‘Qarauna Nomu Vakarorogo’

DUA na ka bibi ena vuli na vakarorogo. Ena rawa ni vakatau tale ga kina na noda vakabulai. Ni vakarau yavala o Jiova me vakabulai ira na nona tamata mai na nodra vesu tu e Ijipita, e qai vakasalataki Mosese ena ka me tukuna mera cakava na qase ni Isireli mera bula kina nodra ulumatua mai na ligana na agilosi ni mate. (Lako 12:21-23) Sa ra qai vakasavuya na itukutuku oqo na qase ina nodra dui vuvale. Na itukutuku oqo e vakadewataki e gusu. Ena vinakati na vakarorogo vinaka. Na cava era cakava? E kaya na iVolatabu: “A ra sa kitaka ko ira kecega na Isireli; me vaka sa vakaroti Mosese kei Eroni o Jiova, era sa kitaka vakakina.” (Lako 12:28, 50, 51) Kena itinitini, ni qai yaco e Isireli e dua na veivakabulai vakasakiti.

Ena gauna oqo, sa vakarautaki keda tiko o Jiova ena dua na veivakabulai e levu cake sara. E rui bibi na nona ivakasala, oya na vuna e dodonu kina meda rogoca vinaka sara. Na nona ivakasala oqori e dau vakarautaka mai ena soqoni vakaivavakoso. Vakacava, sa yaga taucoko tiko vei iko na soqoni? Oqo ena vakatau vakalevu ena nomu vakarorogo.

Vakacava, e dau kasa vei iko na veika bibi e cauraki ena soqoni? O dau saga mo vakayagataka ena nomu bula e veisiga, se mo vota yani na ka o vulica?

Vagolea na Lomamu

E rawa ga ni qai yaga taucoko vei keda na ivakasala e dau tau ena soqoni vakarisito, ke da vagolea kina na lomada. E rui bibi oqo me vaka eda na vakadinadinataka ena ka e yaco donuya na veiliutaki nei Tui Jiosafati e Juta. E tudei o Jiosafati ena sokalou dina. E “kauta tani . . . ko koya na tikina cecere kei na kalouyalewa ni veikau mai Juta,” qai lesi ira na nona tamata turaga, na Livai, kei na bete, mera vakavulica na Lawa i Jiova vei ira kece ena veikoro kei Juta. Ia, e “sega ni kau tani na veitikina cecere.” (2 Vei. 17:6-9; 20:33) E sa vakawakana sara ga na qaravi kalou lasu kei na veiqaravi butobuto era nanuma nira vakayacora tiko vei Jiova ena veitikina cecere, o ya na vuna e sega kina ni rawa ni kau tani taucoko sara vakadua.

Na cava e sega ni dei kina e lomadra na Isireli na ivakasala e vakarautaka o Jiosafati? E tomana na kena itukutuku: “Ni ra sa sega ni vagolea na lomadra ko ira na tamata vua na Kalou ni nodra qase.” Era rogoca na ka e tukuni, ia era sega ni muria. De ra nanuma ni sa rui dredre na lako wasoma ina valenisoro i Jerusalemi mera lai vakacaboisoro. Ia, se mani cava na kena dina, e macala ga ni lailai nodra vakabauta.

Ke da vinakata meda kua ni suka tale ina ivalavala ni vuravura i Setani, e dodonu meda vagolea na lomada ina ivakasala e vakarautaka tiko vei keda o Jiova. Ia, eda na cakava vakacava? Kena imatai, e bibi na masu. Dodonu meda vakaraitaka ena noda masu nida via ciqoma ena yalo e vakavinavinaka na ivakasala e dau vakarautaka mai na Kalou. (Same 27:4; 95:2) Oqo ena qai rawa kina nida doka na nodra sasaga na tacida, e dina nira ivalavala ca, ia era soli ira vei Jiova me vakayagataki ira ena nodra vakavulici na nona tamata. Ena uqeti keda meda vakavinavinakataki Jiova, sega wale ga ena vuku ni veika vovou eda vulica tiko ia ena vuku tale ga ni veika eda sa vulica oti. Ni noda gagadre meda vakayacora taucoko sara ga na loma ni Kalou, eda na masuta: “Ni vakavulici au, Jiova, e nomuni sala; . . . ni vakaduataka na lomaqu me rerevaka na yacamuni.”​—Same 86:11.

