Vakatotomuri Jiova Noda “Kalou Mamarau”
1 E dau vinakata o Jiova meda marau na tamata. E vakarautaka na nona Vosa me rawa nida vakanamata ena marau ina veika totoka e sa yalataka tu me baleta na gauna se bera mai. (Aisea 65:21-25) E dodonu me laurai votu noda mamarau nida wasea yani “na itukutuku vinaka nei koya na Kalou mamarau.” (1 Tim. 1:11, NW) Me kilai mai na ivakarau ni noda vosa nida vakamareqeta na itukutuku vinaka eda kacivaka tiko, da kauaitaki ira tale ga na tamata eda vosa vei ira.—Roma 1:14-16.
2 E ka ni sasaga ena so na gauna meda mamarau tu ga. Dua na vuna baleta ena so na vanua era sega ni dau kauaitaka vakalevu na tu ena yalava na itukutuku vinaka eda kacivaka. Dua tale, na noda dau sotava sara ga ena so na gauna na ituvaki dredre ena noda bula. Ia me rawa nida marau tiko ga e dodonu meda vakasamataka na kena bibi vei ira na tiko ena yalava mera rogoca na itukutuku vinaka ni Matanitu ni Kalou eda kacivaka. (Roma 10:13, 14, 17) Noda dau vakasamataka vakatitobu na tikina oqo ena uqeti keda meda tukuna tiko ga ena marau na yalololoma i Jiova, ena nona vakarautaka na veika meda bula kina na tamata.
3 Vakabibitaka ga na iTukutuku Vinaka: E dodonu meda qarauna tale ga na ka eda tukuna. Ni tekivu na veivosaki eda na tukuna beka e dua na leqa, se dua na ka e se qai kacivaki ga ena tabana ni itukutuku, ia na ka oqo me kua ni usutu ni itukutuku eda kauta tiko yani. E noda itavi meda ‘kauta na itukutuku vinaka ni ka vinaka.’ (Aisea 52:7; Roma 10:15) Na itukutuku vinaka oqo e yavutaki ena veika totoka e yalataka na Kalou me baleta na veisiga sa tu oqo e matada. (2 Pita 3:13) Meda vakayagataka gona na iVolatabu meda “vakabulai ira sa ramusu na yalodra.” (Aisea 61:1, 2) Noda cakava na veika oqo eda na marautaka tiko kina na cakacaka vakavunau, ena veivakauqeti tale ga na noda ivakamacala.
4 Sega ni vakabekataki nira na raica na tu wavoliti keda na noda marautaka noda kauta yani na itukutuku vinaka. O koya gona, meda vakatotomuria mada ga na “Kalou mamarau” o Jiova ena noda kacivaka yani ena marau na itukutuku ni nona Matanitu vei ira na tu ena noda yalava.