Mo Vakatotomuria na Rai i Jiova kei Jisu

1-2. Na cava e okati ena noda lomani Jiova, e vakaraitaka vakacava qori o Jisu?

“MO LOMANI Jiova na nomu Kalou ena lomamu taucoko, ena nomu vinaka taucoko, ena nomu kaukaua taucoko, kei na nomu vakasama taucoko.” (Luke 10:27) Qori na ka e vakabibitaka o Jisu ena Lawa e soli vei Mosese. Dikeva noda lomani Jiova e okati kina na lomada, ya na ka eda vinakata, noda gagadre, kei na ivakarau ni lomada. E wili tale ga kina noda veiqaravi ena noda vinaka taucoko, kei na noda kaukaua taucoko se noda igu. Kena ikuri, e okati kina noda vakasama, qori na ivakarau ni noda rai. E macala nida na sega tu ga ni kila vinaka sara na rai i Jiova. Ia eda rawa ni kila na nona rai nida vulica “na rai i Karisito” baleta ni ucui Tamana vinaka ena ivakarau ni nona rai.​—1 Kor. 2:16.

² E lomani Jiova o Jisu ena nona vakasama taucoko. E kila vinaka na inaki ni Kalou me baleti koya qai gumatua ni cakava, e kila mada ga ni na rarawa kina. E vakaliuca o Jisu na loma i Tamana, e sega ni vinakata e dua na ka me tarova nona cakava qori.

3. Na cava e vulica vei Jisu na yapositolo o Pita? Cava e tukuna mera cakava na lotu vaKarisito? (1 Pita 4:1)

³ E dua na gauna marautaki vei Pita kei ratou na vo ni yapositolo me ratou veimaliwai kei Jisu, me ratou vulica tale ga na ivakarau ni nona rai. Ni vola na imatai ni nona ivola uqeti vakalou, e tukuna vei ira na lotu vaKarisito mera vakaiyaragitaki ira tale ga ena rai vata ga a tu vei Karisito. (Wilika 1 Pita 4:1.) E vakayagataka o Pita e dua na vosa era dau vakayagataka na mataivalu ni vola: “Moni vakaiyaragitaki.” Ke ra vakatotomuria gona na lotu vaKarisito na rai i Jisu, era na vakarau tu mera valuta na gagadre ni via caka ca, kei na vuravura e lewa tu o Setani.​—2 Kor. 10:​3-5; Efeso 6:12.

4. E uqeti keda vakacava na ulutaga qo meda muria na ivakasala i Pita?

⁴ Eda na dikeva tiko na ivakarau ni rai nei Jisu kei na sala eda na vakatotomuria kina. Eda na vulica ena nona ivakaraitaki na sala meda (1) vakatotomuria na rai i Jiova, ni na rawa ni duavata kina noda rai, (2) meda yalomalumalumu, kei na (3) meda yalomatua nida vakararavi vei Jiova ena masu.

VAKATOTOMURIA NA RAI I JIOVA

5. Na gauna cava e sega ni vakaraitaka kina o Pita na rai i Jiova?

⁵ Dikeva ni dua na gauna a sega ni vakaraitaka o Pita na rai i Jiova. Sa tukuna oti o Jisu vei ratou nona yapositolo ni dodonu me lako i Jerusalemi, ena soli yani vei ira na iliuliu ni lotu e kea, ena vakararawataki qai vakamatei. (Maciu 16:21) E kila o Pita ni o Jisu na Mesaia yalataki ena vakabulai ira na Isireli. Ia e rairai dredre me vakabauta ni na vakatara o Jiova me vakamatei o Jisu. (Maciu 16:16) E mani kauti Jisu vakatikitiki o Pita qai kaya vua: “Me kua ni va qori nomuni rai Turaga, ena sega sara ni yaco qori vei kemuni.” (Maciu 16:22) A sega ni tautauvata na rai nei Pita kei na rai nei Jisu, ni a sega ni vakaraitaka na rai nei Jiova.

6. E vakaraitaka vakacava o Jisu ni salavata kei na rai i Jiova nona rai?

⁶ E salavata vinaka na rai nei Jisu kei na rai nei Tamana vakalomalagi. E tukuna vei Pita: “Lako tani i dakuqu, Setani! O iko na dau veivakatarabetaki, ni sega ni tiko vei iko na vakasama ni Kalou, na vakasama ga vakatamata.” (Maciu 16:23) Kena irairai ni vinaka na inaki nei Pita, ia e sega ni vakadonuya o Jisu na nona ivakasala. Na cava eda vulica? A sega ni nona inaki o Jiova me tu vakasuka o Jisu se nanumi koya ga. E vulica ena gauna qori o Pita e dua na ka bibi, ya me tiko vua na rai ni Kalou.