Me Coba Dei na Nomu Vakasama

Levu sara na ka e rawa ni vakaleqa noda via vakarorogo vinaka. E rawa ni curuoso tu noda vakasama ena levu ni nuiqawaqawa. Rawa ni vakacacana tale ga noda vakarorogo nodra yamasamasa e so ena vanua ni soqoni, se so mai tautuba. Ena dredre tale ga noda vakarorogo ke da logalogaca tiko. O ira na vagone e rawa ni vakaleqai tale ga vakalevu nodra vakarorogo. Cava meda cakava me coba dei kina noda vakasama ena porokaramu?

Na matada e lewa vakalevu na vanua e gole kina noda vakasama. O koya gona, rai tiko ga vua e vosa me rawa ni coba dei tiko ga e nomu vakasama na ka e talaucaka tiko mai. Ni cavuta e dua na tikinivolatabu​—ke mani tikinivolatabu kilai levu​—cega ga, vakamuri koya ena gauna e wilika kina. Kua ni rorogo kece ga se ka kece ga e yavala mo rai kina. Ke veisoroyaki tiko ga na matamu ena gauna ni soqoni, o na vakaosota wale ga na nomu vakasama ena levu ni ka o vakaraica, o sega ni rogoca kina e levu na ka e talaucaki mai ena buturara.

Ke so na ka e ‘vakaleqa na lomamu’ me dredre kina ni coba dei nomu vakasama ina porokaramu, masu vei Jiova me vakaceguya nomu vakasama kei na lomamu mo rawa kina ni vakarorogo vinaka. (Same 94:19; Fpai. 4:6, 7) Masu vakavica vata ke gadrevi. (Maciu 7:​7, 8) Na soqoni ni ivavakoso era isolisoli i Jiova. O koya gona, e vinakata o koya meda vakila na kena yaga.​—1 Joni 5:14, 15.

Ni O Rogo Vunau

Sega ni vakatitiqataki ni rawa mo tukuna e so na tikina o taleitaka mai na vunau o rogoca. Ia, e sega ni inaki duadua ga ni rogo vunau meda nanuma kina e so na tikina eda taleitaka. Na vunau e vaka e dua na ilakolako. Ena raici beka e so na ka totoka ni vakacagau tiko na ilakolako, ia na ka bibi ena ilakolako na ka e lakovi, oqo na inaki ni noda lako. O koya e vosa ena saga tiko beka me vakamuai ira na vakarorogo ina dua na vanua, se vakauqeti ira mera cakava e dua na ka.

Dikeva na vosa nei Josua vei ira na Isireli e volai ena Josua 24:​1-15. Na inaki ni nona vosa me uqeti ira na lewenivanua mera vakaraitaka nodra tudei ena sokalou dina ena nodra tawasei ira mai na nodra qaravi matakau na veimatanitu era tu wavokiti ira. Na cava e rui bibi kina oqo? Na yaco tiko ni sokalou lasu ena vakaleqa na veiwekani vinaka ni nodra matanitu kei na Kalou o Jiova. Era sauma na vakamamasu i Josua na lewenivanua ena nodra kaya: “Me yawa sara vei keimami me keimami laivi Jiova me la’ki qarava na kalou tani eso; . . . keimami na qaravi Jiova.” Era qai vakayacora dina!​—Josua 24:​16, 18, 31.

Ni o rogoca tiko e dua na vunau, saga mo kila na kena inaki. Dikeva se ra veisemati vakacava na veitikina e talaucaka o koya e vosa kei na inaki ni nona vosa. Tarogi iko se cava e dodonu mo cakava ena ka e talaucaki mai.

Vakarorogo ena Veitarotarogi

Na vuli Vale ni Vakatawa, Vulivola ni iVavakoso, kei na so na itavi ena Soqoni ni Cakacaka e dau veitarotarogitaki kina e so na ivola vakaivolatabu.

