Vakacava Keu Sega ni Taleitaki Vakalevu?

“Dodonu mo taleitaka na ka era cakava eso tale, ke sega o na galili, sega ni vakainaki nomu bula. O na sega ni kauaitaki qai tu taudua.”—Carl.

E levu na itabagone e va qori nodra rai. Ia eso era saga ena nodra vinaka taucoko me kua ni yaco na ka e vakamacalataka qori o Carl. O na cakava tale ga ya? O na vulica ena ulutaga qo na ka mo cakava ena ituvaki qori.

• Cava era vinakata kina eso mera taleitaki?

• Ka mo kila

• Ka era kaya nomu icaba

Cava era vinakata kina eso mera taleitaki?

• Levu era vinakata mera taleitaki. “Au raica ena internet na kedra itaba noqu ilala, era gade tu ra qai sega ni sureti au. Au lai veinanuyaka ke dua na noqu cala, au nanuma kina nira sega ni taleitaki au.”—Natalie.

  VAKASAMATAKA MADA: O sa bau sotava oti na ituvaki qori, era sega ni taleitaki iko e dua na ilala? Cava o rawa ni cakava mo taleitaki kina vei ira na ilala qori?

• Era sega ni vinakata mera duatani. “Rau sega ni vinakata noqu itubutubu meu vaka talevoni. Nira taroga na gone noqu naba, au tukuna ni sega noqu talevoni, era kaya: ‘Cava? O sa yabaki vica?’ Niu tukuna vei ira niu yabaki 13, dua na ka nodra vakalomalomani au.”—Mary.

  VAKASAMATAKA MADA: Cava eso na lawa rau biuta na nomu itubutubu e vakavuna mo duatani kina? Cava o rawa ni cakava?

• Era sega ni vinakata mera vakalialiai se vakasagai. “Levu na gone e koronivuli era sega ni taleitaki ira e duatani nodra ivukivuki, ivosavosa, se na ka era vakabauta. Ke o sega ni taleitaki, levu era na vakasagai iko.”—Olivia.

  VAKASAMATAKA MADA: O sa bau vakacacani ni o sega ni taleitaki? Cava o cakava ena ituvaki qori?

• Era vinakata na ilala se itokani. “Au saga meu vakataki ira noqu itokani, vakatotomuria nodra ivakarau ni vosa, dredrevaka na ka e sega ni lasa, tomani ira tale ga nona vakalialiai e dua na gone, keu kila mada ga ni cala qori.”—Rachel.

  VAKASAMATAKA MADA: E bibi dina mera taleitaki au na noqu icaba? Vakacava au cakava eso na veiveisau ena noqu ivakarau mera taleitaki au kina?

Ka mo kila

• Rawa ni veivakaleqai nomu vakatotomuri ira eso tale. Na vuna? Levu era na kila ni vakarairai tu ga na ka o cakava. E nanuma lesu o Brian e yabaki 20, “Era sega ni taleitaki au noqu icaba ke vakarairai na ka au cakava. Au vulica meu kua ni vunitaka na kequ roka dina, era na kila kina eso tale ke va qori noqu ivakarau.”

  KA O RAWA NI CAKAVA: Vakasamataka vinaka na ka o vakaliuca. E kaya na iVolatabu: “Moni vakadeitaka kina na veika era bibi sara.” (Filipai 1:10) O rawa ni taroga, ‘E bibi meu taleitaki vei ira e duidui na nodra ivakarau, se meu vakaraitaka o na kequ roka dina?’

  “E sega na betena ke da saga meda vakataki ira eso tale. Era na sega ni taleitaki iko kina eso tale, ena sega ni vukei iko tale ga qori.”—James.

• Rawa ni vakaleqa na ka o kilai tani kina. O na cakava tu ga na ka mo “vakamarautaki ira kina eso tale,” me rawa nira taleitaki iko. E nanuma lesu e dua na cauravou o Jeremy, “Au dau cakava na ka mera taleitaki au kina eso tale, ke vakaleqai mada ga kina na kequ irogorogo. Era lewai au kina eso tale me vaka ga na matakau veikauyaki.”

  KA O RAWA NI CAKAVA: Kila na ka e bibi vei iko, qai cakava sara. Kua ni veiveisau na nomu itovo se ivakarau me tautauvata kei ira nomu icaba. Sa rauta me kaya kina na iVolatabu: “Kua ni muria na ka era cakava e levu.”—Lako Yani 23:2, Holy Bible—Easy-to-Read Version.

  “Au tekivu cakava na ka era duavata kina eso tale, me vaka na ivakatagi, qito, isulusulu, iyaloyalo, isasauni . . . Au via vakataki ira sara ga. Era lai kila kina eso tale wili tale ga kina o yau, ni vakarairai ga na ka au cakava. E vakavuna meu rarawa qai galili, au sega kina ni kilai au tale. Au sega ni kila na ka au taleitaka se nanuma. Au vulica kina ni levu era na sega ni taleitaki iko. E sega ni kena ibalebale mo sa kua ni vakaitokani, ena taura na gauna mo bucina na itokani.”—Melinda.

• Vakacacana nomu itovo. E vakadinata qori e dua na gonetagane o Chris me baleti tavalena. E kaya: “Me taleitaki, e tekivu cakava eso na ka e sega ni matau kina me vaka na vakayagataki ni wainimate gaga. E bobula sara kina, e voleka ni vakaleqa tale ga nona bula.”

  KA O RAWA NI CAKAVA: Kua ni vakailala kei ira e sega ni vinaka na nodra itovo se ivosavosa. E kaya na iVolatabu: “O koya e vakailala kei ira na vuku ena vuku, ia o koya e veitokani kei ira na lialia ena tini ca.”—Vosa Vakaibalebale 13:20.

  “Eso na gauna ena vinaka mo vakuai iko mo rawa ni taleitaki. Ia kua ni cakava qori ke o kila ni na vakaleqai iko. O ira ga era kauaitaki iko dina, era na taleitaki iko.”—Melanie.

  Vakatutu: Ni o veikilai kei ira eso se itokani vou, kua ni kauai ga ena ka drau duavata kina. Saga mo raica tale ga ke tautauvata na ka drau vakaliuca me vaka na ka vakayalo, itovo savasava, kei na ka drau vakabauta.