Eda Vutuniyau Ena Veivakalougatataki i Jiova
1 Na nona rawaka e dua e dau vakatau ena levu ni nona ilavo. Oya na vuna era kaya kina e levu nira tamata mamarau ga ra qai lomavakacegu o ira na vakailavo. Ia, e cala nodra rai nira nanuma ni ilavo e rawa ni volia na marau. (Dauv. 5:12) Era sega ni marau dina o ira era “gadreva me ra vutuniyau” vakayago. (1 Tim. 6:9) Ena yasana adua, o ira na tamata i Jiova era mamarau dina ra qai vutuniyau duadua e vuravura. (Vkai. 10:22; Vkta. 2:9) Ena sala cava?
2 iVakadinadina ni Noda Vutuniyau: E titobu na noda rai vakayalo, da qai kila na Vosa ni Kalou, na iVolatabu. E vakayagataka o Jiova na nona isoqosoqo e vuravura me vakavulici keda tiko ga ena ka e baleti koya kei Luvena, me na yaga tawamudu vei keda. Na kilaka dodonu e vakarawarawataka na noda toro voleka vei Jiova da qai marautaka tale ga na noda veiwekani voleka. (Jeme. 4:8) Na noda kila na ka vinaka mai na ka ca kei na noda muria na lawa ni Kalou ena taqomaki keda mai na mate ca e so kei na ituvaki rerevaki. Eda nuidei ni na vakarautaka vei keda o Jiova na ka meda bula kina, ena noda kina na lomavakacegu e soli vakalou, qai vakacegu na noda vakasama.—Maciu 6:33.
3 Eda marautaka na vakacegu kei na duavata ena keda maliwa na mataveitacini vakayalo baleta nida vuataka na vua ni yalo ni Kalou. Nida vakaduavatataki ena ivau kaukaua ni loloma, meda kua vakadua ni nanuma ni na biuti keda na Kalou, se ra na biuti keda na tacida ena gauna eda sotava kina na rarawa.—Kala. 6:10.
4 E vakainaki dina na noda bula. E ka dokai dina vei keda na noda vakaitavi ena vunautaki ni itukutuku vinaka e vuravura raraba. E vakamarautaki keda dina na noda vukei ira na tani me vinaka na nodra veiwekani kei na Kalou da qai mai duavata ena sokalou savasava. E noda iyau talei na cakacaka vakaitalatala ni dokai kina o Jiova qai vakacegui keda nida cau ina kena vakarokorokotaki na yacana. Me donu tiko ga na noda rai nida kila ni sa voleka sara na noda inuinui me baleta na gauna se bera mai.
5 Vakaraitaka na Noda Vakavinavinaka: Meda vakavinavinakataka tiko mada ga na veivakalougatataki i Jiova ni rawa kina meda matatamata vutuniyau duadua e vuravura. (Vkai. 22:4) Na noda solia e dua na gauna e veisiga yadua meda dau vakananuma kina na veika eda taukena, ena uqeti keda meda vakavinavinakataki Jiova ena nona lomasoli vakayalololoma da qai sokaloutaki koya tiko ga vakatabakidua