Vulica Mo Dau Kauai ni O Vakarorogo

“VINAKA vakalevu nomu rogoci au.” E dua beka sa bau tukuna oqori vei iko? Totoka dina na vosa oya! Voleka ni o keda kece eda taleitaka e dua e dau vakarorogo vinaka. Noda dau vakarorogo matua, eda na rawa kina ni vakacegui ira era lomabibi se ra bikai tu ena levu na leqa. Sega li ni vukei keda na noda dau vakarorogo vinaka meda taleitaka na veimaliwai kei ira na tani? Ena loma ni ivavakoso vakarisito, na noda dau kauai meda vakarorogo e sala bibi meda “veivakauqeti kina e na loloma kei na cakacaka vinaka.”​—Iperiu 10:24, VV.

Ia, e levu era sega ni lomavakacegu ke ra vakarorogo ga. Era vinakata mera veivakasalataki, mera tukuna na veika era sotava, se na nodra nanuma ga, mai na nodra vakarogoca na veika era tukuna na tani. E vulici gona na noda dau kauai ni vakarorogo. Eda na vulica vakacava?

Tikina Bibi

O Jiova na noda “Dauniveivakavulici Levu.” (Aisea 30:20, NW) Levu na ka eda rawa ni vulica vei koya me baleta na vakarorogo. Dikeva mada na sala a vukei Ilaija na parofita kina o Jiova. Na veika e tukuna na ranadi o Jesepeli e rere vakalevu kina o Ilaija, e vakavuna me dro ina lekutu qai vakaraitaka ni vinakata sara ga me mate. E kea a vosa kina na agilosi ni Kalou vei Ilaija. Ni sa vakamacalataka na parofita na nona rere, a vakarorogo o Jiova qai vakaraitaka na Nona kaukaua levu. Cava e qai yaco? E oti vakadua na rere nei Ilaija qai lesu tale me qarava na itavi a lesi kina. (1 Tui 19:2-15) Cava e dau vakarorogo kina o Jiova ina nodra lomaleqa na nona tamata? Baleta ni dau nanumi ira. (1 Pita 5:7) Mo rawa ni dau vakarorogo vinaka, oqo e dua na tikina bibi: Dau nanumi ira na tani, qai vakaraitaka ni o kauaitaki ira dina.

Gauna a cala bibi kina e dua na turaga ni Bolivia, a marautaka vakalevu na nona veinanumi e dua erau vakabauta vata. E vakamacalataka na turaga oqo: “Au sa yalolailai sara ga ena gauna oya. Ke a sega ni solia nona gauna na taciqu oya me rogoci au, a rawarawa sara ga meu soro koso ena noqu saga meu qaravi Jiova. A sega ni levu na ka e tukuna, ia na noqu kila ni kauaitaka me rogoci au e vakaukauataki au dina. Au sega ni gadreva na kena iwali, niu sa kila tu na ka meu na cakava. Au vinakata ga e dua e kauaitaka na kequ ituvaki. Na nona vakatudaliga gona, e rawa kina meu walia na noqu yalolailai.”

Dua na ivakaraitaki levu o Jisu Karisito ena nona dau kauai me vakarorogo. Oti ga nona mate, rau a biubiu mai Jerusalemi e rua na nona tisaipeli me rau lako ina dua na koro e rauta ni tinikadua na kilomita na kena yawa. Sega ni vakabekataki ni rau a yalolailai. Mani tekivu taubale kei rau o Jisu Karisito sa vakaturi oti. E vakasamataka vinaka o Jisu na taro me taroga me rawa ni kila kina na lomadrau kei na nodrau nanuma na tisaipeli. Erau tukuna na ka erau a namaka me na yaco, nodrau yalolailai kei na veilecayaki erau vakila ni sega ni yaco na ka oya. Nona kauai o Jisu me rogoci rau e vakavuna me rau rogoci koya tale ga. Sa qai “serelaka vei rau . . . [o Jisu] na veika e tukuni tu me baleti koya e na i Vola Tabu taucoko.”—Luke 24:13-27, VV.

