Ra Taroga na iTabagone . . .

Au Sega ni Rawata na Vosa—Cava Beka Meu Cakava?

“Au dau madua na vosa. Au nanuma nira na sega ni taleitaka na tani na ka au na tukuna. E dau mamadua o tinaqu, de oya na vuna au dau mamadua tale ga kina.”​—Atu.

O DAU diva tu beka mo kua ni mamadua, me rawarawa nomu veikilai, me rawarawa tale ga nomu vosa vei ira na tani? E levu sara era dau mamadua. E sega gona ni dua na leqa ke o dau galugalu, mo dau taura vakabibi na ka, se mo qarauna mo kua ni vosa vakalevu. Ia, e leqataki ga ke o dau mamadua sara vakasivia. Ena rawa ni o calata kina na marau ni veimaliwai kei ira na so tale. O na sega tale ga kina ni matau ena veimaliwai ni vakayacori e dua na soqo.

O ira sara mada ga na uabula era dau mamadua. O Bari,a e qase ni ivavakoso. E dau galu tu ga ni maliwai ira na so tale. E kaya: “Au nanuma ni na sega ni yaga na ka au tukuna.” E dau mamadua tale ga o Daiana, na watina. Na cava e qai cakava? E kaya o Daiana: “Au taleitaka meu dau maliwai ira era sega ni kila na madua, nira na liutaka sara ga na veitalanoa.” Na cava e so na sala mo na rawata kina na vosa?

Kua ni Dau Beci Iko

De rairai vinaka mo vakasamataki iko tale mada. O dau raici iko sobu tu ga e veigauna, o dau tukuna tu ga e lomamu nira na sega ni taleitaki iko, se na sega ni yaga na ka o tukuna? Ke o dau raici iko sobu tu ga, sa na vakavuna tu ga mo dau mamadua. E kaya o Jisu: “Mo lomana na kai nomu me vaka ko lomani iko,” e sega ni tukuni e ke mo lomani ira ga na tani, kua o iko! (Maciu 19:19) E dodonu, e veiganiti tale ga mo lomani iko vakarauta. Oqo ena vakavuna mo doudou kina ni torovi ira na tani.

Ke o dau beci iko tu beka, ena yaga mo wilika na ivola na Questions Young People Ask​—Answers That Work,b wase e 12, “Why Don’t I Like Myself?” (Cava Au Sega ni Dau Taleitaki Au Kina?) Na ivakamacala e tu kina, ena vukei iko mo kila ni levu sara na kemu yaga. Nomu mai lotu Vakarisito mada ga e vakaraitaka ni tiko na ka vinaka e raica vei iko na Kalou! E tukuna tale ga o Jisu: “E sega ni lako rawa mai vei au e dua na tamata, kevaka sa sega ni vakayarayarataki koya ko Tamaqu sa talai au mai.”​—Joni 6:44.

Dau Taleitaki Ira na Tani

E veivakasalataki na Vosa Vakaibalebale 18:1: “Ni sa tawasei koya tani na tamata, sa qara na ka e domona.” Io, ke o dauvakuai iko mai vei ira na tani, o na vakasamataki iko tiko ga vakalevu. E uqeti keda na Filipai 2:4, ‘meda kua ni nanumi keda ga, meda dau nanumi ira tale ga na tani.’ Ke o dau kauaitaka na ka era gadreva kei na ka era taleitaka na tani, o na sega soti ni vakabibitaki iko. Na levu ga ni nomu kauaitaki ira na tani, na levu tale ga ni nomu vinakata mo kilai ira.

Me kena ivakaraitaki o Litia, e dua na marama e kilai ena nona dau veikauaitaki kei na nona dau veiciqomi. E kaya na iVolatabu ni oti nona rogoca na vosa i Paula, a tini sara me papitaiso, qai cikevi Paula sara ga kei na nona ilawalawa: “Kevaka dou sa lewa ni’u sa dina vua na Turaga, curu ki na noqu vale.” (Cakacaka16:11-15) E dina ni se qai vakabauta vou ga, ia e vakaliuliu o Litia me kilai ira na veitacini oqo, e sega ni sega ni a vakalougatataki kina vakalevu. Ni oti nodrau sereki mai na valeniveivesu o Paula kei Sailasa, erau a lako i vei? Me cava tale, erau a lako sara ga ina vale i Litia!​—Cakacaka16:35-40.

O na raica, ni levu era galeleti iko ke o dau veikauaitaki. O na tekivu vakacava? Oqo e so na ka e rawa ni o vakayacora.

● Tekivu vakalalai. Nomu rawata na vosa e sega ni kena ibalebale mo tamata karakivosa se ka lalai kece ga e cake mo sa tu kina. Tovolea mo vosa yadudua vei ira. Ena veigauna kece o lako kina ina soqoni vakarisito, tovolea mo vosa mada ga vua e dua. Mo dau dredre. Saga mo drau veiraimata.

● Mo tekivuna na veivosaki. O na kaya beka, ‘Me caka vakacava?’ Ke o taleitaki ira dina na tamata, o na raica ni sega soti ni dredre nomu via veitalanoa kei ira. O Josese e dua na itabagone mai Sipeni e kaya: “Au raica ke da taroga mada ga se sa vakacava tiko, se cakacaka tiko i vei, oqori sa ikabakaba sara tiko ga mo drau veikilai vinaka kina.” E dua tale na itabagone na yacana o Vereti e vakatura: “Ke o sega ni kila se cava mo tukuna, mo vakatarogi ira ga.” Ia mera kua ga ni lai nanuma ni o saga tiko mo via kila na veika matailalai me baleti ira. Ke sega ni via sauma na taro, tovolea mo talanoataka ga e so na ka e baleti iko.