Noda vakarorogo ena gauna ni veitarotarogi e via vaka toka na nona vakarorogo e dua ena veivosaki. Mo vakila taucoko na kena yaga, e dodonu mo vakarorogo vinaka sara. Dikeva na vanua sa mua tiko kina na veivosaki. Dikeva na ka e cakava na tacida e taura na itavi me vakavotuya tiko mai kina na nona usutu kei na veitikina bibi. Ni taro mai, sauma lo e lomamu. Vakarorogo nira vakamacala e so, nira vakavotuya tale ga e so na tikina vulici. E rawa ni vou vei iko e dua na ulutaga o rogoca wasoma ke o raica mai na nodra rai na tani. Vakaitavi ena veitarotarogi ena nomu vakatusa sara ga o iko na nomu vakabauta.​—Roma 1:12.

O na kauai vakalevu ena veitarotarogi, o na kauaitaka tale ga na nodra ivakamacala na lewenisoqoni, ke o a vakarautaka mai na ka e veivosakitaki. Ke dredre ena kemu ituvaki mo vulica mai na ka ena veivosakitaki, me bau vica mada ga na miniti ni bera na soqoni mo raica kina vakatotolo. Ena yaga vakalevu cake vei iko na veitarotarogi ke o cakava oqo.

Vakarorogo ena Soqo ni Tabacakacaka kei na Soqo ni Tikina

E levu cake na ka e rawa ni vakaleqa noda vakarorogo ena soqo ni tabacakacaka kei na soqo ni tikina, ni vakatauvatani kei na soqoni ni ivavakoso. Oqo ena rawa ni ka ni sasaga kina noda vakarorogo. Na cava meda cakava?

Dua na ka bibi meda cegu vinaka ena bogi. Ni bera ni tekivu na porokaramu ena veisiga yadua, saga me kasa vei iko na kena usutu. Raica yadua na ulutaga ni vunau qai vakilakila se cava e vakamacalataki kina. Vakayagataka vinaka nomu iVolatabu. Levu era vakadinadinataka ni coba dei tiko ga na nodra vakasama ena porokaramu baleta nira vakavola tiko vakaleleka na veitikina bibi. Vola e so na tikina o na via lai vakayagataka ena nomu bula, kei na nomu cakacaka vakaitalatala. Veivosakitaka e so na tikina ni o gole tiko ina soqo e veisiga, vaka kina ni o sa suka. Oqo ena kasa kina vei iko na ka o rogoca.

Vakavulici Ira na Gone Mera Dau Vakarorogo

O ira na itubutubu era na vukei luvedra​—o ira sara mada ga na gonedramidrami​—mera ‘vakavukui mera bula,’ ena nodra kauti ira ena soqoni, soqo ni tabacakacaka, kei na soqo ni tikina. (2 Tim. 3:15) Era duidui na gone, duidui tale ga na balavu ni gauna e rawa nira vakarorogo kina, e gadrevi na yalomatua ena nodra vakavulici mera dau vakarorogo vinaka. De na yaga e vica na ka e vakaturi oqo.

E vale, me tiko na gauna me dabe vagagalu toka kina o luvemu me wilivola se sara iyaloyalo ena so na noda ivola. Ena soqoni, me kua ni kau yani na iyaya ni vakatatalo me vakawelei kina. Me vaka ga ena nodra gauna na Isireli, o ira tale ga na noda lalai ena gauna oqo era tiko ena soqoni ‘mera vakarorogo, mera vuli.’ (Vkru. 31:12) E so na itubutubu era raica ni veiganiti mera yadua sara mada ga na luvedra lalai na ivola e vulici. Nira tubu cake tiko na gone, vukei ira mera vakavakarau, mera vakaitavi tale ga ena soqoni eda dau vakaitavi kina na vakarorogo.

Nida raica na iVolatabu, ena macala vei keda ni veivolekati sara na noda vakarogoci Jiova kei na noda talairawarawa vua. Eda na raica oqo ena vosa i Mosese ina matanitu o Isireli: “Ni’u sa tauca e matamuni na bula kei na mate, na veivakalougatataki kei na veicudruvi: ia mo ni digitaka mada na bula . . . mo ni lomani Jiova na nomuni Kalou, mo ni vakarorogo ki na nona vosa, mo ni kabiti koya talega.” (Vkru. 30:19, 20, neitou na matanivola kala.) Nikua, e bibi sara ga meda rogoca na ivakasala i Jiova da qai bulataka, me vakadonui keda kina na Kalou, meda vakalougatataki tale ga ena bula tawamudu. O koya gona, e rui bibi meda rogoca na vakamamasu i Jisu: ‘Qarauna na nomu vakarorogo!’​—Luke 8:18.