Kua ni Madua ni Vunau!
1 Nida vakarau lako ena cakacaka vakavunau e veivale, e bau ka toka ni bolebole na noda biuta na noda vale meda lai vunau. Na noda beci keda e rawa nida madua kina ni tukuna na ka dina vei ira “na tamata kecega.” (1 Tim. 2:4) Ia meda kua vakadua ni madua ni vunautaka na itukutuku vinaka. Baleta?
2 iTukutuku i Jiova: E vosa vei keda o Jiova ena iVolatabu. Nida tukuna na itukutuku oqo vei ira tale na so, eda sa tukuna tiko kina na nona vakasama, sega ni noda. (Roma 10:13-15) Nira bese ni rogoca na itukutuku ni Matanitu ni Kalou, era sa besetaki Jiova tiko. Ia, eda sega ga ni yalolailai kina. Eda nuidei ni itukutuku oqo ena tarai ira sara ga na sa diva tu mai vakabalavu me veisau na ituvaki kei vuravura, ra qai kauaitaka tale ga na nodra gagadre vakayalo.—Isik. 9:4; Maciu 5:3, 6, NW.
3 O Jiova e Vakayarayarataki Ira Mai na Tamata: E dua e dau bese ni vakarorogo e liu sa na rairai vakarorogo ena gauna oqo, ni sa veisau na kena ituvaki, sa yalomalumalumu tale ga mai. Sa rawa ni vakaraitaka o Jiova na nona yalovinaka vua qai “vakayarayarataki koya” mai. (Joni 6:44, 65) Ni yaco oqo, eda vinakata meda na tu vakarau me vakayagataki keda o Jiova da qai vakamalumalumutaki keda ena veidusimaki ni agilosi ena nodra vakasaqarai o ira era vaka oqo.—Vkta. 14:6.
4 Vakaukauataki Keda na Yalo ni Kalou: E vakaukauataki keda na yalo tabu meda vosa “doudou e na vuku ni Turaga [o Jiova].” (Caka. 14:1-3) Nida kila ni tiko na igu kaukaua e tokoni keda tiko ena noda cakacaka vakavunau, eda na sega gona kina ni madua ni tukuna na ka dina vei ira eda tiko veitikivi, o ira eda cakacaka vata, vuli vata, ira na wekada, ira na vuli vinaka se o ira na vutuniyau.
5 Vakavulici Keda o Jisu ena Ka Meda Cakava: E vakayagataka o Jisu na taro vakavure vakasama, vosa vakatautauvata rawarawa, kei na ivakamacala maqosa mai na iVolatabu. E vakamacalataka na ka dina mai vu ni lomana ena sala rawarawa qai veirawai. Na iwalewale kece oqo e se sala vinaka tiko ga edaidai. (1 Kor. 4:17) Ena duidui beka na ituvatuva ni noda vunau, ia na itukutuku veivakauqeti ni Matanitu ni Kalou e dua tu ga.
6 Eda kalougata ni vakayagataki keda o Jiova meda vukei ira na tamata ena sala duatani oqo qai bibi. Meda kua gona ni madua! Meda yalodoudou mada ga da qai vakararavi vei Jiova me ‘dolava vei keda na katuba ni vosa’ meda tukuna kina na itukutuku vinaka.—Kolo. 4:2-4.