“Vutuniyau e na Cakacaka Vinaka”

¹ Ni vo e vica na yabaki me cava na cakacaka vakaitalatala vagumatua i Paula, a cakacaka veivolekati sara na yapositolo oqo kei rau o Timoci kei Taito. E vola yadudua vei rau na vosa ni veivakayaloqaqataki. E tukuna vei Taito ni o “ira era sa vakabauta na Kalou” e dodonu mera “gumatua ni kitaka tiko nai valavala vinaka.” (Taito 3:8) E tukuna vei Timoci ni o ira era nuitaka na Kalou e dodonu mera “vutuniyau e na cakacaka vinaka.” (1 Tim. 6:17, 18, VV) Oqo na ivakasala vinaka vei keda kece! Ia, na cava ena uqeti keda meda cakava na cakacaka vinaka? Na cakacaka cava meda cakava ena veisiga sa tu oqo e liu?

² Na noda vakabauta kei na noda lomani Jiova, vaka kina na inuinui totoka e dulaka tu vei keda e uqeti keda meda cakava na cakacaka vinaka. (1 Tim. 6:19; Taito 2:11) Vakabibi na vula sara ga oqo, ni na baci tokaruataki tale kina vei keda ni talai Luvena mai e vuravura o Jiova me rawa ni vakadinadinataki Tamana qai solia tale ga na bula vei ira kece e ganiti ira. (Maciu 20:28; Joni 3:16) Ena qai vakamatatataki vinaka oqo ena iVakananumi ni mate i Karisito ena 28 Maji. Ena noda vakavinavinakataka na inuinui ni bula tawamudu, e sega li ni uqeti keda oya meda “vutuniyau e na cakacaka vinaka”? E dodonu me vaka kina! Ia na cakacaka cava meda cakava?

³ Cakacaka Vinaka me Caka ena Vula o Maji kei na Veivula e Tarava: Eda na tiko ena iVakananumi​—na soqo bibi duadua ni yabaki vei ira na iVakadinadina i Jiova e vuravura raraba. (Luke 22:19) Ia eda vinakata mera na tiko tale ga na tani ena kena levu e rawa mera marautaka vata kei keda na soqo oqo. Kevaka o raica na itukutuku ni cakacaka ena yabaki sa oti ena Yearbook ni 2002, e vuqa na vanua e vuravura e vakatolutaki, vakava, vakalima, se sivia na kedra iwiliwili era tiko ena iVakananumi ni veidutaitaki kei na levu ni dautukutuku. E dua dina na ka ni sasaga vei ira na lewe ni ivavakoso mera veisoliyaka na ivola ni veisureti vei ira na vakaitikotiko ena nodra dui yalava. Meda vakayagataka gona na gauna oqo me yacova yani na 28 Maji, meda veisureti ina iVakananumi da qai vukei ira mera kila na inuinui ni veivakabulai.

⁴ Eda nuitaka ni na draki vinaka na vula o Epereli. E rawa vakacava nida vakayagataka vinaka meda “vutuniyau e na cakacaka vinaka”? Meda vunautaka tiko ga ena gumatua na itukutuku vinaka, da qai “lomakatakata e na cakacaka vinaka.” (Taito 2:14; Maciu 24:14) Kevaka o sega ni rawa ni painia veivuke ena vula o Maji, ia vakacava ena vula ruarua o Epereli kei na Me, se me dua ga vei rau na vula oqo? Kevaka o painia ena vula o Maji, o rawa ni tomana tiko ga?

⁵ E so era cakacaka saumi era raica ni rawa nira vunau ena dua na aua se sivia ena nodra ilakolako i cakacaka, oya ena nodra vunau e salatu, se ra lai vunau vei ira na cakacaka ena vanua ni bisinisi era dau dola vakamataka. E so tale era tuvanaka nodra gauna ni vakasigalevu mera vunau kina. Era raica tale ga ni rawa nira vakayagataka na gauna oya mera vuli iVolatabu kei ira era cakacaka vata. E vuqa na tacida yalewa radinivale, era vakayagataka na gauna era lai vuli kina na gone mera cakacaka vakavunau. Nira yadra vakamataka ena so na siga mera cakava na cakacaka ni vale, e levu kina na gauna mera vunau ra qai veivakavulici tale ga.​—Efeso 5:15, 16.

⁶ Kevaka e sega ni rawa mo painia veivuke, e rawa ga mo vakarautaka e dua na nomu ituvatuva mo vakalevutaka kina na nomu cakacaka vakavunau, qai cakava na kena levu o rawata mo ‘caka vinaka, vutu ni cakacaka e yaga, lomasoli qai tu vakarau ni veivuke’ ena kena wasei yani na ka dina vei ira na tani.​—1 Tim. 6:18.

⁷ Nanuma ni Cakacaka Vinaka na Veivakatisaipelitaki: E veiyabaki era dau tiko ena iVakananumi na tataleitaki. E rawa beka vei ira e so ena ivavakoso mera vukei ira na sega ni vuli iVolatabu era tiko ena iVakananumi? E rawa beka nira sikovi lesu mera vukei mera tubucake vakayalo? E so vei ira na tiko ena iVakananumi era na rairai veiwekani kei ira na iVakadinadina. E so tale era dau vuli iVolatabu tu beka e liu, era gadreva na veivakayaloqaqataki mera vuli tale ra qai tiko wasoma ena soqoni. Ena marautaki dina meda raica nida mai qaravi Jiova vata tale!

