Ra iTubutubu—Vakavulici Ira na Luvemuni Nira se Gonedramidrami
1 “Vakatavulica na gone e na sala e dodonu me lako kina: ia ni sa qase mai, ena sega ni lako tani mai kina.” (Vkai. 22:6) Ra itubutubu, ke oni sega ni vinakata mera “lako tani mai” na ka dina na luvemuni, me tekivu ena gauna cava na veivakavulici? Ni se gonedramidrami!
2 Ni tukuna o Paula nona susugi mai o Timoci ena veika vakayalo ni “se gone,” e vakaibalebaletaka tiko ni se gonedramidrami. (2 Tim. 3:14, 15) Kena itinitini, a yaco o Timoci me dua na tamata e kaukaua vakayalo. (Fpai. 2:19-22) Ra itubutubu, ni tekivu vakavulica na luvemuni ‘nira se gonedramidrami’ ena ka era gadreva mera ‘tubu kina ena mata i Jiova.’—1 Sam. 2:21, NW.
3 Vakarautaka na Wai Mera Tubu Kina: Ni gadreva na kau na wai me tubu kina, e vaka tale ga oya o ira na gone ena nodra gadreva na wai ni ka dina ena iVolatabu mera tubu kina mera dauveiqaravi matua ni Kalou. Na vuli vakavuvale vakawasoma e itekitekivu ni nodra vakavulici na gone mera veivolekati kina kei Jiova. Ia, mo ni nanuma na itubutubu na dede ni nodra rawa ni vakarorogo na gone. Vei ira na se lalai, de yaga cake sara na vuli e leleka qai caka wasoma mai na vuli vakabalavu e caka vakavudua.—Vkru. 11:18, 19.
4 Me kua ni dau beci nodra rawa ni vuli na gone. Me dau talanoataki vei ira na kedra itukutuku e so ena iVolatabu. Mera droinitaka se dramataka na ka era vakatavulici kina mai na iVolatabu. Me vakayagataki vinaka tale ga na tepi ni vidio, kaseti, oka kina na tepi ni drama vakaivolatabu. Ni caka na vuli vakamatavuvale, me vakayagataki na iwalewale e ganita nodra yabaki kei na nodra kilaka na gone. Nira tekivu vuli ena se lailai sara na nodra kila, ia nira sa tubu tiko me na rabailevu qai titobu na ka mera vulica. Me veiveisau qai bulabula na veika o vakatavulica mai na iVolatabu. Ni o vinakata mera “gadreva” na Vosa na luvemu, mo vakabulabulataka na vuli.—1 Pita 2:2.
5 Mera Vakaitavi ena iVavakoso: Kotora e so na isausau vei ira na luvemu me rawa nira vakaitavi kina ena ivavakoso. Na cava beka me imatai ni nodra isausau? Rau kaya na itubutubu e rua na nodrau gone: “Rau vakavulici me rau kua ni kosakosa ena Kingdom Hall.” Kuria, mera vukei ena nodra dau saumitaro ga ena nodra vosa vakataki ira, qai nodra isausau mera vakaitavi ena Koronivuli ni Vuli Vunau. Ena cakacaka vakavunau, e isausau vinaka mera dau soli ivolacebaceba ena matanikatuba, mera wili iVolatabu, vakamacalataka na ivoladraudrau, qai vakaibalebale nodra veivosaki kei ira na itaukeinivale.
6 Drau iVakaraitaki Vinaka: Era dau rogoca beka e veisiga na luvemu ni o tukuni Jiova qai masu vua? Era raici iko beka ni o dau vulica na nona Vosa, tiko ena soqoni, lako ena cakacaka vakavunau, qai marautaka ni cakava na loma ni Kalou? (Same 40:8) E bibi mera raica ni o cakava tiko oqo, ia mo drau qai dau cakava vata. E dua na goneyalewa e kaya me baleti tinana, ena nona tuberi iratou mai e lewe ono na gone me ratou iVakadinadina yalodina: “Na ka duadua e lauti keitou baleti Nau oya na nona ivakaraitaki—e mana na ka e cakava mai na ka e kaya.” E dua na itubutubu e va na luvena e kaya: “E sega ni neirau ivosavosa ga ‘me liu o Jiova’ keirau bulataka sara ga.”
7 Ra itubutubu, me kua ni bera nodra vakavulici na luvemuni, vakatavulici ira ena dina ni Vosa ni Kalou, kotora vei ira na isausau mera toso tiko ga kina, qai vinaka vakaoti nomudrau ivakaraitaki. Drau na marautaka dina nomudrau cakava na veika oqori!