SALA MEDA VALUTA KINA NA YALO NI VEICATI

4 | Valuta na Veicati ena Veivuke ni Kalou

iVakavuvuli Vakaivolatabu:

“E okati ena vua ni yalo tabu na loloma, marau, vakacegu, vosovoso, yalololoma, yalovinaka, vakabauta, yalomalua, lewai koya vinaka.”—KALATIA 5:22, 23.

Kena iBalebale:

E rawa ni vukei iko na Kalou mo valuta na yalo ni veicati. Eda na sega ni rawa ni bucina vakataki keda na itovo vinaka, ena rawa ga qori ena veivuke ni yalo tabu. Meda kua gona ni saga ga vakataki keda meda valuta na veicati. Meda nuitaka na veivuke ni Kalou. Ke da cakava qori, eda na vakadinadinataka na ka e tukuna na yapositolo o Paula: “Au rawata na ka kece ena vuku i koya e vakaukauataki au.” (Filipai 4:13) Eda na rawa tale ga ni kaya: “Ena vukei au o Jiova.”—Same 121:2.

Ka o Rawa ni Cakava:

“E veisautaki au o Jiova meu yalomalua.”—WALDO

Masuti Jiova qai kerea vagumatua nona yalo tabu. (Luke 11:13) Kerei koya me vukei iko mo bulataka na itovo vakalou. Vulica na ka e kaya na iVolatabu me baleta na itovo ena vakaotia na veicati, me vaka na loloma, vakacegu, vosovoso, kei na lewa vinaka. Vakasamataka na sala mo bulataka kina na itovo qori. Mo veimaliwai tale ga kei ira na saga tiko mera vakaraitaka na itovo qori. Era na uqeti iko ena “loloma kei na caka vinaka.”—Iperiu 10:24.

iTalanoa Dina—WALDO

Valuta na iTovo Voravora

E voravora nona isususu o Waldo, qori e uqeti koya me dau veicati. E kaya: “Keimami dau veibuturaki kei ira na volitaki wainimategaga. . . Dua na gauna era sauma e dua na daulaba me vakamatei au. Au mavoa ni a suaki au na daulaba qori, ia au dro bula.”

E sega ni taleitaka o Waldo nona vulica o watina na iVolatabu kei ira na iVakadinadina i Jiova. E kaya: “Au sevaki ira qai dau vosa vakacacataki ira. Ia era sega ni bau sauma lesu.”

Toso na gauna, e vulica tale ga na iVolatabu o Waldo. E kaya: “E sega ni rawarawa meu bulataka na ka au vulica. Au nanuma niu na sega tu ga ni lewa rawa na noqu cudru.” Ia e uqeti koya e dua na ka e vulica ena iVolatabu.

E kaya o Waldo: “A kerei au ena dua na siga noqu qasenivuli ni iVolatabu o Alejandro meu wilika na Kalatia 5:22, 23. E kaya o Alejandro niu na sega ni rawa ni bulataka na itovo qori ena noqu kaukaua ga, ena gadrevi na veivuke ni yalo tabu ni Kalou. Na ka dina qori e veisautaka sara ga na noqu rai!”

E vakararavi ena veivuke ni Kalou o Waldo me valuta kina na nona dau cati ira eso tale. E kaya: “Era sega sara ga ni vakabauta na noqu itokani, kei ira na wekaqu ni sa veisau na noqu ivakarau ni bula. E veisautaki au o Jiova meu yalomalua.”