Ra Taroga na iTabagone . . .

Siova na Cakaisausau​—E Veivakaleqai Beka?

ERA taleitaka beka na itabagone na cakaisausau? Era saga e so na ilawalawa dauvakadidike mera kila na ka oqo ena nodra vakatarogi ira na gonevuli mai na 115 na koronivuli ni paraimari kei na sekeneri. E boroya e dua na iyaloyalo matata na iwiliwili oqo: E sivia na veimama (54 na pasede) era kaya nira taleitaka na cakaisausau kei na kaukaua e sega ni vakatamata, ia e duanaikava (26 na pasede) era kaya nira “taleitaka sara vakalevu.”

Era vola na dauvakadidike ni University of Alaska mai Anchorage: “Ena loma ni vica na yabaki oqo . . . sa qai levu ga na itukutuku ena niusiveva kei na ivola me baleta na bula ni vakatevoro.” Era kaya na kenadau ni lailai wale sara na ivakadinadina e kune ni takalevu na qaravi Setani ena kedra maliwa na itabagone. Ia ke vaka mada ga oqori, e sega ni vakabekataki ni so na itabagone era taleitaka e so na ka ni qaravi Setani se cakaisausau, e dina beka nira sega soti ni taura vakabibi.

‘Na cava sara mada na ca ni siovi ni cakaisausau?’ era na rawa ni taroga e so na itabagone. Me saumi, eda na raica se ra lai coriti sara tu mada vakacava ena cakaisausau e so na itabagone.

Idre ni Cakaisausau

E dikeva na U.S. News & World Report ni “sa dola tu vei ira na gonelalai kei na itabagone nikua na veimataqali iyaloyalo kei na itukutuku e veivakarikoutaki, na ka e sega ni bau tadrai ena 20 wale mada ga na yabaki sa oti.” Nodra via vakilakila na itabagone e vakavuna mera wilika na ivola, ivoladraudrau, sara iyaloyalo kei na nodra vaqara ena Internet na ka ni cakaisausau.

E kaya kina na BBC News Online, ni porokaramu ni retioyaloyalo kilai levu era dau vakaraitaka na vakatevoro kei na vakabauta ni vampire “e tukuni ni uqeta nodra taleitaka na vakatevoro na gone.” E so tale ga na ivakatagi na heavy metal era lagati kina na itovo kaukaua se na vakatevoro. E vola na dauvolavola o Tom Harpur ena niusiveva ni Toronto na Sunday Star: “Sa dodonu meda vakadreti vakaukaua ena leqa sa kune ena [ivakatagi] . . . sa tiko ena ivakatagedegede duadua e ra na kena torosobu. Na qaqanisere e rogoci ga kina na ca ni ulu, curumi tevoro, timoni, dra, veivatonaki, ivakarau kaukaua ena kena veimataqali, okati kina na kucu, nona tavalaki koya e dua, laba kei na kukuna. Kuria oqo na mate, veivakarusai, parofisaitaki ni na yaco e dua na leqa levu, butuki sobu na veika e savasava, qai ciqomi na veika ca qai lolovira​—oqo ga na veika e dau lagati.”

E kauta li mai na itovo kaukaua na kena vakarogoci na sere oqori? E yaco dina na ka oqo ena ivakaraitaki ni dua na itabagone yabaki 14 mai Mereke ni a labati tinana qai vakamatei koya ga vakataki koya. Na lalaga ni nona rumu e vakabiri tu kina na kedra iyaloyalo na daunivakatagi na heavy metal. Ni yaco oti na leqa oya, e qai vakamamasu o tamana: “Mera qarauna na itubutubu na mataqali sere era vakarogoca na luvedra.” E kaya ni se bera toka ga e dua na macawa nona labati tinana o luvena, e dau lagata voli e dua na sere “ni dra kei na labati tinamu.”

