Qarai Ira Era na Veiciqomi
1. Eda na vakaraitaka vakacava nida raica vakabibi na itavi dokai ni cakacaka vakaitalatala?
1 A gumatua o Jisu ena cakacaka vakaitalatala me wasea na itukutuku veivakacegui vei ira na yalomalumalumu. (Aisea 61:1, 2) Nida mata, eda italai tale ga i Karisito, e noda itavi dokai nikua meda vakatotomuri koya ena noda gumatua da qai qarai ira tiko ga era na veiciqomi ena yalava.—Maciu 10:11, NW; 2 Kor. 5:20, VV.
2. A veisautaka vakacava o Paula na iwalewale ni nona vunau, cava e yaco kina?
2 Veiveisau na iWalewale ni Vunau: E dau ivakarau i Paula me vunau e liu ena valenilotu vei ira na Jiu kei ira na tavuki ina lotu vakaJiu. (Caka. 14:1) Ni rau vunau e Filipai o Paula kei Sailasa, erau lako ina vanua erau “nanuma ni dau caka kina na masumasu.” Erau a vunau vei ira eso na marama, e dua vei ira a ciqoma na ka dina o Litia.—Caka. 16:12, 13, VV, 14, 15.
3. Me ikuri ni noda vunau e veivale, na iwalewale cava tale ni vunau meda saga?
3 Me ikuri ni noda vunau e veivale, eda rawa tale beka ga ni vunau vei ira era wawa basi, teksi, waqa, waqavuka, vanua ni gade, vanua ni cakacaka, gaunisala osooso, vanua ni bisinisi kei na sitoa lelevu ena noda yalava? De rawa nida volavola se qiri meda vunau kina vei ira e dau loka tu ga nodra matamata, se o ira e yadravi na nodra itikotiko. Nida kauai da qai veisautaka noda iwalewale ni vunau ena yalava, eda na ‘ogaoga tiko ga ena cakacaka ni Turaga.’—1 Kor. 15:58, VV.
4. Na cava eda rawa ni cakava ke lailai na yalava ni ivavakoso?
4 Era toki e levu na dautukutuku ina dua tale na ivavakoso e nodra vanua se vanuatani, mera vakalevutaka kina nodra cakacaka vakaitalatala. Eso tale era vulica e dua na vosa vou mera vunau kina vei ira era gole mai vanuatani.
5. Meda raica vakacava na gauna eda bula tu kina qo? Na cava eda vakadeitaka meda cakava?
5 Meda nanuma tiko ni ‘were o vuravura.’ (Maciu 9:37; 13:38) Ni sa voleka ni cava na ituvaki ca qo, meda vakasamataka vakabibi na keda ituvaki, noda taledi, kei na ka eda rawa ni cakava meda vakalevutaka kina noda cakacaka vakaitalatala. E yalataka o Jiova ni na vakalougatataka noda sasaga meda vakalevutaka noda cakacaka vakaitalatala ke da vakaliuca na cakacaka e vauca nona Matanitu.—Maciu 6:33.