7. E veisautaka vakacava o Pita nona rai me salavata kei na rai i Jiova? (Raica ena waqana.)

⁷ Toso na gauna, e vulica o Pita me tiko vua na rai i Jiova. Kena ivakaraitaki, ni sa gauna i Jiova mera okati na lewe ni Veimatanitu tawacili mera tamata ni Kalou, e lesi o Pita me vunau vei Konilio, na imatai ni kai Veimatanitu me lotu vaKarisito. Era sega ni dau veiyaloni na Jiu kei ira na lewe ni Veimatanitu, e sega ni kurabuitaki ni vinakati me vakarautaki koya o Pita ena nona ilesilesi qori. Ni kila na rai ni Kalou me baleti ira na kai Veimatanitu, e veisautaka nona rai. Cava e yaco? A “sega tale ni lomalomarua” o Pita ni kerei me lako. (Caka. 10:​28, 29) E vunau vei Konilio kei na nona vuvale ra qai papitaiso.​—Caka. 10:​21-23, 34, 35, 44-48.

8. Eda na vakaraitaka vakacava ni tiko vei keda na rai i Jiova? (1 Pita 3:8)

⁸ Oti tale e vica na yabaki, e uqeti ira nona itokani lotu vaKarisito o Pita me ‘duavata nodra rai.’ (Wilika 1 Pita 3:8.) Nida vakaraitaka na rai i Jiova e tu ena nona Vosa, ena duavata noda rai kei ira na tacida. Kena ivakaraitaki, e uqeti ira nona imuri o Jisu mera vakaliuca na Matanitu ni Kalou. (Maciu 6:33) Ni vakasamataka tiko qori e dua na dautukutuku ena nomu ivavakoso, de dua ena vakatulewataka me painia se veiqaravi vakatabakidua. Meda kua sara ni vakayalolailaitaki koya, ia eda na uqeti koya me sasagataka nona isausau qai tokoni koya.

VULICA MEDA YALOMALUMALUMU

9-10. E vakaraitaka vakacava o Jisu ni yalomalumalumu?

⁹ Ena bogi me vakamatei kina o Jisu, e vakavulici Pita kei ratou na vo ni yapositolo ena bibi ni yalomalumalumu. Ni bera qori, a talai Pita kei Joni me rau vakarautaka na ka e vinakati ena iotioti ni nodratou kana vata ni bera ni mate. Kena irairai ni rau vakadeitaka tale ga me tiko na beseni kei na tauwelu me vui kina na yavadra na vulagi ni bera na kana. Ia o cei ena yalomalumalumu me vuya na yavadra na kena vo?

¹⁰ A sega tale ni tu suka o Jisu me cakava qori, e vakaraitaka ni yalomalumalumu. Ratou kidroa sara ga nona yapositolo ni cakava na itavi ni dauveiqaravi. E luvata nona isulu e sau, vesuka e tolona na tauwelu, e livia na wai ena beseni qai vuya na yavadratou. (Joni 13:​4, 5) A rairai dede nona vuya na yavadratou na 12 na yapositolo wili kina o Jutasa, ena qai soli koya yani. Ia e yalomalumalumu o Jisu me qarava na itavi qori. Oti e vosovoso me vakamacalataka: “Dou kila na ka au cakava vei kemudou? Dou kaya niu ‘Qasenivuli,’ niu ‘Turaga,’ e donu vinaka qori, niu Qasenivuli, au Turaga tale ga. Keu vuya gona na yavamudou niu Turaga qai Qasenivuli, e dodonu mo dou veivuiyava tale ga.”​—Joni 13:​12-14.

11. E vakaraitaka vakacava o Pita ni sa vulica me yalomalumalumu? (1 Pita 5:5) (Raica tale ga na iyaloyalo.)

¹¹ E vuli o Pita ena yalomalumalumu nei Jisu. Ni sa lesu i lomalagi o Jisu, e cakamana o Pita ni vakabula e dua na tagane e sucu lokiloki. (Caka. 1:​8, 9; 3:​2, 6-8) Sega ni bera nira sa toso mai e dua na ilala levu. (Caka. 3:11) Me vaka ni vakabibitaki ena isususu nei Pita na rogo kei na itutu, vakacava e vinakata me vakacaucautaki ena gauna qori? A sega ni vinakata o Pita me vakacaucautaki, ia e vakacaucautaki Jiova ga kei Jisu ni kaya: “Na neirau vakabauta ga na [yaca i Jisu], e vakaukauataki kina na tagane oni raica qo, oni kila tale ga.” (Caka. 3:​12-16) Na vosa e vakayagataka o Pita ni vola vei ira na lotu vaKarisito mera vakaraitaka na yalomalumalumu, eda nanuma kina na gauna e vesuka kina e tolona o Jisu na tauwelu qai vuya na yavadratou na yapositolo.​—Wilika 1 Pita 5:5.

