E Rawa Beka ni Vakatulewa Vakayalomatua na Luvemu?
1. Na vakatulewa cava e dodonu mera cakava na gone lotu Vakarisito me baleta na dra? Tukuna e dua na kena ivakaraitaki.
1 Na cava me vakatulewataka vakayalomatua? Na tauri ni dra. Me vaka e tabaki ena Watchtower, 15 June, 1991, e kena ulutaga “Walk as Instructed by Jehovah” (Muria na Veidusimaki i Jiova), e dodonu vei ira na luvedra na iVakadinadina i Jiova mera yalomatuataka na bibi ni nodra muria na lawa ni Kalou me baleta na dra, me vakataki ira na nodra itubutubu. Era okati tale beka ga kina na luvemuni lalai?
2. Na lawa cava a vakatauca e dua na mataveilewai vua e dua na gone a sega ni via taura na dra? Na cava era rawa ni vulica kina na itubutubu lotu Vakarisito kei ira na gone?
2 Na Cava e Kaya na Lawa? E duidui na lawa ni veivanua, vaka kina na lawa ni duidui matanitu ena dua mada ga na vanua. E so era vakadonuya ni tu na dodonu vei ira na gone mera vakatulewa, ia e so era sega ni duavata kina. E so tale era vakadonuya ga vakatikina. Dua na kena ivakaraitaki ena yasana o Illinois ena vanua o Mereke, a vakatauca na kena Mataveilewai Cecere na lewa ni tu vua e dua na gone na dodonu me kua ni taura na dra. Ni railesuvi na nona kisi e dua na tacida goneyalewa e yabaki 17, a vakarota na mataveilewai: “Ke vakadinadinataki ni rawa vua me kila vinaka na ka ena vakatulewataka qai rawa ni vakatulewa me vaka e dua na qase, sa na qai soli vua na dodonu me lewa na veiqaravi vakavuniwai e caka vua.” Me vakadeitaki gona ni rawa vua e dua na gone me vakatulewa vakayalomatua, era na vakatarogi koya na vuniwai, se o ira na vakailesilesi mera rogoca sara ga na nona ivakamacala me baleta na vu ni nona sega ni taura na dra. Ena gadrevi vua na itabagone oya me kila vakavinaka na bibi ni kena mate, na veiqaravi e rawa ni caka vua, me rawa tale ga vua me vakamacalataka vakamatata na nona vakabauta vakalotu me baleta na lawa ni Kalou ena vuku ni dra.
3. Na taro cava mera vakasamataka vakabibi na itubutubu? Na cava na vuna?
3 Na Cava ena Kaya o Luvemu: E rawa beka vei luvemu me vakamacalataka na lawa ni Kalou me baleta na dra? Era vakabauta beka na gone mai lomadra na ivakaro ni Kalou ni ‘tabu na dra?’ (Caka. 15:29; 21:25) E rawa beka nira vakamacalataka nodra vakabauta mai na iVolatabu? E rawa beka mera vakamacalataka na vu ni nodra vakatulewa me baleta na dra kevaka mada ga e sega ni tiko kei ira na nodra itubutubu, se ena gauna e nanuma kina o vuniwai ni rawa nira vakaleqai kina? Ni dau yacovi keda kece na “gauna kei na veika tawanamaki,” e rawa vakacava vei kemuni na itubutubu mo ni vakarautaki luvemuni ena veika tawanamaki ena vakatovolei kina na nodra vakabauta?—Dauv. 9:11, NW; Efeso 6:4.
4, 5. (a) Na cava na nodra itavi na itubutubu? Era na rawata vakacava? (b) Na ivukevuke cava era tu me na vukei ira na itubutubu?
4 Ra iTubutubu, Cava Oni Rawa ni Cakava? E nomuni itavi mo ni vakavulici luvemuni ena rai ni Kalou me baleta na dra. (2 Tim. 3:14, 15) Na kena ivakamacala matata e tiko ena ivola na Reasoning, tabana 70-4. Dou vulica vakavinaka vakavuvale. Ena ulutaga lailai “If Someone Says” (Ke Kaya e Dua), ena tabana 74-6, dou vakatovotovotaka vata kei ira na gone me rawa kina nira vakamacalataka na nodra vakabauta kei na vuna era vakabauta kina. (1 Pita 3:15) E tu e so tale na ivukevuke e rawa nida kila kina na veika me baleta na dra, me vaka na brochure How Can Blood Save Your Life? kei Na Vale ni Vakatawa, 15 June, 2004, tabana 14-24. E tiko ena porokaramu ni vidio na Transfusion-Alternative Health Care—Meeting Patient Needs and Rights kei na No Blood—Medicine Meets the Challenge, na porokaramu ruarua oqo e sa tu ena DVD e kena ulutaga na Transfusion Alternatives—Documentary Series, e vakaraitaki kina na wainimate e sega kina na dra kei na veisele e sega ni vakayagataki kina na dra. Dou sa sarava beka vakavuvale na DVD oqo, dou qai veivosakitaka tale ga?
5 Vukei iratou na gone me ratou ‘kila rawa na loma ni Kalou, na kena yaga, na kena vinaka, kei na kena uasivi’ na veika me baleta na dra. Sa na qai rawa kina vei ira na gone mera vakatulewa vakayalomatua, ena vakalougatataka tale ga o Jiova.—Roma 12:2.