E Tiko e Vei na Tevoro?

Kena iSau Vakaivolatabu

Ni kabula vakayalo na Tevoro, e tiko ena dua na vanua eda sega ni raica. Qo e sega ni o eli, me lai vakararawataki ira kina na tamata ca, me vaka e laurai ena iyaloyalo qo.

“iValu mai lomalagi”

Ena loma ni dua na gauna, e vakadonui me veilakoyaki voli mai lomalagi o Setani na Tevoro, me bau maliwai ira mada ga na agilosi yalodina era lai tu ena mata ni Kalou. (Jope 1:6) Ia sa kaya makawa tu na iVolatabu ni na tubu na “ivalu mai lomalagi,” mani sega ni vakadonui me tiko mai kea o Setani qai ‘biu tani i vuravura.’ (Vakatakila 12:7-9) Ni laurai na veika e yaco tiko e vuravura, ni cakacakataki tale ga na gauna vakaivolatabu e vakadeitaka ni sa yaco oti mai lomalagi na ivalu qo. Ia na Tevoro sa tiko qo e vuravura.

Kena ibalebale ya ni vakaitikotiko na Tevoro ena dua ga na vanua ena noda vuravura? Kena ivakaraitaki, e tukuni ni tiko na “idabedabe vakaturaga i Setani” ena koro levu o Perikamo, na “vanua e tiko kina o Setani.” (Vakatakila 2:13) E macala mai na matavosa qori ni vakabibitaki ena koro levu ya na sokalou vei Setani. E kaya na iVolatabu ni lewa tiko na Tevoro “na matanitu kece e vuravura.” Koya gona ena sega ni vakaitikotiko ena dua ga na vanua e vuravura, sa tiko sara ga e vuravura taucoko.​—Luke 4:​5, 6.