Au Rawai Watiqu Niu “Sega Mada ga ni Tukuna e Dua na Ka”

Au sucu ena 1952, e Romania. O tinaqu e iVakadinadina i Jiova ia e malumu tu vakayalo, au sega gona ni dau gole ena soqoni vaKarisito. A vakarurugi tale tu ga ena matanitu vaKominisi o Romania, e vakatabui kina na tabaki ni ivola vakaivolatabu kei na cakacaka vakavunau. Niu tubucake tiko, au sega ni kilai Jiova se ka e kaya na iVolatabu. Ia ena 1988 keirau tiko kei watiqu o István ena siti o Satu-Mare, e qai yaco e dua na ka e veisautaka sara ga noqu bula.

Au Vakadonuya Meu Vuli iVolatabu

Dua na siga e gole mai o tinaqu, qai kaya: “Au na gole tiko vei Na levu, daru lako vata? Oti daru qai lai gade tu.” Ni sega tale ni dua na ka au cakava, au mani vakadonuya.

Ni keirau yaco yani, e caka tiko ena vale nei Na levu na soqoni ni iVakadinadina i Jiova, ratou qai tiko kina e rauta ni le ciwa. Qori e uqeti Na me toso tale vakayalo. E tarai au sara ga na ka au rogoca ena siga ya, au sega tale ga ni guilecava rawa.

Oti na soqoni e gole mai o koya e liutaka tiko na soqoni me vakabula vei au. E kaya: “Na yacaqu o János. Au raica ni o vakarorogo vinaka tiko. O taleitaka na ka o rogoca nikua?” Au tukuna vua ni se qai imatai ni gauna ya meu tiko kina ena soqoni, ia au via tiko tale kina. Oti e taroga sara: “O vinakata mo vulica na iVolatabu?” Au mani vakadonuya nona veisureti, niu vakila na Kalou e vagolei au vei ira qo.

Ena siga tarava, e veikilaitaki au o János vua e dua na marama o Ida a qai vakavulici au ena iVolatabu. Ia au leqataka na ka ena cakava o watiqu ke kila niu vulica tiko na iVolatabu kei ira na iVakadinadina i Jiova. E vakavica noqu saga meu tukuna vua niu sa vuli tiko, ia e sega ni duavata kei au. Au kila ni sega ni taleitaka na ka au cakava tiko.

Ia au tomana tiko ga noqu vulica na iVolatabu, au qai papitaiso ena Okosita 1989. Oti e va na vula, e kasura na veiliutaki vaKominisi e Romania, qai vakamatei na kena iliuliu.

Levu na Veitusaqati

Ni veisau na veiliutaki sa soli tale ga vei keimami e levu na galala. Sa rawa ni keimami soqoni vata qai vunau ena galala. Ia na galala qori au sotava kina e levu na veitusaqati. E kaya vei au o watiqu: “Au sega ni via kila na ka o vakabauta, mo kua ga ni lai vunau e veivale.”

Ia au sega ni via soro, au vunau tiko ga. (Cakacaka 4:20) Au saga meu qaseqasetaka na ka au cakava. Ia dua na siga e raici au e dua na itokani nei watiqu niu vunau tiko e veivale, e qai lai tukuna vua. Niu yaco yani i vale, e kailavaki au mai o watiqu: “O vakamaduataki au kei na nodatou vuvale!” E biuta na isele e domoqu qai kaya ni na vakamatei au keu vunau tiko ga.

Au saga meu vosa vakamalua qai vakadeitaka vua niu na lomani koya tiko ga. Qori e via malumu kina na nona cudru. Ia dua na siga a caka nona lotu ni vakamau e dua na wekana voleka, au qai sega ni gole. Dua na ka nona cudru o watiqu qai vosavakacacataki au.

E 13 na yabaki noqu vosota voli mai nona dau cudru o watiqu. Na gauna kece qori, e vakarerei au me keirau veisere. Eso na gauna e lokata na katuba qai sega ni vakacurumi au i vale. Eso tale na gauna e dau kaya meu taura noqu iyaya meu gole.

