Vakamasuti Meda Nanuma Vinaka na iVakaraitaki Meda Qaqarauni Kina
Meda vuli mada ga mai na drama vakaivolatabu eda sarava ena vidio Warning Examples for Our Day (iVakaraitaki Meda Qaqarauni Kina), da qai nakita dei mai vu ni lomada meda na yalodina tiko ga. Ni o vakarau sarava, wilika mada na Tiko Voli mai na Lekutu wase 25 kei na ivakamacala e tiko ena Insight on the Scriptures, Volume 2, tabana 419, parakaravu 3-5. Oti, sauma na taro oqo: O cei o ira na kai Moapi, ia na cava a kaya kina vei Mosese o Jiova me kua ni valuti ira? (Vkru. 2:9) Na ivadi cava a nanuma o Pelami me vakayagataka mera vakarusai ira kina na Isireli na kai Moapi? Na cava meda kua ni guilecava kina ni levu vei ira na Isireli era a bale ena iotioti ni veivakatovolei nira vakarau sara tu ga mera curuma na Vanua Yalataki?—1 Kor. 10:11, 12.
Ni o sarava tiko na vidio, Warning Examples for Our Day, tei vakasamataka na va na tikina oqo meda na kauaitaka vakabibi kevaka e lomada dina meda yalodina vua na Kalou, meda vakadonui tale ga. (1) Me Kua na Veibeci: Era a beci Jiova vakacava kei na nona ituvatuva e so na Isireli? Na yalo ga vakacava meda saga ni teivaka? (2) Na iLala: Na cava a sega ni vinakata kina o Jiova mera veitokani na Isireli kei ira na kai Moapi? (Lako 34:12; Vkai. 13:20) Na cava meda digi ira kina vakayalomatua na noda itokani? (3) iTovo Kilikili: Na ivalavala ca levu cava era sikalutu kina na 23,000 na Isireli ena vuku ni nodra lai vakailala cala? (1 Kor. 10:8) Na cava e so na ka era bacani kina na tamata ni Kalou nikua mera tacori ena veidauci, ia eda na taqomaki keda vakacava? (4) Sokalou: Era a vakatovolei vakacava na Isireli ena ka e baleta na savasava ni nodra sokalou? Na cava e so na ivalavala ni qaravi matakau e sega ni toboki rawarawa e rawa nira tacori kina e so nikua, ia eda na qarauni keda mai kina vakacava?—Kolo. 3:5.
Ena drama eda sarava oqori, a vakalougatataki vakacava o Jamini baleta ni muria dei na itovo kilikili? Na cava na vakamamasu ni iLawalawa Dauvakatulewa vei ira na lotu Vakarisito kece me vaka e tauri rawa ena vidio oqo? Ke o ulunivuvale, na cava o nanuma kina ni ka vakayalomatua mo dou sarava vakavica vata vakavuvale na vidio oqo?