Me Vakaraitaki Beka na Rarawa?

ENA nona ivola, On Children and Death, e kaya kina o Vuniwai Elisabeth Kübler-Ross: “E levu sara vei ira na uabula era sotava na leqa nira a kinoca nodra rarawa ena gauna era se gone kina. E gadrevi gona kina vei ira na gone mera vakaraitaka ga na nodra rarawa, me kua ni dau tukuni nira tagitagive, se ra rogoca na vosa ni veivakalialiai, ‘Na yalewa ga era dau tagi.’”

Na rai vaka oqo e duidui sara ga kei na ivakarau ena so na vanua, ni dau kena ivalavala mera kinoca na nodra rarawa.

Na Veika e Sotava e Dua e Dau Qarava na Veibulu

Na duidui vaka oqo e laurai ena ka e kaya e dua e dau qarava na veibulu e Niu Yoka, o Robert Gallagher, ni vakatarogi koya na Yadra! E tarogi o Robert Gallagher se raica e dua na duidui era vakaraitaka ena nodra rarawa o ira era sucu e Mereke kei ira era lako mai ena veivanua vakalatina.

“Au raica rawa na duidui. Ena veiyabaki ni 1950 niu tekivu ena taba ni cakacaka oqo, a levu sara na vuvale kai Itali era se qai curuvanua vou mai era tiko ena neimami yasayasa. Era dau vakaraitaka votu na nodra rarawa. Nikua keimami sa veitaratara tiko kei ira na luvedra, vaka kina o ira na makubudra ena gauna ni veibulu, ia sa sega soti nira dau vakaraitaka na nodra rarawa. Sa sega soti nira vakaraitaka votu.”

Era sega ni dau kinoca na nodra rarawa o ira na Iperiu ena gauna vakaivolatabu. Dikeva na ka e kaya na iVolatabu me baleta na ka a cakava o Jekope ni kainaki vua ni sa tilomi Josefa na luvena e dua na manumanu kila: “A sa dresulaka nonai sulu ko Jekope, ka vauca nai sulu taqarotu ki na tolona, ka tagicaka na luvena bogi vuqa. A ratou sa ia kece na luvena tagane kei na luvena yalewa kecega, me vakacegui koya; a sa bese ni vakacegui; a sa kaya, Au na lako sobu ki bulu ki na luvequ ka tagi tiko. A sa tagi tiko e na vukuna ko tamana.” (Vakatekivu 37:34, 35, neitou na matanivola kala.) Io, a sega ni madua o Jekope me tagicaki luvena a yali.

Duidui na iTovo Vakavanua, Duidui Tale ga na iTovo ni Lolosi

E duidui na itovo vakavanua. Me kena ivakaraitaki, ena so na yasa i Nigeria, e dina nira lewe levu na gone ena vuvale ra qai mate tale ga e levu ena veimataqali tauvimate, “era dau rarawa sara vakalevu ni mate e dua na gonelailai, vakauasivi ke tagane ulumatua,” e kaya e dua na dauvolaivola e 20 na yabaki na nona tu mai Aferika. “Na kena duidui ni o ira e Nigeria e lekaleka ga qai vakilai vakalevu na rarawa. E sega ni vakavula se vakayabaki na kena balavu.”

Ena vanua vaka Mediterranean se Amerika vakalatina, e dau nodra ivakarau ga mera vakaraitaka na ka e tu e lomadra. E kilai levu nira marau, e kilai levu tale ga nira rarawa. Na veikidavaki e sega ni veilulu wale ga; ia e tini sara ena veimokomoko. E vakatale ga kina na kena vakaraitaki e matanalevu na rarawa ena tuturu ni wainimata kei na tagiyaso.

E kaya na dauvolaivola o Katherine Fair Donnelly ni dua na tama e lolositaka na mate nei luvena ena “sega wale ga ni vosota na yali i luvena, ia ena vosota tale ga na nona rawa ni beci, ni tagane qai vakaraitaka tu e matanalevu na nona rarawa.” Ia, e kaya tale, “ni bikai koya e dua na nona rarawataka na takali ni luvena, sa na sega ni lai kauaitaka wale kina na ka e cakava. Me vaka ga na kena vakasavasavataki na mavoa me mavo totolo kina, e vaka tale ga oya ke da kua ni kinoca na noda tagi me vakaceguya na lomada.”

O koya gona, e kena ivakarau ena so na vanua me vakaraitaki se me kua ni kinoci na rarawa, ia e duidui ena so tale na vanua. Ia e sega ni dodonu me dikevi me ivakaraitaki ni malumalumu na rarawa se tagi. O Jisu Karisito mada ga a “tagi” ni mate na nona itokani o Lasarusa, e dina ni kila o Jisu ni oti ga oya ena vakaturi koya tale.​—Joni 11:35.

[Tikina bibi ena tabana e 16]

A sega ni madua o Jekope me tagicaki luvena a yali