⁸ Nida vakalevutaka na noda cakacaka vakavunau ena vula o Maji kei na veivula e tarava, e sega ni vakabekataki nida na kunea e levu na tataleitaki mera na sikovi. Ni bera ni o biubiu, taroga e dua na taro. Qai yalataka ni o na sauma na taro oya ena nomu veisiko e tarava. Nida cakava oqo eda na vakarawarawataka kina na sala me caka kina na veisikovi lesu. Na totolo ga ni noda sikovi ira na kena vinaka. Kevaka e sega ni rawa meda tekivutaka na vuli iVolatabu ena imatai ni gauna, me tovolei sara me tekivu vuli ena veisiko e tarava.

⁹ Nida vunau ena salatu, meda vakaliuliu ni tekivutaka na veivosaki kei ira na tamata. E so na tataleitaki era solia na yacadra, na nodra itikotiko kei na naba ni nodra talevoni vei ira e levu na dautukutuku era sota ena cakacaka ena salatu. Kevaka e sega ni tiko ena nomu yalava o koya e tataleitaki, solia kece na kena ivakamacala ina ivavakoso e nona na yalava e tiko kina na tataleitaki oya. Kevaka o sega ni rawa ni cakava vaka kina, o rawa ni vakauta ina valenitabana me ratou qai lai qarava. Na sala oqo ena vakabulabulataki tiko ga kina na tataleitaki.

¹⁰ Kevaka o taura na naba ni talevoni, sega ni naba ni itikotiko, qiri ni o veisikovi lesu. Ia, ni bera oya, vakarautaka vinaka na ka mo drau na veivosakitaka. Me tiko vei iko na ivola na Reasoning mo rai totolo kina. E so sa toso vinaka sara na nodra vuli ena talevoni, okati tale ga kina o ira na dredre ni sotavi e vale. E tekivu kerea e dua na tacida yalewa na naba ni nodra talevoni na marama era tataleitaki e sotava e veivale, yaco sara me tekivutaka kina e rua na vuli iVolatabu.

¹¹ Tokoni Ira na Qase Nira Vukei na Dautukutuku Mate: Era marau na qase ni vukei ira na dautukutuku mate. E so vei ira oqo era lako ga mai vakataki ira ina soqoni. Era kila ni gadrevi mera volekata na isoqosoqo i Jiova me rawa nira taqomaki kina vakayalo me vaka e vakamacalataki ena Same 91. E so vei ira oqo era tu vakarau mera cakacaka tale vakavunau. Kevaka era tiko ena iVakananumi ena vula oqo e so na dautukutuku mate, de ra na taleitaka mera vuli iVolatabu tale. Ke mani yaco oqo, o ira na qase era na veivosakitaka se o cei me na vuli vata kei ira. Kevaka o sureti mo veivuke, e vakavinavinakataki vakalevu na nomu veitokoni.​—Roma 15:1, 2.

¹² Tomana Tiko ga na “Cakacaka Vinaka”: Levu era painia veivuke ena loma ni dua na vula se sivia, era raica ni levu cake tiko ga nodra cakacaka vakavunau ena veivula e tarava. Era sotavi ira na tataleitaki e gadrevi mera sikovi lesu. E uqeti ira oqo mera saga vagumatua mera vakalevutaka na nodra cakacaka vakavunau me kune kina o ira na tataleitaki. E so sa tekivu sara nodra veivakavulici ena iVolatabu, era vakaitavi kina vakalevu ena cakacaka vakaitalatala.

¹³ Ia e so tale ena nodra marautaka na cakacaka vakavunau kei na veivakatisaipelitaki, e uqeti ira mera raica se cava era vakaliuca tiko ena nodra bula. E so era vakalailaitaka kina na gauna era vakayagataka ena cakacaka saumi mera painia veivuke tiko ga. E so tale era yaco sara mera painia tudei. E vaqaqacotaka na nodra nuitaka na Kalou, sega ni ka e dulaka tu o vuravura. Era raica nodra “lomasoli, me ra via veivuke,” e vakalougatataki ira kina o Jiova qai vakaukauataka nodra nuitaka “na bula dina.” (1 Tim. 6:18, 19) Io, na levu ga ni painia na kena bulabula na ivavakoso. Era dau talanoataka na painia na ka era sotava ena vunau ra qai sureti ira tale e so mera cakacaka vakavunau vata, oqo e vakabulabulataka vakayalo na ivavakoso.

¹⁴ Meda “vutuniyau [mada ga] e na cakacaka vinaka” ena vula ni iVakananumi kei na veivula tale e tarava ena noda vakalevutaka na noda cakacaka vakaitalatala vakarisito. Meda vakavinavinakataki Jiova ni solia vei keda na inuinui ni bula tawamudu ena vuravura vou ni yalododonu.​—2 Pita 3:13.