SALA MEDA VALUTA KINA NA YALO NI VEICATI
3 | Kua ni Vakasamataka Mo Veicati
iVakavuvuli Vakaivolatabu:
“Me veisautaki na nomuni itovo ni vakavoui nomuni vakasama, moni vakadinata kina ni vinaka, e yaga, qai uasivi na loma ni Kalou.”—ROMA 12:2.
Kena iBalebale:
E bibi vua na Kalou na ka eda vakasamataka. (Jeremaia 17:10) Na yalo ni veicati e dau vu mai lomada se na noda vakasama, sega ni ka ga eda tukuna se cakava. Ena vinakati gona meda cavuraka laivi mai lomada kei na noda vakasama na yalo ni veicati. Qori na sala e rawa ni “veisautaki” kina na noda itovo da qai valuta na yalo ni veicati.
Ka o Rawa ni Cakava:
Dikeva vinaka na ivakarau ni lomamu kei na nomu rai me baleti ira eso tale, vakabibi o ira na cavutu mai na dua tale na vanua se matatamata. Mo taroga: ‘Au dau raici ira vakacava? E yavutaki noqu rai ena ka au kila me baleti ira? Se au dau veivakaduiduitaki?’ Kua ni wilika na itukutuku ena internet se sarava na iyaloyalo e uqeta na veicati se itovo kaukaua.
Ena vukei keda na Vosa ni Kalou meda cavuraka na veicati mai lomada kei na noda vakasama
E sega ni rawarawa meda lewa vinaka na ivakarau ni lomada kei na noda vakasama. Ia e rawa ni vukei keda na Vosa ni Kalou “me vakavotuya na nanuma kei na inaki ni lomada.”(Iperiu 4:12) Mo dau dikeva tiko ga na iVolatabu. Vakatauvatana na kena ivakavuvuli kei na nomu rai, qai saga mo vakamarautaka na Kalou ena ka o dau vakasamataka. Ena vukei keda na Vosa ni Kalou meda cavuraka na veicati “sa vakawakana tu” e lomada kei na noda vakasama.—2 Korinica 10:4, 5.