Vakayagataka na iWalewale e Laulau

1. Na cava eda vulica ena nodra veiveisautaka na lotu vaKarisito taumada na iwalewale ni nodra vunau?

¹ Era vunautaka na lotu vaKarisito taumada na itukutuku vinaka vei ira na veimatatamata, e duidui tale ga na nodra lotu. (Kolo. 1:23) E dua ga na itukutuku e kacivaki, qori na Matanitu ni Kalou. Ia e veiveisau na iwalewale ni vunau me ganiti ira na vakarorogo. Kena ivakaraitaki ni vosa o Pita vei ira na Jiu era doka vakalevu na iVolatabu, a cavuta e liu na nona vosa na parofita o Joeli. (Caka. 2:14-17) Ia raica mada na ka e volatukutukutaki ena Cakacaka 17:22-31 me baleta na nona vakamacala o Paula vei ira na kai Kirisi. Ena so na yalava nikua, era doka na tamata na iVolatabu qai sega ni dredre na noda cega na iVolatabu nida lako i veivale. Ia ena rairai gadrevi na lewa matau nida vosa vei ira era sega ni vakabauta na iVolatabu, era sega ni kauaitaka na lotu se ra sega ni lotu vaKarisito.

2. Eda na vakayagataka vakacava na ivola meda vukei ira kina era doka na iVolatabu kei ira era sega ni doka?

² Me Laulau na Nomu Solia na iVola: Ena yabaki ni cakacaka ni isoqosoqo qo, ena veisau ena veiyarua na vula na ivola me soli qai vakayagataki kina na mekesini, tikidua, kei na brochure. Ke levu mada ga ena yalava era sega ni vakabauta na iVolatabu, eda se rawa ga ni vakamacalataka vei ira e dua na ulutaga ena noda mekesini, tikidua, se brochure era na rairai taleitaka. De dua eda na sega ni wilika se cavuta e dua na tikinivolatabu ena imatai ni veisiko, ia eda rawa ni lesuvi taukeinivale ke tataleitaki da qai saga meda vukei koya me vakabauta na Dauveibuli kei na nona Vosa uqeti. Ia ke da vunau vei ira era doka na iVolatabu, eda rawa ni vakayagataka na ivola kei na iwalewale e veiganiti. Se mani ivola cava e soli ena dua na vula, eda rawa tale ga ni solia na ivola Kaya na iVolatabu se na brochure Vakarorogo Vua na Kalou se Vakarorogo Vua na Kalou mo Bula Tawamudu. E bibi ga me vakayagataki e dua na iwalewale e laulau.

3. Na sala cava e vaka kina na qele na lomadra na tamata ena noda yalava?

³ Vakarautaka na Qele: Na lomana e dua na tamata e vaka sara ga na qele. (Luke 8:15) Eso na qele ena vinakati me vakarautaki vinaka sara me rawa ni kadre qai tubu na sore ni ka dina ena iVolatabu. Era marau na dauvunau ena imatai ni senitiuri ni a vuavuaivinaka na nodra teitei ena veimataqali qele. (Caka. 13:48, 52) Ena vuavuaivinaka tale ga na noda cakacaka ke da dau kauaitaka na iwalewale ni noda vunau.