Vakarorogo Mo Vuli

E KAYA na niusiveva na Toronto Star “ni 85 na pasede ni ka eda kila e rawati ena vakarorogo.” Dina ga ni levu na gauna ni noda vakarorogo, ia ni dau tu tani na noda vakasama, eda na guilecava e 75 na pasede ni ka eda rogoca. E vakavure vakasama na iwiliwili oya ni vakabibitaki kina meda saga meda dau vakarorogo.

“E levu na leqa ni veimaliwai e vu mai na noda sega ni dau vakarorogo,” e kaya e dua na ripote. E vakabauta o Rebecca Shafir, e dua e dau raici ira e vakaleqai na nodra vosa qai kenadau tale ga ena sala ni veitaratara, ni oya e dau vakavuna vakalevu na nona vakamatei koya ga e dua, itovo kaukaua e koronivuli, kavoro ni bula vakavuvale kei na vakayagataki ni wainimate gaga.

Era kaya na dau vulica na noda veitaratara na tamata ni duidui na sala ni noda vakarorogo. E so era dau taleitaka mera rogoca na ivakamacala matailalai ni italanoa. E so tale e rauti ira ga ke tukuni tu ga vakamatailelevu. “O koya gona ni rau veitalanoa e rua e veibasai vaka oqo na ivakarau ni nodrau bula, erau na rairai sega ni veirogoci vinaka,” e kaya na niusiveva na Star.

Sa rauta me veivakasalataki o Jisu, “mo dou qai qarauni kemudou, e na nomudou rogoca.” (Luke 8:​18) E vakaraitaki ni itovo vinaka na vakarorogo vinaka. E bibi me vinaka kina na veivosaki. Oqo e so na ka e vakaturi e rawa ni vukei keda meda vakarorogo vinaka kina, oya meda kua ni kauai ena veivakasosani, kala vakalailai e liu qai raici koya toka vakadodonu o koya drau veivosaki tiko. Ena vinaka tale ga mo soli vakasama qai deguvacu. Na levu ni ka eda vulica ena vakatau ena noda vakarorogo, o koya gona, meda saga mada ga meda dau vakarorogo vinaka.