala mo vosota kina na mosi. Vakacava e rawa ni veivuke ena ituvaki va qori na iVolatabu?

TAUVIMATE BIBI

E kaya e dua na goneyalewa o Rose: “E tauvi au tiko e dua na mate ni kawa, qai sega ni cegu na mosi e dau tarai au. E vakamalumalumutaki au tale ga.” E kauaitaka vakalevu o Rose na kena ituvaki, ni so na gauna sa vakalatilati na kena mate ena nona vuli iVolatabu kei na so tale na ka e vauca nona sokalou. Ia e vukei koya vakalevu na vosa i Jisu ena Maciu 19:26: “E rawarawa vua na Kalou na ka kece.” E raica o Rose ni levu tu na sala e rawa ni vulica kina na iVolatabu. Ni dredre nona wiliwili ena levu ni mosi, e dau vakarorogo ina katokatoni ni iVolatabu kei na ivola vakaivolatabu.a E kaya o Rose: “Qori sara ga na sala e dei tiko ga kina noqu veiwekani kei na Kalou.”

E dau rarawataka o Rose ni vakaiyalayala na ka e rawa ni cakava. Ia e vakacegui koya na ka e volai ena 2 Korinica 8:12: “E ciqomi vakalevu ga na ka e soli ena yalo e vinakata. E namaki vua e dua me solia ga na ka e tu vua, e sega ni namaki me solia na ka e sega vua.” Qori e vakadeitaka vei Rose ni marautaka na Kalou na veika e cakava, baleta ni cakava na ka kece e rawata me lakovata kei na kena ituvaki.

LOLOSI

E nanuma lesu o Delphine, a cavuti ena rua na ulutaga e liu: “A mate na luvequ goneyalewa ni yabaki 18. Au nanuma ga niu sa na mate tale ga ena levu ni noqu rarawa. E veisautaka sara ga noqu bula na ka e yaco ya.” Ia e vakacegui koya na ka e kaya na daunisame vua na Kalou ena Same 94:19: “Ni bikai au na nuiqawaqawa, oni vakacegui au qai vakayaloqaqataki au.” E kaya o Delphine: “Au kerei Jiova me vukei au me bau malumu kina na mosi au vakila voli.”

E vakaogai koya o Delphine ena nona vukei ira eso tale. Me vaka ga na joke ramusu e se rawa tiko ga ni vakayagataki ena volavola, e kaya o Delphine ni se rawa tiko ga ni vukei ira eso tale ena ituvaki rarawataki e tu kina. E nanuma lesu: “Niu vakacegui ira noqu vuli iVolatabu au qai vukei ira mera muria na ivakavuvuli vakaivolatabu, au vakila ni dua na sala ya e vukei au kina o Jiova qai vakacegui au.” E dau vakavola na yacadra eso era cavuti ena iVolatabu, era sotava eso na ituvaki rarawataki. E raica ni vukei ira kece qori na masu. Dua tale na ka e raica ni veivuke vakalevu na wili iVolatabu.

E vulica tale ga ena iVolatabu o Delphine me kua ni vakasamataka vakalevu na veigauna sa oti, me kauaitaka ga na gauna se bera mai. E vakacegui koya na inuinui e vakamacalataki ena Cakacaka 24:15: “Nira na vakaturi mai na yalododonu kei ira na sega ni yalododonu.” E vakacava na dei ni nona vakabauta o Delphine ni na vakaturi luvena o Jiova? E kaya o Delphine: “Au na sotavi luvequ dina ena gauna se bera mai. Au sa raitayaloyalotaka rawa tu na gauna keirau na veiraici tale kina ena gauna lokuci i Jiova. Ena marautaki dina na gauna qori me vaka ga na siga marautaki a sucu kina o luvequ yalewa.”

a Levu na katokatoni va qo e vakarautaki ena website na jw.org.

Se mani rarawataki vakacava na ituvaki, ena vakacegui iko na iVolatabu

SALA ENA VUKEI KEDA KINA NA KALOU

E vakamatatataka na iVolatabu: “E voleka o Jiova vei ira kece na kacivi koya, vei ira kece na kacivi koya ena yalodina. E vakamamautaki ira na rerevaki koya ena ka era gadreva, e rogoca o koya na nodra tagi ni kere veivuke qai vakabulai ira.” (Same 145:18, 19) E veivakacegui dina qori. Ia ena sauma vakacava na Kalou na nodra masu o ira era nuitaka vakatabakidua nona veidusimaki?

VEIVAKAUKAUATAKI:

E rawa ni veivakayalolailaitaki na leqa eda sotava. E rawa ni vusolo kina na lomada, e rawa ni vakamalumalumutaki keda vakayago, vakayalo tale ga. (Vosa Vakaibalebale 24:10) Ia o Jiova ena “solia na kaukaua vei koya e oca kei na igu levu vei ira na malumalumu.” (Aisea 40:29) A sotava e levu na ituvaki dredre na yapositolo o Paula, qai kaya: “Au rawata na ka kece ena vuku i koya e vakaukauataki au.” (Filipai 4:13) A vakaukauataki Paula na yalo tabu ni Kalou. O rawa tale ga ni kerea na Kalou me solia vei iko na yalona tabu.—Luke 11:13.

VEIVAKAVUKUI:

Na cava mo cakava ke o via kila qai muria vinaka na ivakasala ena iVolatabu? E vola na tisaipeli o Jemesa: “Ke dua vei kemuni e lailai vua na vuku, me kerea tiko ga vua na Kalou, ni na soli vua. Ni lomasavu o koya vei keda kece, e sega ni dau vaqara cala.” (Jemesa 1:5) O rawa ni cakacakataka tale ga na ka o masulaka ni o wilika na iVolatabu, qai muria na kena ivakavuvuli. (Jemesa 1:23-25) O na vakila na veivakavukui ni ivakasala vakaivolatabu ke o cakava qori.

VEIVAKACEGUI:

E rawa ni vakacegui iko o Jiova se mani vakacava na levu ni nomu lomaocaoca. E kaya nona Vosa: “Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka, ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece, ena vuku i Karisito Jisu.” (Filipai 4:6, 7) Ena vakacegui iko o Jiova ke o kerekere vua.

Ia vakacava ke sega ni wali totolo nomu leqa? Kua ni nanuma ni sa vakanadakui iko na Kalou. Ke sega mada ga ni wali na nomu leqa, ena vakayaloqaqataki iko na Kalou qai vakaukauataki iko mo vosota. (1 Korinica 10:13) E yalataka tale ga na iVolatabu ni na yaco mai na gauna me vakaoti kece kina na noda leqa!