Kevaka eda dau yalololoma meda rogoci ira na tani, ena qai rawarawa tale ga vei ira mera rogoci keda. E dua na marama ni Bolivia e kaya: “O rau na noqu itubutubu vaka kina o rau na vugoqu eratou vakalewa na sala au susugi iratou kina na luvequ. Sa mosi sara ga vei au nodratou vakalelewa, ia ena yasana kadua au nanuma de dina na ka eratou kaya. Donuya na gauna oya, a sikovi au mai e dua na iVakadinadina i Jiova. E tukuna vei au na veika e yalataka na Kalou. Ia, na sala e taroga kina na noqu nanuma e vakaraitaka ni marama oqo e vinakata me rogoci au. Au mani sureti koya i vale, sega ni dede au sa tekivu talaucaka vua na noqu leqa. Au kila ni kauaitaka na ka au tukuna. A taroga kina se cava au vinakata me baleti ratou na luvequ, kei na cava na rai nei watiqu. Veivakacegui dina na veivosaki kei na dua e saga me kilai au vinaka. Ni qai tekivu vakaraitaka vei au na veika e kaya na iVolatabu me baleta na bula vakavuvale, au kila niu veivosaki tiko kei na dua e kauaitaka na noqu ituvaki.”

“Na loloma . . . sa sega ni qara na ka me nona ga,” e kaya na iVolatabu. (1 Korinica 13:4, 5) Koya gona, kevaka eda via vakaraitaka noda kauai dina nida vakarorogo tiko, eda na biuta vakatikitiki na veika eda taleitaka. Oqo ena rairai gadrevi kina noda bokoca na retioyaloyalo, biuta vakatikitiki na niusipepa, se bokoca sara ga na talevoni (mobile phone) ke dua e tukuna tiko vei keda na nona lomaleqa. Ena vakila nida lomani koya dina kevaka eda kauaitaka vakalevu na nona nanuma. Ena vinakati meda kua ni tekivu tukuna na veika baleti keda, me vaka beka ena noda kaya, “Na ka oqori au nanuma sara kina na ka a yacovi au ena dua na gauna e liu.” Na veivosaki vaka oqori e sega ni ca, ia ena vinaka meda biuta toka vakatikitiki ke dua e veivosakitaka tiko e dua na leqa bibi. Noda kauaitaki ira dina na tani e rawa ni vakaraitaki ena dua tale na sala.

Vakarorogo Mo Kila na Lomana

Eratou a vakarorogo tiko na itokani i Jope ena gauna a talaucaka kina vakatini na lomana vei iratou. Ia, e kaya o Jope: “Me dua mada me rogoci au!” (Jope 31:35) Cava na vuna? Baleta ni ratou sega ni vakacegui Jope. Eratou sega ni kauaitaki koya se me ratou via kila na ivakarau ni lomana. Sega sara mada ga ni bau laurai vei iratou na veinanumi ni ratou rogoca na vosa i Jope. Ia e vakarota na yapositolo o Pita: “E dodonu mo ni yalovata kece, ni veinanumi, ni veilomani me vaka na veitacini, ni yalo vinaka ka yalo malua.” (1 Pita 3:8, VV) Eda na vakaraitaka vakacava noda veinanumi? Dua na sala ena noda kauaitaka na lomana e dua, da qai saga meda kilai koya vakavinaka cake. Noda cavuta e so na vosa vakayalololoma me vaka beka, “sa rauta mo rarawa” se “au kila ni mosi dina vei iko,” oqori e vakaraitaka tale ga na noda kauai. Dua tale na sala, ena noda biuta sara ga ena noda vosa na veika e tukuna o koya eda veivosaki tiko, meda vakaraitaka kina nida sa kila na ka e tukuna. Nomu kauai ni vakarorogo, e sega ni kena ibalebale nomu kauaitaka ga na veika e tukuna, ia na nomu kauaitaka tale ga na sala e vakaraitaka kina na lomana.

