Au a Dau Basulawa, Nikua sa Vakainaki Noqu Bula

TALANOATAKA O COSTA KOULLAPIS

NIU WANONOVA TU NA LALAGA DUKA NI NOQU RUMU ENA VALENIVEIVESU, SA LOMAQU SARA MEU SAGA E DUA NA SALA MEU RAWATA KINA E DUA NA ILAVO LEVU, MEU TINIA NOQU BASU LAWA, MEU SA TEKIVUNA E DUA NA BULA VOU.

ENA dela ni vakaloloma kei na yalolailai, au dabe au qai vakasamataka tiko nira sa mate oti e 11 na noqu ilala ena loma ni yabaki sa oti. Dua e kuna ena vuku ni laba, dua tale a vakamatei koya ga ena gauna e waraka tiko kina nona veilewai, le tolu eratou mate ni sa sivia sara ga na wainimate gaga eratou vakayagataka, e rua erau moku mate ena dua na veibuturaki e gaunisala, kei na le va eratou mate ena vakacalaka ena lori. E so na noqu itokani era curu tu ena so tale na valeniveivesu ena bibi ni cala era vakayacora.

Ena noqu rumu butobuto ena valeniveivesu, au masu vua na Kalou, dina niu sega ni kila se o cei o koya, me vakaraitaka vei au na sala meu galala kina mai na ivakarau ca. Sa via dede toka qai rogoci noqu masu. Sa sega niu mani beitaki ena cala bibi ni vakayaco ivalavala kaukaua ni veivakamavoataki vakaca. A veivuke na noqu vakatusai au, e vakamamadataka na ka au beitaki kina, e lai mamada kina na kequ itotogi. Meu se tei vakamacalataka mada na noqu mai sotava na leqa oqo.

Au sucu au a susugi tale ga mai Pretoria, e Sauca Aferika, ena 1944. Au sotava na rarawa ena itekitekivu ni noqu bula, sa qai vakacacana vakalevu na neitou bula vakavuvale ni dau totolo nona cudru o tamaqu, kuria na nona dau gunu vakalevu ena vuqa na gauna. Dau veimauilavo, e dau yalototolo, e dau vosavosa ca, e voravora tale ga nona itovo vei keitou, vakabibi vei tinaqu. Niu sa sega ni taura rawa na kena dau yaco wasoma na vala, au sa biuta kina na vale.

Na iTekitekivu ni Noqu Basulawa

Sa tekivu sara ga noqu lakovakaca niu se gone. Me kena ivakaraitaki, au vulica rawa e rua na ka niu se qai yabaki walu. Na imatai na kena tobo vei au e so na iyaya ni vakatatalo au butakoca mai ena dua na vale voleka vei keitou. Vakavuna nona mokulaki au vakaca o tamaqu. Au se nanuma tiko ga nona kaya vei au ena levu ni nona cudru: “Niu toboki iko tale ni o butako, au na muloca na domomu!” Sega soti ni lomaqu meu kua tale vakadua ni butako, ia meu kua ga ni tobo. Au kaya lo e lomaqu, ‘Na noqu butako e tarava au sa na sega ni tobo.’

Ia e duidui toka na ikarua ni ka au vulica niu se gone. Ni keimami dau vuli iVolatabu e koronivuli, e vakavulica vei keimami o qasenivuli na yaca ni Kalou. Keimami kurabui ni kaya, “Na yaca ni Kalou o Jiova, ena rogoca o koya na nomu masu kece ga, ke o masu ga ena yaca i luvena, o Jisu.” E vakavu vakasama sara ga vei au, ia e sega ga ni tarova noqu basulawa. Au kena mesamesa sara na butako ena sitoa kei na butako e veivale ena gauna au vuli tiko kina ena koronivuli torocake. Sa ra qai ca sara na noqu icaba e koronivuli, ni levu era sa curu oti ena valeniveivesu ni gone ena cala e so era vakayacora.

Toso na gauna, toso vata kei na noqu basulawa. Niu se bera mada ga ni yabaki 20, sa dau noqu cakacaka na butakoci ira na tamata, butako e veivale, butako motoka, kei na vakayaco ivalavala kaukaua. Au dau wavoki tu ga vakalevu ena vanua ni biliati kei na vanua ni gunu, meu nodra italai na dauvolitaki ira na yalewa ca, meu nodra italai tale ga na yalewa ca, kei ira na dau basulawa, au sega kina ni vakaotia na imatai ni yabaki ni noqu vuli ena koronivuli torocake ni vuli cakacaka.

