Vakasaqarai na Tamata Dina
1 E ka ni bolebole na ivakaro i Jisu meda cakacaka vakavunau. E kaya: “Na koro kece ga dou curu kina, dou vakataroga se ko cei na tamata dina e tiko kina.” (Maciu 10:11, VV) Nira dau sega ni tu vakalevu na tamata e vale, na cava meda cakava me yaga kina na noda vaqaqara?
2 Kila na Nomu Yalava: Kila mada e liu na nomu yalava. Gauna cava era dau tiko kina vakalevu e vale na tamata? E vei beka na vanua era na tu kina ena siga? E tiko beka e dua na siga ena loma ni macawa kei na gauna era dau taleitaka kina na vakarorogo? Ena vuavuaivinaka sara nomu cakacaka vakaitalatala ke o veisautaka na gauna kei na ituvaki e veiganiti kei ira na tiko ena nomu yalava.—1 Kor. 9:23, 26.
3 Era sa vakadinadinataka e levu na dautukutuku ni yaga na vunau ena yakavi bogi. Era sega soti ni dau osooso na itaukeinivale ena gauna oqori ra qai rawa ni vakarorogo. Ena vuavuaivinaka tale beka ga na vunau ena talevoni ena yakavi. Na yalava ni bisinisi kei na vanua era dau lakova vakalevu na lewenivanua e rawa tale ga ni dua na sala e tukuni kina na itukutuku vinaka.
4 A tuvanaka e dua na ivavakoso ena vula ni cakacaka lavotaki na vunau ena yakavi ni muanimacawa kece, vaka kina na yakavi ni Vukelulu kei na Vakaraubuka. E tuvanaki tale ga na vunau ena talevoni kei na yalava ni bisinisi. Na ituvatuva oqo e uqeta nodra cakacaka vakaitalatala na lewe ni ivavakoso ra qai via tomana tiko ga.
5 Gumatua ena Veisikovi Lesu: Kevaka e dredre nomu kunei ira na tamata e vale ena gauna o lesu kina, me dau lokuci na gauna kei taukeinivale ni oti na nomudrau veivosaki, okati kina na imatai ni gauna o a sotavi koya kina. (Maciu 5:37) Ke veiganiti, de vinaka mo kerea toka nona naba ni talevoni. Ena vakarawarawataka nomu talevi koya.
6 Ena vakalougatataka sara ga o Jiova na noda saga vagumatua meda vakasaqarai ira na tamata dina kei na noda sikovi ira lesu na tataleitaki.—Vkai. 21:5.