Toso Tiko ga Nida Dua na iTalatala
1. Na ivakaraitaki cava ena imatai ni senitiuri e vakaraitaka ni dodonu meda toso tiko ga nida italatala ni Matanitu ni Kalou?
1 E dodonu meda toso tiko ga na lotu vaKarisito nida italatala ni Matanitu ni Kalou. Qori na vuna e vakavulici ira tiko ga kina nona imuri o Jisu ena cakacaka vakavunau. (Luke 9:1-5; 10:1-11) Qori tale ga na vuna rau kauti Apolosa kina o Akuila kei Virisila me tomani rau, erau “vakamacalataka vakadodonu vua na sala ni Kalou.” (Caka. 18:24-26) E cakava tale ga qori o Paula vua na daukaulotu matua o Timoci, e uqeti koya me gumatua tiko ga ena veivakavulici me rawa ni “raica na tamata kece” nona toso. (1 Tim. 4:13-15) Ke dede mada ga noda qarava tiko na Turaga nida dautukutuku ni Matanitu ni Kalou, e bibi meda vakavinakataka tiko ga na iwalewale ni noda vunau.
2. Eda rawa vakacava ni vuli vei ira tale eso?
2 Vuli Vei Ira Tale Eso: Dua na sala eda vakavinakataka kina na iwalewale ni noda vunau oya noda vuli vei ira tale eso. (Vkai. 27:17) Koya gona, vakarorogo vinaka ni vakamacala tiko e dua na dautukutuku. Taroga nodra vakatutu na dautukutuku matua, rogoca vinaka na ka era tukuna. (Vkai. 1:5) Vakacava, o sega ni kila mo cakava vakacava na veisikovi lesu, tekivuna na vuli iVolatabu, se mo vakaitavi ena so tale na iwalewale ni cakacaka vakaitalatala? Mo vakaliuliu, kerea na nomu ivakatawa ni iwasewase se dua na dautukutuku matua me vakavulici iko. Nanuma tale ga ni yalo tabu i Jiova ena vakaikuritaka na ka eda rawa ni cakava, mo masulaka gona vakawasoma.—Luke 11:13.
3. Na cava meda cakava ke da sega ni namaka nona vakasalataki keda e dua?
3 Mo kua ni cudru ke dua e vakasalataki iko ena gauna o sega ni namaka kina. E kena inaki mo vakavinakataka eso na ka. (Dauv. 7:9) Me vakataki Apolosa, ciqoma na ivakasala ena yalomalumalumu kei na vakavinavinaka. Ni o cakava qori o sa vakaraitaka tiko na vuku.—Vkai. 12:15.
4. Na cava na vuna vinaka e tukuna o Jisu meda toso tiko ga kina ena noda itavi ni daukaulotu?
4 Vakalagilagi na Kalou Nida Toso: E uqeti ira nona imuri o Jisu ena vosa vakatautauvata mera vakavinakataka tiko ga na nodra cakacaka vakavunau. E vakatauvatani koya kei na vaini, o ira na nona imuri lumuti mera tabanivaini. E tukuna ni o Tamana e samaka na tabanivaini yadua e vua me “rawa ni vua vakalevu.” (Joni 15:2) Me vaka ga nona vinakata na itaukei ni loganivaini me vua vakalevu na tabanivaini, e vinakata tale ga o Jiova meda vakavinakataka tiko ga na noda vunau me rawa ni vuavuaivinaka na “vua ni tebenigusuda.” (Iper. 13:15) Na cava eda na vakila nida toso tiko ga ena noda itavi ni daukaulotu? E sauma o Jisu: “Ena vakalagilagi o Tamaqu ke dou vua tiko ga vakalevu.”—Joni 15:8.