Era noqu ilala vinaka o ira na sa kilai tu nira dau basulawa, e sega ni dua tu na ka vei ira na nodra dau vakamavoataki ira vakaca na dau liumuritaki ira. Au raica rawa ni vinaka meu kua ni dau tukuna na ka au kila, meu kua ni dokadokataka na veika au rawata, meu kua tale ga ni vakaraitaka ni levu tu vei au na ilavo. Oqori ena sega ni kilakasamitaki kina ni yaco e dua na basulawa, meu lai tini vakatarogi kina vakamatailalai vei ira na ovisa. Era na sega tale ga ni lakovi au mai e so tale na daubutako ena nodra vinakata me dua nodra ivotavota ena iyaya butakoci.

Dina niu dau qaqarauni sara vakavinaka, ia era dau wanonovi au matua na ovisa ena nodra kilakasamitaka niu cakacaka tiko vakailawaki. Au qarauna sara vakavinaka me kua ni kune vei au e dua na iyaya ena rawa niu kilakasamitaki kina, se meu beitaki kina niu cala. Dua na gauna era a yanaka na ovisa na neitou vale ena tolu na kaloko ena mataka lailai. Ra vaqaqara vakarua e vale, era vaqara tiko e so na iyaya vakalivaliva, a butakoci ena dua na vanua ni volitaki iyaya ena yasayasa oya. Era sega ni kunea rawa e dua na ka. Au kau ina siteseni ni ovisa me lai tauri kina na mawe ni ligaqu, ia au sega ga ni beitaki ena dua na ka.

Vakayagataki ni Wainimate Gaga

Sa tekivu meu vakayagataka vakalevu na wainimate gaga niu se qai yabaki 12. Sa tekivu tale ga me vakaleqa na noqu bula, ena so na gauna sa sivia sara ga na ka au vakayagataka. Sega ni dede keirau sa veikilai kei na dua na vuniwai, e lewe tale ga ni dua na ilala ca era dau cakacaka vuni. Au yaco me dua na itini ni volitaki wainimate gaga, au raica rawa ni dredre meu vesu ena noqu cakacaka oqo, nira le vica ga au volivolitaki vei ira, au na sega ni veitaratara kei ira na dau volia e gaunisala.

Ka ni rarawa ni so era dau voli wainimate gaga vei au era tini mate sara ni sa sivia sara ga na nodra vakayagataka, se ra vakayacora e so na cala bibi ena gauna era kania tiko kina. E dua gona na noqu “ilala” a labata e dua na vuniwai kilai levu. E kacivaki raraba na kena itukutuku. A tovolea me bilitaki au, ia au sega tu mada ga ni kila na ka e yaco me yacova nira sa basika i vale na ovisa. Era dau basika vakawasoma na ovisa mera mai vakatarogi au ena so tale na cala.

Dua na siga au qai cakava e dua na ka lialia. Au vakamavoataki rau vakaca e rua na tamata, ena vuku ni noqu kilakasamitaki rau wale ga, e vu oqori ena levu ni wainimate gaga kei na gunu au vakayagataka ena loma ni macawa oya. Au vesu ni rau vakatakilai au ena kena mataka, au beitaki sara ena vakayaco ivalavala kaukaua kei na veivakamavoataki. Oqori na vuna au mai tini tu kina e valeniveivesu.

Meu Vutuniyau, Meu sa Lako Tale ga Vakadodonu

Niu suka mai valeniveivesu, au rogoca ni vaqarai tiko e dua me qarava na iyaya ni dua na kabani ni uli wainimate. Ratou vakadonuya noqu kerekere na itaukei ni cakacaka, ratou nanuma ni ganiti au vinaka, ena nona veitokoni tale ga e dua na noqu ilala e cakacaka tiko e kea e soli kina vei au na cakacaka. Au vakasamataka ni oqo na sala meu na rawailavo kina vakalevu, meu na lako ina dua na vanua meu lai tauyavutaka e dua na bula vou. Au saga kina meu vulica na veibasoga ni cakacaka kece oqo ena gauna totolo duadua, au dau moce vakabogilevu ena noqu vulica meu kila na yaca kece ni wainimate. Au kila ni oqo sara ga na sala meu sa tekivuna kina e dua na bula vou.

