Vakarau me Vulici na Parofisai i Aisea!
1 “Mera nuidei o ira na sokalou vei Jiova ena yalodina ni na sega ni vakatara o koya me bula tiko ga na vuravura i Setani baleta ni Kalou ‘lewa vakadodonu’ o koya.” Sa bau veivakayaloqaqataki dina! E kau mai vei na veivosa oqo? Mai na ivola na Parofisai i Aisea—Me Vakararamataka na Kawatamata I. E vakayaloqaqataki keda beka na parofisai i Aisea? Io! Ena ivola vakaivolatabu oya, e vakadeitaki qai matata vinaka kina na usutu ni veivakabulai. (Aisea 25:9) Oya na vuna sa na bau veivakayaloqaqataki dina vei keda na noda vulica na Vosa ni Kalou ena kena vakayagataki na ivola oqo ena Vulivola ni iVavakoso. Eda na tiko beka kina e veimacawa meda na donuya na kena vulici? Ena vuku ni cava?
2 Ena Aisea 30:20, e vakatokai o Jiova me noda “[i]vakavuvuli [se, “Dauniveivakavulici Levu,” NW].” Meda vakarorogo matua na lotu Vakarisito yadua ni vakavulici keda o Jiova ena nona Vosa kei na ivola tabaki vakaivolatabu e vakarautaka na “dauveiqaravi yalo dina ka vuku.” (Maciu 24:45, VV; Aisea 48:17, 18) E dina oqo ena ivola na Parofisai i Aisea I. Ena yaga vakacava vei iko na nomu vulica?
3 Vakavakarau mo Saumitaro: Biuta vakatikitiki na gauna e veimacawa mo vakarautaka kina na vulici ni ivola oqo ena vulivola. Wilika kece na parakavu me na vulici. Vakasamataka vinaka na taro kece e tarogi kina. Toqarukutaka na isaunitaro ena nomu ivola. Na tikinivolatabu kece e lavetaki mai ena Aisea e volai ena matanivola kata. Wilika sara vakavinaka. So tale na tikinivolatabu era volai tu, wilika tale ga mo rawa ni kila se veisemati vakacava kei na ka e vulici tiko. Vakananuma na ka o vulica. Wasea vei ira na lewe ni nomu iwasewase na ka o sa toqarukutaka ena nomu ivola.
4 Na tacida e veitauri ena vulivola me vukei ira kece era tiko kina mera vakayagataka vinaka nodra iVolatabu, mera taura rawa tale ga na sala yaga me vakayagataki kina na ka e vulici. Ke o imatai ni saumitaro, me lekaleka ga qai sauma sara ga vakadodonu na taro. Ke dua e sa saumitaro oti, o rawa ni vakarabailevutaka na tikina e veivosakitaki tiko. De vinaka mo vakamacalataka se tokona vakacava e dua na tikinivolatabu na usutu e vulici tiko. Tovolea mo vakamacala ena nomu vosa ga, qai marautaka nomu vakaitavi ena vuli.
5 Meda vulica vata mada ga vagumatua na itukutuku bibi ena ivola i Aisea. Ena vakayaloqaqataki keda meda waraka tiko ena marau e veisiga na siga ni veivakabulai i Jiova!—Aisea 30:18.