Era tiko tale ga e so na qito mera matanataki, e so mera daurairai kei na so tale mera daucakaisausau. E levu na qito oqo era vakaraitaki kina na itovo voravora vakatevoro.a

Ia, e kaya ga na isoqosoqo ni dauvakadidike na Mediascope: “E laurai ena vakadidike ni taleitaki ni ivakatagi na heavy metal e veivakamuai ina tu duadua, gunuvi ni wainimate gaga, leqa ni vakasama, kukuna . . . se nodra dau cakava na itabagone e so na ivalavala vakarisekete, ia e sega ni vakavuna na ivakatagi na itovo kece oqo. E nanumi ni kena irairai sa tiko rawa na nona malele na itabagone ina veika oqo, e kamikamica gona vua na ivakatagi oqo ni lagati kina na ka sa tiko rawa e lomana.”

Era sega ni duavata kece na dauvakadidike ni veivakaleqai na vakarogoci ni ivakatagi vakatevoro. Ia, vakacava ke dua e sarava wasoma na itovo voravora se kaukaua ena vidio, rogoca na kena ivakatagi se me dau qitotaka, ena sega beka ni vaka na poisoni oya? Vei ira li na lotu Vakarisito, e tiko e dua na vuna levu mera kua kina ni siova na cakaisausau.

Rai ni Kalou Baleta na Cakaisausau

Ena 1 Korinica 10:20, e vakasalataki ira kina na lotu Vakarisito na yapositolo o Paula: “Ia ka’u sa sega ni vinakata mo dou votai vata kei ira na tevoro.” O cei sara mada o ira na tevoro, qai cava e vakarerevaki kina na noda veitaratara kei ira? Me tukuni ga vakarawarawa, o ira na tevoro se timoni oqo era a agilosi, ra qai digitaka mera muri Setani na Tevoro. O Setani e kena ibalebale “Dauveivorati” kei na Tevoro na “Daukakase.” E kaya na iVolatabu ni o koya na agilosi oqo a luve taumada ni Kalou, ia a digitaka me dauveivorati, me daukakase tale ga, mani vakavuna na nona veimecaki kei na Kalou. Yaco na gauna, me bacani ira na so tale na agilosi mera muri koya ena nona talaidredre. Era qai yaco mera timoni na nona ito oqo.​—Vakatekivu 3:1-​15; 6:1-4; Juta 6.

E vakatokai Setani o Jisu me “turaga ni vuravura oqo.” (Joni 12:31) O Setani kei ira na nona timoni era “cudru vakalevu” ni sa voleka sara mera vakarusai. (Vakatakila 12:9-​12) Sega gona ni kurabuitaki, ni o ira era veitaratara kei ira na timoni era dau raica sara ga nira ivalavala kaukaua. E dua na marama mai Suriname a susugi ena dua na vuvale e dauvakatevoro qai raica bulabula na nodra “marautaka na veivakatotogani na timoni vei ira na lai coko vakavoraki tu kina.”b E vakarerevaki dina na veitaratara kei ira na ka vakayalo dauveivakatotogani oqo!

Ena vuku ni ka oqo, na Kalou e vakaroti ira kina na nona tamata ena gauna e liu, o ira na Isireli, mera kua ni vakaitavi ena ka kece ni cakaisausau. “Ni ra sa tamata vakasisila vei Jiova ko ira kecega era sa kitaka na veika oqo,” e vakarota na Vakarua 18:10-​12. Era vakaroti tale ga na lotu Vakarisito nira na vakarusai ena liga i Jiova o ira era “dauvakatevoro.” (Vakatakila 21:8, VV) Na siova mada ga na cakaisausau e vakacala na Kalou. “Dou kakua ni tara na ka sa sega ni savasava,” e vakarota na iVolatabu.​—2 Korinica 6:17.

