RA TAROGA NA ITABAGONE
Sala Cava Meu Kua ni Bucina Kina na Rai Cala?
Cava nomu rai me baleti iko?
Donu noqu rai me baleta na gauna se bera mai
“Au saga meu mamarau, kua tale ga ni cudrucudru. Au taleitaka meu matadredredre qai marau e veisiga.”—Valerie.
Nanuma ni na yaco tu ga na ka ca
“Au na vakatitiqataka ke dua mada ga na ka vinaka e yaco.”—Rebecca.
Kua ni namaka vakasivia na ka
“Au na rarawa ke sega ni yaco na ka au namaka. Au dau lomabibi keu nanuma ni na yaco tu ga na ka ca. Au na marautaka na ka au cakava e veisiga keu kua ni namaka vakasivia na ka.”—Anna.
Vuna mo kauai kina
E kaya na iVolatabu “o koya e marau na lomana e kana magiti tiko ga.” (Vosa Vakaibalebale 15:15) Koya gona, era na mamarau o ira na saga me donu tiko ga nodra rai, ra sega tale ga ni lomaleqataka vakasivia na ka. Ena levu tale ga nodra itokani. E sega ni dua ena via veimaliwai kei ira e cala tu ga nodra rai.
O ira e donu tu ga nodra rai, era sotava tale ga na ituvaki dredre. Kena ivakaraitaki:
Rogoca wasoma ena tabana ni itukutuku na ivalu, vakacaca ni batikadi kei na basulawa.
De dua ra sotava tiko na leqa ena nodra vuvale.
Tiko tale ga nodra malumalumu, era saga mera cakacaka kina.
Rairai vakararawataki ira nodra itokani ena ka era kaya se cakava.
Kua ni lecava qori, se kauai kina vakalevu. Saga me veiraurau nomu rai. O na sega ni vakasamataka vakalevu na ka tawayaga, ia o na raica na veika e yaco tu nikua me ivakarau ni bula eda sa donuya tu. Ena sega tale ga ni vakavuna nomu lomabibi.
Rawa ni o vosota na ituvaki dredre qai nuidei ni na vinaka tale
Ka o rawa ni cakava
Rai donu baleta nomu malumalumu.
E kaya na iVolatabu: “E sega ni dua na tamata e vuravura ena cakava tu ga na ka e donu e veigauna, qai sega ni dua nona cala.” (Dauvunau 7:20, iVolatabu na Good News Translation). O na cala ena so na gauna, e tiko tale ga nomu malumalumu. Ia kua ni nanuma ni o sa tawayaga.
Sala mo kua ni namaka kina vakasivia na ka: Vakavinakataka tiko ga nomu itovo, ia nanuma tiko ni o sega ni uasivi. E kaya e dua na cauravou o Caleb: “Au sega ni via vakasamataka tiko noqu cala. Au saga ga meu vuli kina, qai vakavinakataka.”
Kua ni veivakatauvatani.
E kaya na iVolatabu: “Meda kua ni dokadoka ni vakavuna na veiqati se veivuvutaki.”(Kalatia 5:26) E rawa ni vakacudrui iko ke o sarava ena internet na soqo o sega ni sureti kina. Rawa sara ga ni vakavuna me kemu meca tale na nomu itokani voleka.
Sala mo kua ni namaka kina vakasivia na ka: Mo namaka ni o na sega ni sureti ena soqo kece. Ena sega tale ga ni laurai kece ena internet na kena itaba e dua. E kaya e dua na itabagone o Alexis: “Na ka ga e marautaki e biu vakalevu ena internet, sega ni ka e caka wale tu ga se ivakarau ni bula e veisiga.”
Guta na veiyaloni ena nomu vuvale.
E kaya na iVolatabu: “Ke rawa, saga moni veiyaloni kei ira na tamata kece.” (Roma 12:18) O sega ni lewa na ka era cakava eso tale, ia o rawa ni lewa na ivakarau ni nomu rai. Rawa tale ga ni o saga na bula veiyaloni.
Sala mo kua ni namaka kina vakasivia na ka: Kua ni vakavuna na veileti ena nomu vuvale, saga ga na bula veiyaloni me vaka nomu dau cakava vei ira nomu itokani. Kaya e dua na itabagone o Melinda: “Sega ni dua e uasivi, tiko na gauna ena veivakacudrui na ka eda kaya se cakava. Ia e vakatau sara ga vei keda noda saga na bula veiyaloni.”
Dau vakavinavinaka.
E kaya na iVolatabu: “Me laurai na nomuni vakavinavinaka.” (Kolosa 3:15) Ni o dau vakavinavinaka, o na kauaitaka ga na veika vinaka o sa cakava tiko, sega ni ka ena vakamuai iko cala.
Sala mo kua ni namaka kina vakasivia na ka: Kila na nomu leqa, ia kua ni vakalecalecava na ka vinaka o dau cakava. E tukuna e dua na goneyalewa o Rebecca: “Dua tiko noqu ivola au dau vola kina na ka vinaka au cakava ena dua na siga. Au dau vinakata me tiko eso na ka vinaka meu vakananuma e veisiga.”
Dikevi ira nomu itokani.
E kaya na iVolatabu: “Ni kua ni vakaisini kemuni. Na ilala ca e vakacacana na itovo vinaka.” (1 Korinica 15:33) Ke o veimaliwai vakalevu kei ira na dau vakalelewa, veivakadiloi, se vosakudrukudru o na rawa sara ga ni vakataki ira.
Sala mo kua ni namaka kina vakasivia na ka: Era na sotava tale ga nomu itokani na veika dredre, rawa ni vakavuna mera rarawa se lomabibi. Saga mo tokoni ira, ia kua ni kauai vakalevu ena nodra leqa. Kaya e dua na goneyalewa o Michelle: “Kua ni veimaliwai vakalevu kei ira na dau cala tu ga nodra rai.”
Wilika eso na ivukevuke yaga
Eda bula tu qo ena gauna e vakatoka na iVolatabu me “iotioti ni veisiga, ena vakilai kina e levu na ka dredre.” (2 Timoci 3:1) Vakacava e rawarawa me donu tu ga nomu rai ena vuravura e rui levu kina na veika ca? Wilika na ulutaga, “Ena Oti na Rarawa?”