Ia dua na ka e vukei au meu vosota na ituvaki vakaloloma qori, ya noqu dau masuti Jiova qai kerea me vukei au meu lomavakacegu. Io au vakila sara ga na nona veitokoni. (Same 55:22) Era dau tokoni au tale ga na mataveitacini ena ivavakoso. Era vakayaloqaqataki au na qase ni ivavakoso, kei ira na tacida yalewa matua meu yalodina tiko ga ena noqu veiqaravi. Era dau tukuna vei au na ka e kaya na iVolatabu me baleti ira na yalewa vakawati era vagolei watidra mai na dina, nira “sega mada ga ni tukuna e dua na ka.” Oya nira dei ra qai yalodina tiko ga vei Jiova. (1 Pita 3:1) Toso na gauna, au vakadinata na veivosa qori.

Yaco na Veisau

Ena 2001, a tauvi strouk o watiqu qai sega ni rawa ni taubale. Rauta ni dua na vula nona tu e valenibula, qai vica vata na macawa nona tiko ena vanua e qaravi kina na ramusu ni sui. Na gauna kece qori au toka ga e yasana, vakani koya, vosa vua, au vakarautaka tale ga na ka kece e gadreva.

Era dau sikovi watiqu na mataveitacini, qai vakadinadinataka sara ga nodra loloma kei na nodra veikauaitaki. E levu era bole mera veivuke ena cakacaka e vale. Era qai tu vakarau na qase ni ivavakoso mera veivakacegui qai tokoni keirau.

E tarai watiqu sara ga na veisiko va qori, e vaka me lai maduataka kina na veika e dau cakava tu vei au. E raica tale ga ni sega ni dua nona itokani me bau sikovi koya e valenibula. Ni suka mai vale, e kaya: “Au via vulica na iVolatabu, au vinakata tale ga meu iVakadinadina i Jiova.” Dua na ka na noqu luluvu ena marau!

Ena Me, 2005 e papitaiso o István. Me vaka ni sega ni rawa ni taubale, e bili ena nona idabedabe qiqi volekata na vanua ni papitaiso. Era qai keveti koya eso na tacida me papitaiso. E mai dua sara na dautukutuku gugumatua. Au na sega vakadua ni guilecava na gauna marautaki keirau dau gole kina ena cakacaka vakavunau. E veivakurabuitaki dina! Au sega ni tadra na turaga a tusaqati au ena vuku ni ka dina ni Vosa ni Kalou, keirau sa mai veitomani ena marau ni wasea vei ira eso tale na itukutuku vinaka!

E lomani Jiova vakalevu o István, qai vakayagataka nona gauna me vulica qai cavuqaqataka na tikinivolatabu. E taleitaka me veivosakitaka qori kei ira na mataveitacini ena ivavakoso, qai dau vakayaloqaqataki ira kina.

E tauvimate bibi tiko ga o watiqu. Oti e vica na gauna na kena tauvi koya na strouk, sa sega ni vosa qai davo tu ga ena idavodavo. Vakacava e tarova qori nona qaravi Jiova? Sega! E tomana tiko ga nona wilika qai vulica na iVolatabu ena nona vinaka taucoko. Nira veisiko mai nona itokani e vakayagataka na iyaya vakalivaliva e toka na kena screen me veivosaki kei ira, e vakayaloqaqataki ira tale ga. E kaya e dua na tacida tagane: “Au dau marau niu raici István. Niu lesu i vale au vakila niu vakacegui qai vakayaloqaqataki.”

E ka ni rarawa ni mai takali o watiqu ena Tiseba, 2015. Dua na ka noqu rarawa, au nanumi koya tale ga vakalevu. Ia meu tukuna vakadodonu au vakila tale ga na vakacegu ni vakasama. Ni bera nona mate sa itokani rawa tu nei Jiova, qori e dua na ka au marautaka vakalevu. O Jiova e nanumi rau vinaka tu o István kei noqu Na. Au na marau ni kidavaki rau qai mokoti rau ena vuravura vou ni yalododonu i Jiova.

Sa sivia qo e 35 na yabaki mai na siga keirau gade kina kei Na vei noqu Na levu, au na sega vakadua ni guilecava ya. Au sa yabaki 70 vakacaca qo, qai painia tudei tiko. E sega ni dua tale na sala vinaka au vakasamataka meu vakavinavinakataki Jiova ena ka kece e cakava vei au. (Same 116:12) E vukei au meu yalodina qai lomavakacegu niu tusaqati. Na ituvaki dredre kece qori au vulica kina ni rawa ni veisau na ituvaki. Ia au sega sara ga ni namaka niu na rawai watiqu niu sega mada ga ni tukuna e dua na ka.