Sereki Mai na Cakaisausau

O sa vakacalai beka mo siova na cakaisausau? Raica mada na ka a yaco ena imatai ni senitiuri, ena koro o Efeso. E levu e kea era “vakatevoro.” Ia, e so vei ira a cakayaco ina nodra bula na cakamana e vakayacora o Paula ni vukei koya na yalo tabu. Na cava e yaco? “A sa lewe vuqa talega vei ira era daukitaka eliu nai lawaki vakatevoro eso, era sa kumuna vata na nodrai vola, ka visa e na matadra kecega; a ra sa wilika vata na kedrai voli, a ra sa kunea ni sa limasagavulu na udolu nai lavo siliva. Sa tubu vakaukauwa vakaoqo na vosa ni Turaga, ka sa gumatua.”​—Cakacaka 19:11-​20.

Na cava e tukuna oqo vei keda? Ni dua e via drovaka na ivesu ni timoni, e dodonu me vakarusa kece na veika ni vakatevoro e tu vua! Oqo e wili kina na ivola, ivoladraudrau, iyaloyalo dau kabi, na komiki, vidio, na qato (na iyaya e daramaki me “itataqomaki”) kei na itukutuku ni vakatevoro e ciqomi se curu mai ena Internet. (Vakarua 7:25, 26) Me kau laivi na veika e dau vakayagataki ena vakatevoro me vaka na polo iloilo se na papa ni Ouija. Vaka tale ga kina na ivakatagi se vidio e laurai kina na ka oqo.

E vinakati na yaloqaqa kei na igu meda cakava rawa kina oqo. Ia, e levu na ka vinaka ena kauta mai. Dua na yalewa lotu Vakarisito na yacana o Jokapecic a volia e dua na qito ni kompiuta ni nanuma ni sega ni dua na kena ca ena imatai ni gauna e qitotaka kina. Ni sa toso tiko na ivakatagedegede ni qito e qitora tiko, e dikeva ni so e sa ka ni vakatevoro. Sega ni dede sa dau tadra na veika vakarerevaki! “Au duri cake mai ena lomaloma ni bogi,” e kaya o Jokapeci, “au qai vakarusa na CD e tiko kina na qito oya.” Na ka e qai yaco? “Oti vakadua na noqu tadra na veika vakarerevaki.”

Kevaka o vakaraitaka ni o guta dina mo sereki mai kina, ena rawa. Nanuma lesu na igu e vakaraitaka o Jisu ena gauna a saga kina na Tevoro me dreti koya me sokalou vua. “Sa qai kaya vua ko Jisu, Mo lako tani, Setani, ni sa volai, Mo vakarokoroko vei Jiova na nomu Kalou, ia mo qaravi koya duaduaga. Sa qai biuti koya na tevoro.”​—Maciu 4:8-​11.

Kua ni Vala Duadua

A vakadreti keda kina na yapositolo o Paula ni o ira na lotu Vakarisito kece era “veivala . . . kei ira na veivavakoso yalo ca e na veiyasana vakalomalagi.” (Efeso 6:12) Kua ni saga duadua mo valuti Setani kei ira na nona timoni. Kerea na nodrau veivuke na nomu itubutubu erau qaravi Kalou ena yalodina kei ira na qase ena ivavakoso ni lotu Vakarisito. Ena rairai ka vakamadua na nomu tukuna ni o dauvakaitavi kina, ia e rawa ni soli vei iko na veivuke o gadreva dina tu.​—Jemesa 5:14, 15.

Nanuma tale ga na ka e kaya na iVolatabu: “Vorata na Tevoro, ena dro tani kina vei kemudou ko koya. Toro voleka yani vua na Kalou, ka na toro voleka mai vei kemudou ko koya.” (Jemesa 4:7, 8) Io, ena vukei iko o Jiova na Kalou! Ena vukei iko mo sereki mai na icori ni cakaisausau.

[iVakamacala e ra]

[iYaloyalo ena tabana e 26]

Mo biuta laivi na iyaya kece ni vakatevoro

[iYaloyalo ena tabana e 26]

Qarauna na Web site e uqeta na vakatevoro