“Me Caka na Ka Kecega Mo Dou Vakatataki Kina”
1 Nida veitaratara kei ira na tacida, meda cakava na ka era na vinaka kina, mera na vakatataki cake kina. Ena okati kina na noda taqomaka na nodra veika vakayalo. Ke vauci ena noda cakacaka saumi na noda volitaka e so na mataqali ivoli, se so na mataqali taba ni veiqaravi, e dodonu meda qarauna me kua ni dua na ka eda cakava me vakatarabetaki ira na tacida.—2 Kor. 6:3; Fpai. 1:9, 10.
2 E so era curu ena so na sasaga vakabisinisi ena vakasama mera na volia na nodra ivoli o ira na nodra itokani lotu Vakarisito. E tiko e so na isoqosoqo ni volivolitaki e dau uqeti ira na kena mata mera sagai ira na tamata kece ga mera volia na nodra ivoli—okati kina o ira era lotu vata. E so na tacida era vakasoqoni ira e dua na ilawalawa iVakadinadina levu, ra qai uqeti ira mera curu ena dua na sasaga vakabisinisi. E so tale era vakarabailevutaka na nodra bisinisi ena nodra veisoliyaka wale vei ira na nodra itokani vakabauta na kena itukutuku tabaki, na kena brochure, era biuta na kena ivakamacala ena Internet, se ra katona na kena tepi ni vidio se retio. E dodonu beka vua e dua na lotu Vakarisito me vakayagataka na nona veikilai kei ira na tacina vakayalo me rawaka kina? E sega!—1 Kor. 10:23, 24, 31-33.
3 Ni Qarauna Oqo na Tacida Tagane: E sega ni tukuni ni cala vua na lotu Vakarisito me rau caka bisinisi vata kei na dua tale na tacida. Eda dui vakatulewa yadua ena tikina oqo. Ia, e so era tauyavutaka na mataqali sasaga vakabisinisi e vakavurea na kocokoco, ra qai uqeti ira na nodra itokani vakabauta mera caka bisinisi vata, se mera vakailavotaka na bisinisi. E levu na mataqali bisinisi vaka oqo era dau lusi, e lai maumau wale kina na ilavo levu era a vakayagataka o ira na tauyavutaka. De yavu beka ni nodratou vakadonuya e so me ratou caka bisinisi vata na nodratou gadreva me ratou rawailavo totolo kina, ia ke lusi na bisinisi me kua ni nanuma o koya a bucina na kena vakasama ni na galala mai kina. Me vakasamataka mada vakavinaka e liu se na cakayaco vakacava ina nodratou bula vakayalo se vakayago na tacina ke mani lusi na bisinisi. Vakabibi oqo vei ira na lesi vakalou mera veiqaravi ena ivavakoso, mera qarauna vinaka sara na sasaga vakailavo era vakaitavi kina nira dau rai vei ira vaka oqo na mataveitacini ena veidokai kei na veinuitaki. Ena cala ke vakatanitaki na veinuitaki oya. Ena vagalalataki mai na nona itavi ni veiqaravi tabu e dua na tacida tagane ke sa sega nira dokai koya na kena vo.
4 Meda saga mada ga ‘meda cakava na ka kece ga meda vakatataki kina.’ (1 Kor. 14:26) Me kua nida cakava e dua na ka me tekivuna se vakabulabulataka na caka bisinisi se veivoli ena loma ni ivavakoso. E sega ni o koya oqori na vuna e kaya na iVolatabu meda dau vakasosoqoni vata kina.—Iper. 10:24, 25.