Vakatotomuria na Lewadodonu i Jiova
1 ‘E vinakata na ka dodonu o Jiova.’ (Same 37:28) Dina ga ni sa nakita tu me na vakarusai na vuravura ca oqo, ia e sa vakarautaka tale ga na sala mera vakaroti kina na lewenivanua. (Mari. 13:10) Oqori era na rawa kina ni veivutuni, ra vakabulai tale ga kina na tamata. (2 Pita 3:9) Eda dau saga beka meda vakatotomuria na lewadodonu i Jiova? E uqeti keda beka na rarawa e sa sotava tu nikua na kawatamata meda via wasea yani kina na inuinui ni Matanitu ni Kalou? (Vkai. 3:27) Noda vinakata na lewadodonu ena uqeti keda meda gumatua ena vunau.
2 Kua ni Veivakaduiduitaki Nida Vunau: Eda na vakaraitaka ni tiko vei keda na “lewadodonu” ke da tukuna yani na inaki ni Kalou vei ira na tamata kece ga. (Maika 6:8, NW) Meda kua ni vakaduiduitaki ira e so ena vuku ni kedra irairai e sau. E ka ni sasaga oqo nida bula ivalavala ca. (Jeme. 2:1-4, 9, VV) E loma i Jiova mera “bula na tamata kecega, ka mai kila sara nai vakavuvuli dina.” (1 Tim. 2:4) Na Vosa ni Kalou e rawa ni veisautaka sara ga na bula ni tamata. (Iper. 4:12) Ke da vakabauta dina oqo ena uqeti keda meda torovi ira na tamata ena doudou, vaka kina o ira na sega ni dau via vakarorogo.
3 E dua na tacida yalewa e cakacaka tiko ena dua na sitoa, e dau rerevaka na kena irairai e dua na tagane e dau lai volivoli yani. Ia, ena dua na gauna veiganiti, a vakamacalataka na tacida oqo vua na tagane oya na inaki ni Kalou me baleta na Parataisi. A kaya vakadodonu na tagane oya ni sega ni vakabauta, ni oya e itukuni ga. E sega ni dau kauaitaka na bula, e dau vakayagataka tale ga na wainimate gaga. Ia, e sega ni soro na tacida oqo. Dua na siga a taroga na tagane oya se cava e nanuma na tacida yalewa me baleta na balavu ni drauniuluna, sa qai vakamacalataka vakamalua vua na tacida oqo na rai ni iVolatabu. (1 Kor. 11:14) E kidacala na tacida ni sa lako yani na tagane oqo ena siga e tarava sa toro vinaka tu yani, sa koti tale ga na drauniuluna! A kerea sara me vuli iVolatabu, mani vakavulici koya e dua tale na tacida tagane, yaco me yalataki koya qai papitaiso. Me vakataki koya ga na tagane oya, e levu era sa qaravi Jiova tiko nikua era vakavinavinakataka na nodra sega ni veivakaduiduitaki kei na nodra sasaga o ira na tukuna vei ira na itukutuku vinaka ni Matanitu ni Kalou.
4 Sa voleka na gauna me na vakawabokotaki ira kina na tawayalododonu o Jiova. (2 Pita 3:10, 13) Ena gauna lekaleka sa tu oqo, meda vakatotomuria mada ga na lewadodonu i Jiova, meda vukei ira kina na tamata kece ga mera kua ni vakarusai vata kei na vuravura ca i Setani.—1 Joni 2:17.