Na Cakacaka Marautaki Duadua
1. Na veivakabulai vakayalo cava sa vakayacori tiko ena gauna qo?
1 Dua na ka na levu ni nodra marau o ira era vakadinadinataka na veivakabulai vakayago ena imatai ni senitiuri. (Luke 5:24-26) Ia ena gauna qo eda marau nida cakava na cakacaka ni veivakabulai vakayalo. (Vkta. 22:1, 2, 17) E dau taleitaki nida wilika na kedra italanoa eso a veisautaka na nodra bula na Vosa i Jiova kei na yalona tabu! Ia e taleitaki sara nida vakaitavi ena cakacaka qo, nida vakavulica e dua ena iVolatabu qai toso vinaka na nona vuli.
2. Na cava eda na marautaka nida vakavulica e dua ena iVolatabu?
2 O cei na Kalou? Na cava e vakalaiva kina me yaco tiko ga na veika rarawa? Na cava ena cakava ena vukuda na Matanitu ni Kalou? Eda marau ni sauma na veitaro qori, vaka kina na noda raica nira marautaka na gonevuli na ka dina era vulica. (Vkai. 15:23; Luke 24:32) Ni toso na nona vuli ena rairai tekivu vakayagataka na yaca i Jiova, ena laurai na veisau ena nona isulusulu kei na isasauni, ena muduka na itovo dukadukali, qai tekivu vunau vei ira tale eso. Ke sa yacova na ivakatagedegede me yalayala qai papitaiso, sa na dua na tacida, eda na cakacaka vata tale ga. Ena vakavu marau dina nida raica e dua e vakayacora qo.—1 Ces. 2:19, 20.
3. Na cava eda rawa ni cakava me tekivutaki kina e dua na vuli iVolatabu?
3 O Rawa ni Vakaitavi Kina? Ke o via vakaitavi ena cakacaka marautaki duadua qo, kerei Jiova ena masu me dua nomu vuli iVolatabu, qai cakacakataka na ka o masulaka. (1 Joni 5:14) Meda vunau ena gauna kece ga, da qai saga ena ituvaki kece meda veisureti ena kena vulici na iVolatabu. (Dauv. 11:6) Ni o kunea e dua e tataleitaki, teivaka e lomana na sore ni ka dina qai sikovi koya lesu mo vakasuasuataka.—1 Kor. 3:6-9.
4. Nida kila ni sa lekaleka na gauna sa vo, na cava meda veisureti kina ena kena vulici na iVolatabu?
4 Era se vo tu e levu mera kania ra qai gunuva na ivalavala dodonu. O cei ena vakavulici ira ena iVolatabu me vakaceguya na nodra gadreva mera kila na Kalou? (Maciu 5:3, 6) Meda tu vakarau mada ga ni vakaitavi ena kena vakacavari na cakacaka vakavunau kei na veivakatisaipelitaki ni bera ni cava na gauna ni tatamusuki.—Aisea 6:8.