Noqu inaki meu saga me ratou vakabauti au na noqu itaukei ni cakacaka. Au na qai waraka toka na kena gauna veiganiti meu na butakoca kina e dua na iwase levu ni veimataqali wainimate au kila tu ni na rawailavo vakalevu ke volitaki e taudaku, au sa na vutuniyau kina vakatotolo. Au vakasamataka sara vakavinaka e dua na kena icakacaka meu kakua kina ni tobo, me rawa ni qai vakavatukana na bula galala kei na bula vou au sa nanuma tiko.

Yaco na gauna meu sa vakayacora na ka au sa lalawataka. Au curu yani vakamalua ena vale ni maroroi iyaya ena dua na bogi, au qai vakaraica tu na vatavata era tu kina na wainimate e vica vata na drau na udolu na dola na kena isau. E ke au sa raica sara tu ga na sala meu galala kina mai na basulawa kei na ivalavala kaukaua. Ia, se qai vakadua me qai cokai au na noqu lewaeloma. Na cava e qai ca kina ena gauna oqo na noqu lewaeloma, ni a sega ni bau vakaleqai au mada ena dua na gauna e liu? Meu na talanoataka mada na vuna.

Ni se vo e vica na macawa me qai yaco na ka oqo, keirau a veitalanoataka tiko kei manidia na ibalebale ni bula. Ena noqu vakamacalataka e dua na ka e tukuna, au mani kaya ni iotioti ni ka e rawa ni vakayacora e dua, oya me masu. E taroga sara: “Meu masu vei cei?” Au sauma yani: “Vua na Kalou.” E kuria: “Ia era dau masuta na tamata e levu na Kalou, o cei o dau masuta o iko?” Au sauma: “Na Kalou Kaukaua Duadua.” E tomana: “O cei na yacana?” Au taroga sara: “Na cava o vakaibalebaletaka?” Kena isau: “Me vaka ni o keda kece e dui tu na yacada, e tiko tale ga na yacana na Kalou Kaukaua Duadua.” E dina tiko nona isaunitaro, ia e vakacudrui au. Au tarogi koya yani vakacudrucudru: “Ia o cei ga na yaca ni Kalou?” E sauma: “Na yaca ni Kalou Kaukaua Duadua o Jiova!”

E vaka ga e tadola na ilatilati niu nanuma lesu na ka au vulica e koronivuli niu se qai yabaki walu. Au kurabui ni vaka me tarai au sara ga na neirau veitalanoa oya kei manidia. E titobu sara na veika keirau veitalanoataka ena vica tale na aua. E kauta mai vei au na ivola Na Ka Dina sa Basika ki na Bula Tawamudua ena siga e tarava. Noqu wilika tasevu na ivola ena bogi oya, au vakadeitaka niu sa kunea na ka dina, au sa kila tale ga na ibalebale dina ni bula. Levu sara neirau veitalanoataka na veiulutaga ena ivola karakarawa oya ena rua na macawa e tarava.

O koya gona ena noqu sa dabe buto tiko oya ena vakanomodi ena vale ni maroroi iyaya, e sa kaya tiko vei au na noqu lewaeloma ni cala na noqu inakinaki meu butako wainimate meu qai volitaka. Au mai biubiu lo yani meu sa lesu i vale, au sa vakadeitaka e lomaqu meu na kua tale vakadua ni butako.

Veisau Levu Sara

Ena loma ni vica na siga e tarava, au vakaraitaka vei iratou e vale niu sa vinakata meu na tekivuna e dua na bula vou, sa tekivu tale ga meu wasea vei iratou e so na ka dina au vulica ena iVolatabu. E vinakata sara ga o tamaqu me vakasavi au mai vale. Ia e vinaka ni totaki au o John na taciqu ena nona kaya vei tamaqu: “E se qai imatai ni gauna oqo me cakava o Costa e dua na ka e sega ni wili vakabasulawa, o sa qai via vakatalai koya tani? O au tale ga au na vinakata meu kila se cava e vakavuna oqo.” Au kurabui ni kerei au o John meu vakavulici koya ena iVolatabu. Me tekivu mai ena gauna oya nira dau lako yani na tamata mera lai vaqara wainimate gaga vei au, sa soli ga mai vei ira na ivola Na Ka Dina! Sega ni dede au sa vakavulici ira e lewe 11 ena iVolatabu, e vakayagataki kina na ivola oqori.

