Me Taqomaki na Batinisucu

O YABAKI vica sa tekivu tubu na batimu? O na rairai kurabui ke tukuni ni se tekivu ena gauna o se qai kunekunetaki kina​—se, ni se bera mada ga ni kila o tinamu ni sa bukete tiko. E bibi kina vei ira na marama era tiko bibi mera kania na kakana bulabula e tiko kina na calcium, protein, phosphorus, kei na vitamin.

Vakacava o ira na gone ra qai sucu? Era kaya na kenadau ena tabana ni bula ni o ira na gone era sucu tavaya e dau tola totolo na batidra e liu ena iyatu e cake. Na cava e vakavuna? Dau nodra ivakarau e so na gone mera moce ena nodra domica tiko na tavaya e tiko kina na sucu, wainimoli, wai vakasuka, se na kena mataqali na soda. Na wai kamikamica kece oqo e tiko kina na carbohydrate, na kena era taleitaka vakalevu na manumanu ni mate somidi na bacteria. E dau vakavurea na acid na manumanu somidi oqo, e rawa ni vakavuna na kena ca na batidra na gone, vakabibi ke rau veitaratara tiko na bati kei na acid ena bogi taucoko. Na kena lutu totolo na batidra e so na gone e baleta ni sa rui ca vakalevu, oqo ena rawa ni vakaleqa na kena tubu na batidra dina.

Rawa vakacava vei ira na itubutubu mera taqomaka na batinisucu i luvedra? E vakaturi mera sucu ga vei tinadra na gone, ni sega ni tiko ena wainisucu na manumanu somidi ni bati, e levu tale ga kina na antibody. Era kaya na kenadau ena tabana ni bula, ke vakayagataki na tavaya, e dodonu me mudu ga ni sa vula 18 na gone. Era vakatura tale ga me vakayagataki na tavaya ena gauna ga era kana kina, me kua nira domica wale tu ga me nodra ivakawele. Ke vakamoceri na gone ni soli vua na tavaya me domica, ena daumaka me tawa tiko kina na wai. Ni dau kana oti na gone, me qua na batina ena dua na tikinisulu malumu.

Ena tarovi na tola totolo ni bati, ke dau qaravi vinaka, vakabibi na batidra sara mada ga na gonedramidrami!