Yaco na Leqa Tubukoso

“Dua na ka na neirau yalolailai. E vakacacani kece na ka keirau taukena ena waluvu, kei na sisi ni qele.”—Andrew mai Sierra Leone.

“Ni keitou lesu i vale ni oti na cagilaba, keitou kurabuitaka ni vakacacani kece neitou iyaya. E sorova tu ga na tagi na luvei keirau.”—David mai Virgin Islands.

KE O sa sotava na ituvaki qori, o na rairai kila vinaka na ka e dau yaco. Kena ivakaraitaki e levu era dau rere, veilecayaki, nuiqawaqawa, ra sega ni taleitaka na ka e yaco kei na nodra vakasamataka tu na kena vakadomobula. Na levu ni nodra oca kei na yalolailai, era sega ni vakabauta ni na vinaka tale na ituvaki.

Ke vakacacani tale ga na ka o taukena ena leqa tubukoso, ena rairai dredre mo vosota. De dua o nanuma ni sega ni yaga na bula. Ia e kaya na iVolatabu ni se rawa ni marautaki na bula, rawa tale ga ni o nuitaka na veika totoka se bera mai.

MARAUTAKI NA BULA NIDA KILA NA KA DINA ENA IVOLATABU

E kaya na Dauvunau 7:8: “E vinaka na itinitini ni dua na ka, e ca na kena itekitekivu.” Ena rairai sega ni vinaka na bula ni se qai oti ga na leqa tubukoso. Ia ni o vosovoso qai sasaga tiko ga, ena vinaka tale na bula.

E parofisaitaka na iVolatabu ni na “sega tale ni rogo . . . na domo ni tagi se qoqolou.” (Aisea 65:19) Ena yaco dina qori ena gauna sa na veisautaka kina na Matanitu ni Kalou na vuravura qo me parataisi. (Same 37:11, 29) Ena sega ni yaco tale na leqa tubukoso. Sa na oti vakadua noda dau vakasamataka na veika mosimosi. Ni yalataka na Kalou Kaukaua Duadua: “Ena sega tale ni nanumi na ka makawa, ena sega ni tiko e lomamuni.”—Aisea 65:17.

Raitayaloyalotaka mada: Sa tuvanaka oti tu na Dauveibuli ‘me solia vei iko na inuinui kei na ka mo namaka ena gauna se bera mai,’ oya na bula vakacegu ena veiliutaki ni Matanitu ni Kalou. (Jeremaia 29:11) Vakacava, e rawa ni marautaki na bula ke o vulica na veika dina qori? E kaya o Sally a cavuti mai ena imatai ni ulutaga: “Noda nanuma deivaki na veika totoka ena cakava na Matanitu ni Kalou ena veigauna se bera mai, ena uqeti keda meda rai ga i liu, da kua ni vakasamataka na veika sa oti.”

O rawa ni vulica e levu tale na ka ena vakarau cakava na Matanitu ni Kalou. Ni o cakava qori, o na nuidei tu ga se mani ituvaki cava o sotava, ena marautaki tiko ga na bula ni o waraka na gauna sa na sega kina na leqa tubukoso. Ia ena gauna mada ga qo, na ivakavuvuli vakaivolatabu ena uqeti iko mo vosota na veika e dau yaco ni oti na leqa tubukoso. Dikeva mada qo e vica na kena ivakaraitaki.

Tikinivolatabu e Veivakacegui

Moce vinaka.

“E vinaka me sinai e dua na liga ena vakacegu, e ca ni sinai ruarua na liga ena cakacaka kaukaua qai tautauvata kei na cemuria na cagi.”—Dauvunau 4:6.

Ni sotavi oti e dua na ka vakadomobula, era ripotetaka na dauvakadidike, “ni dau vakalevutaka ga na leqa . . . na sega ni moce vinaka, e veivakayalolailaitaki tale ga.” E bibi gona meda dau moce vinaka.

Talaucaka na lomamu.

“Na nuiqawaqawa ni loma ni tamata e lomabibi kina, [se, “vakararawataki koya,” ivakamacala e ra], ia na vosa vinaka ena vakamarautaka.”—Vosa Vakaibalebale 12:25.

Talaucaka na lomamu vua e dua nomu lewe ni vuvale se itokani voleka. Era na vakarogoci iko, veivakayaloqaqataki, era na vukei iko tale ga.a

Rai vakanamata ena gauna totoka se bera mai.

“Eda waraka na lomalagi vou kei na vuravura vou me vaka na nona yalayala [na Kalou], era na tiko kina na yalododonu.”—2 Pita 3:13.

a Ke dua e lomaocaoca vakadede e vinaka me laurai vakavuniwai.