Na Cava e Golevi Kina na Vakatevoro?
NA ISAUNITARO qori e vakatau vakalevu ena vanua e tiko kina e dua, na nona vakabauta kei na nona isususu. Na cava e bacani ira e levu ena nomu vanua na vakatevoro? De dua era rawai ena so na ka e vakamacalataki tarava.
● Noda via kila ga E dau matau vei keda meda via kila na ka. Ni sega ni kilai vinaka na itukutuku dina me baleta na vakatevoro, e levu era dau via kila na ka e okati kina. Eso era via kila ke tiko na kaukaua tani ena vakatevoro. Eso era na rairai via vakatovolea na Ouija board se wilika na horoscope mera vakadeitaka ke dina na ka e tukuni kina. Eso tale era na rairai lai sota ena dua na vanua nira saga mera veivosaki kei ira na mate se taroga e dua na daurairai.
● Ka ni veivakamarautaki Ena vica na yabaki tiko ga qo e vakarautaki e levu na ka ni veivakamarautaki ena ivola, iyaloyalo, kei na qito ena komipiuta—e yavutaki ena vakatevoro kei na lotu butobuto makawa. Eso vei ira na ka ni veivakamarautaki qori e laurai kina na itovo voravora kei na veiyacovi.
● Lomaocaocataki na siga nimataka E tukuna tu mai na iVolatabu: “Na iotioti ni veisiga, ena vakilai kina e levu na ka dredre.” (2 Timoci 3:1) Eda vakila sara tiko ga qo na dredre, e levu gona era golevi ira na dauvakatevoro me dusimaki ira. Qo o ira na dauraikalokalo, daurairai, dau raica na qeteqete ni liga, kei ira na dauvakacuru. E tukuna e dua na dauvakacuru: “Qo e dua na bisinisi e sega vakadua ni vakilai kina na leqa vakailavo. Era sega ni dau mai raici iko na tamata nira marau tu.” E tukuna e dua na daurairai mai Kenada: “E sega ni bera ga na nodra dau qiri mai na daunibisinisi ena talevoni ena nodra dui ofisi se era dau vakasolokakana nira qiri mai ena nodra mobail.” E tomana: “O ira na dau cakava qori e nodra ivakarau e liu mera vakatitiqa ra qai sega ni golevi ira na daurairai.”
● Tauvimate Ena so na vanua, era biuta na veiqaravi vakavuniwai o ira na dau tauvimate bibi ra qai golevi ira na dauvagunu. Era na rairai nanuma ni vakavuna na nodra tauvimate qori na nodra cudruvi se vakadraunikautaki. Me vakaoti na nodra cudruvi se na nodra vakadraunikautaki, era na qara na nona veivuke na dauvakatevoro o ira na nodra itokani se o ira na wekadra. O ira na dauvakatevoro qori era dau lavaka na ilavo levu.
● Vinakata mera taqomaki, mera kalougata Ena so na vanua e Aferika, era na sauma e dua na “parofita” ni dua na lotu o ira na lewenikoro me vakasava na timoni ena nodra itikotiko. Ena okati ena nona veiqaravi na gunuvi ni so na ka kei na vakayagataki ni “wai tabu.” Ena so tale na vanua, eso era golevi ira na dauvakacuru mera vakalougatataka na nodra vale vou se ibulubulu.
● Vakarerei na gone Mai Papua New Guinea, ena sega ni via curu i tuba ena bogi e dua na tina kei luvena e se qai sucu. Na cava na vuna? E rerevaka de na vakaleqai gone na yalo velavela. E Uganda, era dau vesuka na wa o ira na tina ena ligadra kei na nodra qurulasawa na gone mera kua kina ni vakaleqai. Eso na gauna era tuya kina na cokocoko kei na qa ni vivili.
● Takali e dua na weka lomani O Sir Arthur Conan Doyle e dua na dauvolaivola mai Peritania a takali na luvena, tacina, tavalena, kei na vugona ena iMatai ni iValu Levu. Ena vusolo ni lomadrau vakaveiwatini kei na nodrau vinakata vakalevu me rau vosa vua na luvedrau tagane sa takali, erau goleva na vanua era dau saga kina eso mera veivosaki kei ira na mate. Nikua tale ga, e levu era golevi ira na vakatevoro nira saga mera vosa vei ira na wekadra lomani era sa mate. Ena so na vanua, na qaravi kalou vu kei na lotu era kaya nira lotu vaKarisito era vakavuvulitaka ni vakavuna na mate na nodra nakica na tevoro. De dua ena vinakati gona me caka na veiqaravi vakavanua e saulevu me kua kina na mate veitaravi ena dua na itikotiko.
● Rerevaki o ira na mate Na ivakavuvuli me baleta na mate kei ira na sa mate e veisautaka sara ga na nodra rai na kawatamata. E levu gona na vanua e dau kena ivalavala mera vakamavoataki ira ga, era nanuma ni nodra cakava qori era vakayalovinakataki ira kina na mate se ra “vakaraitaka” nira lomani ira. Ena so na yanuyanu ena Pasifika, era dau vakaukauataki na yada yalewa se yada tagane mera vakaisulu loaloa ra qai lolosi tu me vica vata na vula. Era sogo butu e lomanivale, era sega tale ga ni kania na kena kakana taleitaki o koya sa mate. O ira na dau cakava qori e rawa nira yalobibi, tauvimate nira sega ni kana se mate sara ga.
E macala vakasigalevu ni levu na ka e bacani ira tiko na tamata ena vakatevoro. E bibi gona meda kila vakamatata na vanua e yavutaki kina na ivakavuvuli ni vakatevoro! Meda raica sara mada na iVolatabu, na ivola duadua ga e vakamacalataka na ka kece e okati ena vakatevoro.