O se Nanuma Tiko?

O taleitaka na ka o wilika ena itabataba ni Vale ni Vakatawa era se qai taba oti ga? Raica mada ke rawa ni o sauma e vica na taro oqo:

• Ke o lotu Vakarisito dina na cava o rawa ni cakava ke biuti Jiova e dua na wekamu voleka?

O rawa ni vakaukauataki iko vakayalo kei ratou na vo ni lewenivuvale eratou yalodina tiko. Vakaogai iko ena veika e vauca na sokalou dina. Tu vakarau mo vukei ira tale e so. Vakanuinui tiko ga ni na lesu tale mai vei Jiova na wekamu voleka oya. Kua ni beitaki iko. Doka na ituvatuva ni veivakadodonutaki i Jiova, qai talaucaka na lomamu vua e dua na nomu itokani voleka.​​—⁠9/1, tabana e 18-​21.

• Na cava e rua na sala e vakatakila kina na iVolatabu na “ivakataotioti ni veisiga”?

E parofisaitaka na iVolatabu ni na yaco e so na veika lelevu ni sa donui na “iotioti ni veisiga ni ituvaki kei vuravura.” (Maciu 24:​3 (NW), 7, 8; Luke 21:11) E tukuna tale ga ni na vakilai na veisau ena nodra rai kei na nodra itovo na tamata era na bula donuya na “iotioti ni veisiga.” (2 Timoci 3:​1 (NW), 2-5) Ena vunautaki na itukutuku vinaka ni Matanitu ni Kalou ena gauna oqo.​​—⁠9/15, tabana e 4-6.

• Na cava e dodonu me cakava na ivavakoso ke vakau lori e gaunisala e dua na lotu Vakarisito mani yaco na coqa vakacalaka, ra mate kina e so?

De dua eratou dikeva na qase ni ivavakoso ni sega ni rawa ni beitaki o draiva ena vakadavedra ni sega ni bale vua na mate vakacalaka oya. Ia ke vakadinadinataki ni cala o draiva ena vakadavedra, ratou raica na qase ni sa veivutuni dina, ena vunauci ena kena vakayagataki e so na tikina bibi e veiganiti mai na iVolatabu, qai vakacegui ena so na itavi e dau qarava ena ivavakoso.​​—⁠9/15, tabana e 30.

• Na cava e sega ni vakatau kina na bula tawamudu ena veika vovou vakasaenisi?

Era vakabulabulataka na vakadidike vakavuniwai na inuinui ni kena rawa ni vakabalavutaki na bula ni tamata, me vaka na kena sagai me vakabalavutaki na iwiliwili ni gauna e rawa ni vidavidai koya kina na sela se na buli vou ni gacagaca ni tamata ena kena vakayagataki na iwalewale na therapeutic cloning. Ia, na iVolatabu e vakaraitaka ni na rawati ga na bula tawamudu ena ivoli i Jisu.​​—⁠10/1, tabana e 3-5.

• Na nodra veivakasavasavataki na Jiu e itekitekivu beka ni papitaiso vakarisito?

Sega. O ira na Jiu era dau vakasavasavataki ira ga vakataki ira, e sega ni vaka kina na veipapitaisotaki a vakayacora o Joni. Na veivakasavasavataki e dusimaki ena Lawa i Mosese a caka e veigauna, ia na papitaiso vakarisito e vakayacori ga vakadua.​​—⁠10/15, tabana e 12-​13.

• Na cava na Koronivuli ni Vuli Veiqaravi Vakaitalatala?

Oqo na vuli me walu na macawa era vuli kina na qase ni ivavakoso kei ira na dauveiqaravi ni ivavakoso era dawai, era tu vakarau mera lesi ina vanua e gadrevi vakalevu kina na cakacaka. De dua era na lesi ga ena ivavakoso era cavutu mai kina, se ena dua tale na ivavakoso ena vanua oya, se i vanuatani.​​—⁠11/15, tabana e 10-​11.

• Na cava se o cei na meca i Karisito e cavuti ena 1 Joni 2:18; 4:3?

Na matavosa “meca i Karisito,” e vakaibalebaletaki ira kece era saqati Karisito se ra lasutaka nira Karisito, se ra nona mata. E vakadeitaki mai na nodrau vosa o Jisu kei Joni, ni meca i Karisito era lewe vuqa era umani vata mera veivakacalai ena vakabauta vakalotu ra qai tusaqata na Matanitu ni Kalou.​—12/1, tabana e 4-6.