Au qai kila e muri ni sega mada ga ni dua na iVakadinadina na manidia ni kabani. O watina ga e sa iVakadinadina tiko ena loma ni 18 na yabaki, ia “e sega na gauna i tagane me cakava e dua na ka me baleta na ka dina.” Tuvanaka sara o koya me vakavulici au ena iVolatabu e dua na iVakadinadina matua. Vukei au noqu vuli meu vosota e so tale na dredre ni bula, ia sega ni dede sa tekivu me vagalalataki au na Vosa ni Kalou mai na ivakarau ni bula vakavuravura.​—Joni 8:​32.

Au sa kurabui tale ena totolo ni ka e yaco ena loma ga ni vica na macawa. Levu sara na veisau meu cakava, au vakasamataka ni na dua na veivala kaukaua erau na cakava na yago kei na yalo kevaka au na muria na vanua e dusia vei au na ka au sa vulica ena iVolatabu. Ena yasana kadua, au vakasamataka niu na rawa ni mate se curusuka i valeniveivesu kevaka au tomana tiko ga na noqu ilakolako makawa. Ni oti noqu vakasamataka vakabibi na veika oqo kei na noqu masulaka mai vu ni yaloqu, au sa vakatulewataka meu muria na sala ni ka dina. Au papitaiso ni oti tale e ono na vula ena 4 Epereli, 1971, ena noqu yalataka noqu bula vua na Kalou o Jiova.

Na iCovi ni Lako Vakadodonu

E luluvu na lomaqu niu rai lesu ena veivakalougatataki au mai sotava tu oqo me tekivu mai na gauna au vakatulewataka kina meu biuta na bula ni dau basulawa. E lima vei iratou na le 11 au a vakavulici ira taumada ena iVolatabu ena imatai ni vica na macawa voravora oya eratou se muria tiko ga na sala ni ka dina. A vakadonuya o tinaqu me vulica tale ga na iVolatabu, yaco tale ga me dua na iVakadinadina papitaiso, a qarava tiko na Kalou ena yalodina me yacova sara nona mate ena 1991. Rau yalataka tale ga nodrau bula vei Jiova na taciqu tagane, erau sa veiqaravi tiko vaqase ena gauna oqo. Au vukei noqu nei tale ga me vulica na ka dina, sa oti oqo e 15 na yabaki nona cakacaka vakaitalatala vakatabakidua.

A uqeti manidia ni kabani ni uli wainimate au cakacaka tiko kina na noqu veisautaka na noqu bula, vakavuna sara me taura vakabibi na ka dina vakaivolatabu. Ni oti e dua na yabaki noqu papitaiso, sa papitaiso tale ga o koya me ivakaraitaki ni nona yalataka nona bula vua na Kalou. E qai yaco e muri me dua na qase, e veiqaravi ena dua na ivavakoso ni iVakadinadina i Jiova e Pretoria ena vica vata na yabaki.

Au sa mai vakamautaka e dua na ganequ lotu Vakarisito yalayala. Ena 1978 keirau a toki i Ositerelia kei na watiqu o Leonie. Rau lai sucu e kea na luvei keirau tagane, o Elijah kei Paul. E dau vakaukauataki au na nodratou veivakayaloqaqataki na noqu matavuvale. Au qase tiko ena dua na ivavakoso e Canberra, na koroturaga kei Ositerelia. Au dau vakavinavinaka vei Jiova e veisiga ena nona vakabulai au mai na bula ni basulawa ena lai tini ga ina vakaloloma kei na mate. Na kena ilutua, ni vakavuna me vakaibalebale vei au na bula vaka kina vei ira au lomana.

[iVakamacala e ra]

[iYaloyalo ena tabana e 22]

Niu se qai yabaki 12

[iYaloyalo ena tabana e 22]

Edaidai, o au, o watiqu, kei rau na luvequ tagane