12. Eda na vakaraitaka tiko ga vakacava na yalomalumalumu me vakataki Pita?

¹² Eda na vakatotomuria na ivakaraitaki nei Pita nida vulica meda yalomalumalumu. Nanuma tiko na yalomalumalumu dina e sega ni okati ga kina na ka eda tukuna. Na vosa e vakayagataka o Pita e vakadewataki tiko me “yalomalumalumu” e okati kina na ivakarau ni noda rai me baleti keda kei ira eso tale.” Eda caka vinaka vei ira eso tale nida lomani Jiova, eda lomani ira tale ga na tamata, sega nida vinakata meda qoroi kina. Eda vakaraitaka na yalomalumalumu dina nida marautaka noda qaravi Jiova kei ira na tacida, ke ra sega mada ga ni raica eso tale na ka eda cakava.​—Maciu 6:​1-4.

MEDA “YALOMATUA”

13. Vakamacalataka na ka e okati ena “yalomatua.”

¹³ Na cava e okati ena “yalomatua”? (1 Pita 4:7) Nida lotu vaKarisito yalomatua, eda na saga ena noda vinaka taucoko me yavutaki noda vakatulewa ena rai i Jiova. Eda kila tiko ni bibi duadua noda veiwekani kei Jiova. Ena donu noda rai me baleti keda, eda kila tale ga ni levu na ka eda sega ni kila. Kena ikuri, eda na vakaraitaka nida nuitaki Jiova nida masuti koya wasoma.a

14. Na gauna cava a sega ni vakararavi kina vei Jiova o Pita?

¹⁴ Ena iotioti ni bogi me mate kina o Jisu, e vakasalataki ratou nona tisaipeli: “Dou na tarabe kece ena vuku ni ka ena yacovi au ena bogi nikua.” E nuidei o Pita ni kaya: “Ke ratou tarabe kece qo ena vukumuni, au na sega vakadua ni tarabe!” Ena bogi qori e vakasalataka e vica nona tisaipeli o Jisu: “Dou yadra tiko, dou masu tiko ga.” (Maciu 26:​31, 33, 41) Ke a muria o Pita na ivakasala qori, de dua ena yaloqaqa me tukuna ni tisaipeli nei Jisu. Ia e cakitaka nona Turaga o Pita qai rarawa kina vakalevu.​—Maciu 26:​69-75.

15. E vakaraitaka vakacava o Jisu na yalomatua ena iotioti ni nona bogi e vuravura?

¹⁵ E nuitaki Jiova vakatabakidua o Jisu. E uasivi, ia e dau masu wasoma. Qori e yaloqaqa kina me cakava na ka e vinakata o Jiova. (Maciu 26:​39, 42, 44; Joni 18:​4, 5) E macala ni na sega vakadua ni guilecava o Pita nona dau masu wasoma o Jisu.

16. E vakaraitaka vakacava o Pita na yalomatua? (1 Pita 4:7)

¹⁶ Toso na gauna, e vulica o Pita me nuitaki Jiova vakalevu ena masu. Ni vakaturi oti o Jisu, e vakadeitaki Pita kei ratou na vo ni yapositolo ni na sobuti ratou na yalo tabu me rawa ni ratou qarava nodratou ilesilesi ni vunau. Ia e tukuna o Jisu me ratou wawa tiko e Jerusalemi me yacova na gauna qori. (Luke 24:49; Caka. 1:​4, 5) Na cava e cakava o Pita ni wawa tiko? E “masu tiko ga” kei ira nona itokani lotu vaKarisito. (Caka. 1:​13, 14) Dua na gauna e muri ni vola na imatai ni nona ivola, e uqeti ira nona itokani lotu vaKarisito mera yalomatua qai nuitaki Jiova ena masu. (Wilika 1 Pita 4:7.) E vulica o Pita me nuitaki Jiova, e vakaraitaka tale ga ni duru ni ivavakoso ni dau vakayaloqaqataki ira na mataveitacini.​—Kala. 2:9.

17. Na cava meda cakava tiko ga? (Raica tale ga na iyaloyalo.)

¹⁷ Me rawa nida yalomatua, e bibi meda masuti Jiova wasoma. Eda kila ni bibi meda masuti Jiova tiko ga ke da nanuma mada ga ni rawarawa na ka me caka. Sa qai bibi sara meda kerea na veidusimaki i Jiova nida vakatulewataka eso na ka bibi qai nuitaka ni kila o koya na ka e vinaka vei keda.

18. Eda na veisautaka vakacava noda rai me salavata kei na rai i Jiova?

¹⁸ Eda vakavinavinakataka ni buli keda o Jiova me rawa nida vakaraitaka na nona itovo. (Vkte. 1:26) E macala ni na sega ni uasivi noda vakatotomuri Jiova. (Aisea 55:9) Ia me vakataki Pita, e rawa nida veisautaka noda rai me tiko vei keda na rai i Jiova. Eda na cakava qori nida vulica meda vakatotomuria tiko ga na rai ni Kalou, meda yalomalumalumu, meda vakaraitaka tale ga na yalomatua.