E kaya o Meri, na tinana e dua na itabagone: “Au raica ni sala vinaka duadua mera vakamatauni ira kina e so, oya mera talanoataki ira ga.” E kuria o Kiti e dua na goneyalewa: “E vinaka tale ga ke da qoroya nodra isulu se dua tale na ka. Oqori era na vakila kina nira taleitaki.” Mo vaqoroqoroi ira dina, kua ni veidreyava ga. (1 Cesalonaika 2:5) Era na marautaka na tani na vosa dina ni veivaqoroqoroi.​—Vosa Vakaibalebale 16:24.

● Dau vakarorogo vinaka. E kaya na iVolatabu, “mo dou kusarawa yadua me vakarorogo, mo dou berabera ga ni vosa.” (Jemesa 1:19) Na veitalanoa e dodonu me rau vosa ruarua kina e le rua, sega ni sa vosa tu ga e dua. E rairai ena yaga beka vei iko oqori kevaka o dau mamadua ni vosa! Era taleitaka na tani e dua e dau vakarorogo vinaka.

● Mo cau tale ga ena veitalanoa. Ni o sa matau ni vosa vei ira yadua na tani, tovolea sara na veitalanoa vakailawalawa. E vanua vinaka me vakamatauni kina oqo, oya na veisoqoni vakarisito. E dau rawarawa na noda curu ena dua na veitalanoa sa vakacagau tiko. Ia e vinakati kina na yalomatua kei na itovo vinaka. Kua ni siova na veitalanoa e sega ni dua na ka e noda kina. Ia kevaka era veitalanoa raraba tu ga, rawa ni o lai veitomani tale ga kina. Mo qaseqase ga, kua ni “silima na gau ni dali,” se o via lewa sara na veitalanoa. Tovolea mo vakarorogo toka mada vakalailai. Ni sa dei na yalomu, rairai o na via cau tale ga ena so na ka.

● Kua ni nanuma me sa taucoko sara na ka o cakava. Ena so na gauna era leqataka vakasivia na itabagone de cala na ka era tukuna. E kaya o Laisa e dua na goneyalewa ni Itali ena nona nanuma lesu: “Au dau rere de cala na ka au tukuna.” E tukuna vei keda na iVolatabu ni sega ni dua vei keda e bula uasivi, ena dredre kina me donu tu ga na ka eda tukuna. (Roma 3:23; vakatauvatana Jemesa 3:2.) E kaya o Laisa: “Au vakasamataka nira noqu itokani ga. Era na sega ni kauaitaka ke cala na ka au tukuna.”

● Kua ni vakabibitaki iko. Eda dau madua ke cala na ka eda tukuna. E tukuna o Vereti, “ia ke o sega ni kauaitaka vakalevu na nomu cala, ena seavu tale. O na vakalevutaka ga na leqa lailai oqori, ke o rui leqataka vakalevu.”

● Tauri iko vakamalua. Mo nanuma tiko ni sega ni o ira kece e dau totolo na nodra via veitalanoa. Ni dau cegu tu mada vakalekaleka na veitalanoa, e sega ni kena ibalebale ni sega ni taleitaki iko o koya, se mo sa tinia tale ga e kea na veitalanoa. Dau so na gauna era osooso, se ra dau mamadua tale ga vakataki iko. Ena ituvaki oqori ena vinaka mo tauri koya vakamalua.

● Tovolea mo vosa vei ira na qase. Ena so na gauna era dau kauaitaki ira na itabagone mamadua o ira na qase, vakauasivi o ira na lotu Vakarisito matua. Mo kua gona ni rere ni talanoa vei ira na itabaqase. E kaya o Kiti: “E rawarawa noqu maliwai ira na itabaqase, baleta niu kila nira na sega ni vakalewai au, vakalialiai au, se vakamadualaki au me vakataki ira na noqu itaba.”

Me Veiuqeti na Loloma

De na veivuke beka na ka era vakaturi tiko e ke, ia e sega na gaunisala rawarawa ni kena sagai me valuti na mamadua. Ia e sega ni tukuni ni tiko na kena iwalewale dei. E kena isoqoni lekaleka ga, oya mo ‘lomana na kai nomu me vaka o lomani iko.’ (Jemesa 2:8) Vulica mo dau kauaitaki ira na tamata, vakabibi o ira na tacimu kei na ganemu vakarisito. (Kalatia 6:10) Ke tu dina vei iko na loloma, o na valuta na rere kei na nuiqawaqawa, ena rawarawa kina vei iko mo torovi ira na tani. Me vaka e tukuna o Jisu, “ni sa vosataka na gusuda na ka sa oso vakalevu kina na lomada.”​—Maciu12:34.

E kaya o Bari, a tukuni taumada: “Na levu ga ni noqu kilai ira na tamata, na rawarawa ni noqu vosa vei ira.” E kena ibalebale ga ni o na rawata mo vosa vei ira tale na so ke o vakamatauni iko kina. Ni o sa tekivu mo veikilai, sa rawarawa tale ga nodra ciqomi iko na tamata, o na vakadinadinataka ni sega ni ka wale na nomu sasaga!

[iVakamacala e ra]

[iYaloyalo ena tabana e 15]

Kua ni madua ni cau ena veivosaki!