Vakayagataka Vakavuku Nomu Gauna
1 Noda gadreva meda vakamarautaki Jiova ena uqeti keda meda vakaliuca ena noda bula na veika vakayalo. E vakaroti keda na nona Vosa meda “vakasaqara taumada na matanitu ni Kalou,” da qai “digitaka na veika e uasivi sara.” (Maciu 6:33; Fpai. 1:10, VV) Rawa vakacava nida volia na gauna meda vakaliuca na veika e baleta na Matanitu ni Kalou, me qai muri na veika e sega soti ni bibi?—Efeso 5:15-17.
2 Me Liu na Cakacaka ni Matanitu ni Kalou: Tuvanaka nomu gauna me kua ni vakamaumautaki wale tu ena veika e sega so ni bibi. Ni se qai tekivu na vula, e so era sa dau makataka rawa ena ivolanivula na gauna mera na cakacaka vakavunau kina. Era qarauna me kua ni dua na ka me vakalatia na ituvatuva oqori. E rawa nida volia tale ga na gauna me rawa kina nida tiko ena soqoni, da vuli vakataki keda, kei na noda tiko ena soqo ni tikina. E levu era sa tuvana tu mera tekivuna se mera tinia na veisiga ena wili iVolatabu. Lokuca na gauna mo cakava kina na veika e bibi, me kua ni vakalatilati e so na ka e sega so ni bibi.—Dauv. 3:1; 1 Kor. 14:40.
3 Vakayagataka Vakarauta na Veika ni Vuravura: Ena so na vanua sa ra tu vakarawarawa na qito, ka ni veivakamarautaki, ka ni veivakalasai, na veika eda taleitaka meda cakava, kei na so tale. E levu era vakayagataka vakalevu na nodra gauna ena sara retioyaloyalo se na vakayagataki ni kompiuta. Na noda vakaogai keda gona ena veika ni veivakalasai kei na iyaya vovou era se qai taka ga mai, e rawa ni tini ena vakanuinuikara. (1 Joni 2:15-17) Ia, e uqeti keda na iVolatabu meda vakayagataka ga vakarauta na vuravura oqo. (1 Kor. 7:31, VV) Nida muria na ivakasala vuku oqori, eda sa vakaraitaka nida vakaliuca ena noda bula na noda qaravi Jiova.—Maciu 6:19-21.
4 Sa lekaleka sara na gauna e vo ena vuravura ca oqo. O ira ga era vakaliuca na Matanitu ni Kalou era na marau, ena vakadonui ira tale ga na Kalou. (Vkai. 8:32-35; Jeme. 1:25) Meda vakayagataka vakavuku mada ga na noda gauna.