E dua sa dede ena cakacaka vakaitalatala vakatabakidua ni iVakadinadina i Jiova, o Ropate.a E kaya: “A yaco meu yalolailai ena noqu cakacaka vakavunau ena dua na gauna. Au mani kerea me keirau veivosaki kei koya na ivakatawa dauveilakoyaki. A rogoci au vinaka qai saga me kila na lomaqu. Kena irairai ni siqema rawa niu na lomaleqataka de na vakalewai au. E vakadeitaka ni kila vinaka na lomaqu, ni o koya tale ga a sotava na ituvaki oqo ena dua na gauna. Oqo e vukei au sara ga meu tomana tiko ga na noqu itavi.”

Ia, vakacava ke da sega ni duavata ena veika kece e tukuni? Meda na vakarorogo tiko ga? Meda vakavinavinakataki koya beka ena nona talaucaka mai na lomana? Io. Kaya mada ke a veivala mai koronivuli na luvemu tagane lailai se tukuna na luvemu yalewa itabagone ni sa vakaitau tiko? Sega li ni na vinaka mo vakarorogo ni talaucaka na lomana, qai saga mo kila na nona nanuma ni bera ni o qai vakamacalataka na dodonu se na cala ni nona itovo?

“Sa wai titobu na lewa e na loma ni tamata,” e kaya na Vosa Vakaibalebale 20:5, “ia na tamata vuku [“yalomatua,” NW] ena takiva mai.” Ena sega beka ni usuraka na nona ivakasala e dua na daunivakasala matua, sa na qai vakatau ga vei keda na noda “takiva mai.” Na ituvaki oqo e tautauvata kei na noda dau kauai ni vakarorogo. Me kilai na lomana e dua ena vinakati kina na yalomatua. E yaga na dau taro, ia meda qarauna me kua nida taroga na veika e sega ni dodonu meda kila. De dua ena veivuke ke o vakatura vua e talaucaka tiko nona leqa me tekivu ena ka e lomavakacegu kina. Kena ivakaraitaki, e dua na yalewa e via veivosakitaka na leqa ena nona bula vakawati, rairai ena rawarawa me tekivu ena nona talanoataka na nodrau sota kei tagane yacova sara nodrau sa vakamau. Rairai ena rawarawa vua e dua sa malumu tu vakayalo me tekivu vakamacalataka na itekitekivu ni nona vulica na dina.

Ka ni Bolebole na Dau Kauai Nida Vakarorogo

Ni dua e rarawataki keda, ena ka ni bolebole noda na rogoci koya, ni sa dau noda ivakarau ga meda sabaya na ka eda beitaki kina. Na cava eda rawa ni cakava ena ituvaki dredre vaka oqo? “A vosa vakayalovinaka sai vakamalumu ni cudru,” e kaya na Vosa Vakaibalebale 15:1. Na noda kerei koya e rarawataki keda me vosa mada e liu kei na noda vakarogoci koya ena yalovosota ni talaucaka na ka e rarawataka, oqori e dua na sala eda na vosa lesu kina vakayalovinaka.

E macala ni yaco na veiba katakata erau na taleva tiko ga o rau na veiba na veika sa cavuti oti. Ena sega ni dua vei rau ena via vakarorogo. Ena vinaka sara ke dua vei rau me galu mada! Io, e bibi meda lewa na yaloda da qai vakaraitaka na lomada ena sala vuku kei na yalololoma. E kaya vei keda na iVolatabu: “Ko koya sa tarova na tebenigusuna sa vuku.”​—Vosa Vakaibalebale 10:19.

Na noda rawa ni dau kauai ni vakarorogo e sega ni tu tu ga eda sa matau kina, e dodonu meda vulica. E vinakati kina na sasaga, ia eda na vakila na kena yaga. O koya gona na noda vakarorogo vinaka nira vosa na tani e ivakaraitaki ni noda loloma. Ena kauta tale ga mai na marau. E ka vakavuku gona meda vakamatauni keda ena noda dau kauai ni vakarorogo!

[iVakamacala e ra]

[iYaloyalo ena tabana e 11]

Nida vakarorogo, meda biuta vakatikitiki na veika eda taleitaka

[iYaloyalo ena tabana e 12]

E ka ni bolebole na vakarogoca e dua e rarawa tiko