Na Rai ni iVolatabu

O Cei na Meca i Karisito?

“DOU A ROGOCA NI NA LAKO MAI KO KOYA NA MECA I KARISITO.”​—1 JONI 2:18.

NA CAVA o na cakava ke dua e vakasalataki iko mo qarauna ni dua na daubasulawa rerevaki e wavoki voli e nomudou yasayasa? Sega ni vakabekataki ni o na via kila na veika matailalai me baleta na kena irairai kei na nona imoimoi na daubasulawa oya. O na qaqarauni sara ga.

E viavia tautauvata na ituvaki oqori kei na kena eda sotava nikua. E vakasalataki keda na yapositolo o Joni ni kaya: “Na yalo kecega sa sega ni vakatusa ni sa liatamata mai ko Jisu Karisito, sa sega ni mai vua na Kalou: ia oqo sai koya na meca i Karisito, oqori dou a rogoca ni na lako mai, a sa tu e vuravura edaidai.” (1 Joni 4:3) E dua tiko beka na meca i Karisito, e meca ni Kalou, e dau veidabui me vakaleqai keda na kawatamata?

Ena rua na ivola i Joni e laurai kina vakalima na ivosavosa “meca i Karisito.” Na ivosavosa oqo e dusimaki ira na ilawalawa tamata era saqata na ivakavuvuli vakaivolatabu me baleti Jisu Karisito. Era wili kina e ke na dauveidabui era kaya voli nira Karisito se ra kaya nira nona italai. E nuitaki na itukutuku ena iVolatabu me baleti ira na meca i Karisito. Ia, me vaka ga e dau yaco e tiko tale ga e so na itukutuku e sega ni nuitaki, me vaka na dau talanoataki qai kilai levu na kedra irogorogo na daubasulawa, ia na dina ni ka e dau yaco e sega soti ni dau kauaitaki.

Era Nanumi Cala

Tekivu mai na gauna ni yapositolo o Joni, e dau kainaki ni vosa i Joni me baleta na meca i Karisito e dusia tiko e dua ga na tamata. Me kena ivakaraitaki, era nanuma e levu ena vica na senitiuri sa oti ni empara kei Roma, o Nero, e meca i Karisito. Ni toso na gauna, era nanuma e levu tale ni veika vakadomobula e yaco ena gauna ni veiliutaki vakasaurara nei Itala e dusimaka ni o koya na meca i Karisito. Era kaya sara mada ga e so ni a meca i Karisito na turaga vuku ni Jamani, o Friedrich Nietzsche. Nikua, era se waraka tiko e so na nona lako mai na meca i Karisito​​—era vakabauta ni na dua na iliuliu voravora, qaseqase, qai nona inaki me liutaka na vuravura taucoko. Era nanuma o ira oqo ni manumanu kila a cavuta o Joni ena Vakatakila wase e 13 e dusi koya tiko na meca i Karisito. Era kaya tale ga ni ka e vakatakilakilataki koya na iliuliu voravora oqo na fika na 666.

E nodra rai o ira kece era cavuti mai cake ni vosa i Joni e dusia ni dua ga na meca i Karisito. Ia e dina beka na nodra rai? Meda dikeva mada na vosa i Joni ena 1 Joni 2:18 (VV): “Me vaka ko ni a rogoca ni na lako mai na meca i Karisito, sa lewe vuqa vaka kina na meca i Karisito era sa tu oqo.” O koya gona, a sega ni dua ga na meca i Karisito me vakavurea na leqa vakayalo ena imatai ni senitiuri, era “lewe vuqa.” Nikua tale ga era le levu na ilawalawa era wili mera meca i Karisito. Ni biu vata na nodra cakacaka na lewe ni ilawalawa oqo e laurai kina ni levu sara na nodra vakacacani ira vakayalo na kawatamata. (2 Timoci 3:1-5, 13) O cei era lewena na ilawalawa era meca i Karisito?

E wili beka kina na manumanu kila ena Vakatakila wase e 13? Da raica mada. E vola na yapositolo o Joni: “Na manumanu ka’u a raica sa vaka na lepate, a yavana sa vaka na yava ni pera, a gusuna e vaka na gusu ni laioni.” (Vakatakila 13:2) Na cava era vakaibalebaletaka na veika oqo?

