Ni Yaco na Tauvimate e Sega ni Wali Rawa ena Vuvale

ERATOU vuvale mamarau na Du Toit. Eda matalau ni raica na nodratou veilomani. Ni o sotavi iratou, ena dredre na nomu siqema ni ratou sa sotava mai e dua na gauna dredre.

E tekivu ni se qai yabaki rua na imatai ni luvedrau, o Michelle, erau qai kila kina o Braam kei Ann ni tauvi koya e dua na mate ni kawa e sega ni wali rawa qai vakamalumalumutaka na nona masela.

E vakamacalataka o Ann na tinana: “E vakasauri ga nomu vulica mo rawa ni qarava rawa e dua na mate veirawai qai sega ni wali rawa. O kila ni sa na veisau sara ga vakadua na nomudou bula vakavuvale.”

Ia ni rau sucu tale mai e dua na goneyalewa kei na dua na gonetagane, sa qai vakuria ga na leqa ni vuvale oqo. Dua na siga ni ratou qito tiko e tautuba na gone, rau qai cici yani i vale na goneyalewa. “I Na! I Na!” erau kailavaka. “Totolo mai. E dua na ka sa yacovi Neil!”

Ni cici yani i tautuba o Ann, e raica ni sa tagole tu na ulu i luvena o Neil, e yabaki tolu, ina dua na yasana. Sa sega ni vakaduria cake rawa na uluna.

“Sa dua na ka na noqu domobula,” e nanuma lesu o Ann, “e vaka ga na sauriva ni mata na noqu vakila na ka sa yaco. E mosi sara ga na utoqu ena kena votu mai vei au ni na sotava tale ga na luvequ bulabula oqo na leqa vata ni malumalumu ni masela e tiko vei ganena.”

E kaya o Braam, na tamadratou: “Na marau ni tauyavu e dua na vuvale bulabula, sa mai vakaruguta tu e dua na ka ni bolebole vakaitamera e se sega mada ni keitou bau sotava.”

E qai yaco me mate o Michelle, dina ga ni qaravi vakavuniwai ena kena ivakatagedegede sara e cake, ni sa yaco me vereverea na kena mate. E se qai yabaki 14 ga ena gauna oya. Ia o Neil e se valuta tiko ga na kena mate.

E vakavurea oqo na taro, E rawa vakacava ina vuvale vakataki iratou na Du Toit me tutaki rawa kina na dredre ni nona qaravi e dua ena kedratou maliwa e tauvi koya e dua na mate e sega ni wali rawa? Me rawa ni saumi na taro oqori, da raica mada na veika era sotava e so na vuvale era vakaleqai ena tauvimate e sega ni wali rawa.