Era kaya na daunivolatabu ni rau lako vata na Vakatakila wase e 13 kei na Taniela wase e 7. E vakavuna na Kalou me raivotutaka o Taniela e so na manumanu vakaivakatakarakara, wili kina e dua na lepate, dua na pera kei na dua na laione. (Taniela 7:2-6) Na cava e kaya na parofita ni Kalou me baleti ira na manumanu vakaivakatakarakara oqo? E kaya nira vakatakarakarataki ira na tui kei vuravura, se na matanitu. (Taniela 7:17) E macala gona ni manumanu kila ena Vakatakila e vakatakarakarataka na matanitu vakatamata. Era dau tusaqata na Matanitu ni Kalou, era wili gona kina mera meca i Karisito.

O Cei Soti Tale Era Wili Mera Meca i Karisito?

Ni a se bula voli e vuravura o Karisito, na Luve ni Kalou, a levu sara na kena meca. Ena gauna oqo e sega ni rawa nira vakavuleqa na tamata vei Karisito, ia e levu tiko ga na kena meca. Meda raica mada o cei soti era wili kina.

E kaya na yapositolo o Joni: “Sa qai ko cei beka na tamata lasulasu? O koya ga e cakitaka ni sa Karisito ko Jisu. Sa i koya oqo na meca i Karisito: o koya sa cakitaka na Tamana kei na Luvena.” (1 Joni 2:22, VV) Era moica vakatani na ivakavuvuli matata i Jisu o ira na vukitani kei ira na iliuliu ni lotu lasu. Ena nodra cata na ka dina ena iVolatabu, era vakatavuvulitaka kina na ivakavuvuli lasu ena yaca ni Kalou kei Karisito. Era cakitaka na nodrau veiwekani dina na Luve ni Kalou kei na Tamana ena nodra ivakavuvuli na Letoluvakalou. Era wili kece kina mera meca i Karisito.

E vakasalataki ira nona tisaipeli o Jisu ena Luke 21:12: “Era na tauri kemudou, ka vakacacani kemudou, ka soli kemudou yani ki na veivale ni lotu, kei na veivale ni veivesu . . . e na vuku ni yacaqu.” Tekivu sara mai na imatai ni senitiuri sa ra dau sotava na lotu Vakarisito dina na veivakacacani. (2 Timoci 3:12) Ra tusaqati Karisito o ira kece era vakaitavi ena veivakacacani oqo, ra qai wili tale ga kina mera kena meca.

E kaya tale o Jisu: “O koya sa sega ni totaki au, sa to tani: ia ko koya sa sega ni kumuna vata vei au, sa duibiubiuta.” (Luke 11:23) E matata vakasigalevu ena vosa oqo i Jisu nira wili mera kena meca o ira kece na tusaqati koya kei na sasaga e dau tokona me vakayacori kina na inaki ni Kalou. Na cava sa na nodra itinitini o ira oqo?

Na Cava e Nodra iTinitini na Meca i Karisito?

E kaya na Same 5:6 ni “na vakarusai ira era sa vosa lasu [na Kalou]: na tamata vakadave dra kei na dauveivakaisini ena cata sara ko Jiova.” Era okati beka e ke na meca i Karisito? Io. E vola na yapositolo o Joni: “Sa lewe vuqa na dauveivakacalai era sa veilakoyaki tiko e vuravura, na tamata ka ra sega ni via vakatusa ni a mai yaco me tamata ko Jisu Karisito; na tamata vaka ko ya sa dau veivakacalai ka sa i koya na meca i Karisito.” (2 Joni 7, VV) Ena nodra dau lasu kei na veivakaisini, na Kalou Kaukaua Duadua ena vakarusai ira kece na meca i Karisito.

Ni sa roro tiko mai na gauna ni veivakarusai oya, era na saga vakaukaua na meca i Karisito, vakabibi o ira na vukitani, mera vakaisini ira na lotu Vakarisito dina. Mera qaqarauni gona kina na lotu Vakarisito dina de luluqa na nodra vakabauta. Mera taura vakabibi na ivakasala i Joni: “Dou vakaraici kemudou, me kakua ni yali vei kemudou na ka keitou a kitaka, mo dou rawata kecega na kenai sau.”​—2 Joni 8.

[iTaba ni Credit Line ena tabana e 20]

Nero ena tabana e 2 kei na 20: Courtesy of the Visitors of the Ashmolean Museum, Oxford