Sereki Mai na iVesu ni Veicati

TALANOATAKA O JOSÉ GOMEZ

AU A sucu ena 8 Sepiteba, 1964, ena korolailai e Rognac, ena ceva kei Varanise. Eratou Gypsy ni Andalusia mai Sipeni na noqu itubutubu kei rau na tubuqu, mai na yasana vei tamaqu kei tinaqu, eratou sucu e Algeria kei Morocco, ena vualiku kei Aferika. Era dau vuvale lelevu na Gypsy, oya na vuna keitou vuvale levu kina.

E dau voravora na itovo i tamaqu, au se nanuma tu ga oqo na ka e dau cakava, me vaka nona dau vakamavoataki tinaqu. Toso na gauna sa nakita o tinaqu me rau sere​—e tu tu yadua sara ra qai veisere na Gypsy. A kauti taciqu, ganequ qase kei au o tinaqu i Belgium, na vanua keitou lai kunea kina na vakacegu ena loma ni walu na yabaki.

A qai yaco e dua na veisau. A kauti keitou lesu tale i Varanise o Na baleta ni keitou via raici Ta. E ka ni bolebole vei au na lai tiko vata tale kei koya. Mai Belgium, keitou dau lako vata kei Na ena veivanua kece ga. Ia, e nodra itovo ni bula na weka i tamaqu mera dau veimaliwai vata ga na tagane. Era vakabauta ni nodra kece na vakatulewa na tagane, mera qai cakacaka ga na yalewa. Kena ivakaraitaki, ena dua na siga niu via vukei nei ena sava iyaya ni kana, a kaya mai o momo niu viavia yalewa. Ena nodratou vuvale, na sava iyaya ni kana e cakacaka ga ni yalewa. Toso na gauna sa vakatale ga oya na noqu rai.

Sega ni dede sa baci sotava tale o Na na itovo voravora i tamaqu. So na gauna ni keirau dau via tataro kei taciqu, keirau qai tini rika ga ena katubaleka me keirau levea kina na ivacu i Ta. E dau vakamavoataki ganequ tale ga. Oya sara ga na vu ni noqu dau sega ni tu kina vakalevu e vale. Niu se qai yabaki 15, sa sega ni vakainaki tu na noqu bula.

Ni toso na gauna, au kilai ena noqu dau cudrucudru. Au dau taleitaka na veivakasagai. Ena so na gauna au nakita noqu vakacudrui ira na cauravou, ia era sega ni doudou mera bolei au baleta ni dau tu vei au ena levu na gauna na isele se sinucodo. Oti ga vakalailai oya, au dau butako motoka qai volitaka tale ga. Au vakama ena so na gauna, qai ka ni lasa tale vei au niu saravi ira na dau bokobuka nira mai bokoca tiko. Oti oya au tini butako ena sitoa kei na veivale lelevu e dau maroroi tu kina na iyaya. Au vesu vakavica. Ena veigauna kece oqori au kere veivuke niu masu vua na Kalou!

Io, au vakabauta na Kalou. Ni keitou se tiko e Belgium, au a vuli ena dua na koronivuli ni lotu. Au kila ni ca na veika au cakava tiko. Ia na noqu vakabauta na Kalou e sega ni cakayaco ena noqu itovo. Au kila ni na vosota na Kalou na noqu ivalavala ca keu kerea nona veivosoti.

Ena 1984, au totogi me 11 na vula e valeniveivesu niu a butako. Au vakau ena valeniveivesu e Baumettes, e Marseilles. E samuqawetaki e kea na yagoqu. E dua na samuqawe e vaka oqo na ka e volai kina, “cata qai sauma lesu.” Au sega sara ga ni bau veisau, sa qai vakalevutaka ga noqu cati ira na veiliutaki se na ivakarau ni bula raraba noqu curu e valeniveivesu. Au sere ni oti ga e tolu na vula, sa qai kaukaua ga na ca ni yaloqu. Ia, a qai yaco e dua na ka e veisautaka sara ga na noqu bula.

Noqu iNaki Meu Sauma na Ca

A veileqaleqati na neitou vuvale kei na dua tale na vuvale ni Gypsy. Keitou nakita kei rau noqu momo me keitou lai raici iratou sara ga na vuvale oya me wali kina na leqa. E vakaiyaragi na matavuvale ruarua. Ena veiba oya, rau mani lauvana mate kina o momo kei na tavale i tamaqu. Dua na ka noqu rarawataka, au taura tu na dakai, tucake tu e gaunisala qai kaikaila ena cudru. Sa qai mai taura tani vakaukaua vei au na dakai e dua tale na noqu momo.

E vakararawataki au sara ga na nona sa mai takali na noqu momo o Pierre, e vaka tu ga na tamaqu. Au mai vakaloloku tu yani me vaka na kena ivakarau vei ira na Gyspy. E vica na siga na noqu sega tu ni torotoro se kania e dua na lewenimanumanu. Au sega ni via sarava na retioyaloyalo se rogo ivakatagi. Au yalataka niu na sauma lesu nona mate o momo, ia ratou qai tarovi au na noqu vuvale me kua ni dua na dakai me soli vei au.

Au curu ena mataivalu ena Okosita 1984. Niu qai yabaki 20, au sa lewe ni mataivalu ni veitaqomaki ni Matabose kei Vuravura e Lepanoni. Ena ilesilesi oqo au sa vakadonuya kina meu veivakamatei se meu vakamatei. Ena gauna vata tale ga oqori au dau kania vakalevu na wainimate gaga. Niu kania au lomavakacegu kina, au vakila tale ga ni sega ni dua na ka ena vakaleqai au.

E rawarawa na voli ni iyaragi e Lepanoni, au nakita kina meu vakauta e so i Varanise meu vakayacora vinaka kina na veika au sa nakita tiko me baleta na ka a yaco vei momo. Au volia e rua na dakai leka kei na so tale na iyaragi vei ira na vakaitikotiko e Lepanoni. Au seresereka na dakai qai vunitaka ena rua na retio, qai vakauta i vale.

Ni vo ga e rua na macawa me oti na noqu itavi e ke, keitou a lako vakailoa kei na tolu tale na noqu itokani. Keitou vesu ena gauna keitou a lesu tale kina ena bareki. E tuburi au e dua na cudru ena gauna au vesu tu kina, keirau mani vala kei na dua na yadra. Au katakatataka ni vaka me beci au e dua e sega ni Gypsy. Ena siga e tarava keirau baci vala tale kei na dua na sotia au mani kau kina ena valeniveivesu i Montluc, e Lyons, meu lai vakaotia kina na vo ni noqu gauna ni veiqaravi vakasotia.

Au Kunea na Bula Galala e Valeniveivesu

Na imatai ni noqu siga e valeniveivesu e Montluc, au sotava e dua na cauravou vinaka. Au rogoca ni iVakadinadina i Jiova, era vesu kei na so tale era vakabauta vata nira sega ni via tauri iyaragi. Au lomatarotarotaka sara ga na ka oqo. Au via vulica e levu tale na ka.

Au raica nira lomana dina na Kalou na iVakadinadina i Jiova, qai uqeti au tale ga na nodra ivakarau ni bula savasava. Ia, se levu tiko ga na noqu lomatarotaro. Vakabibi niu via kila sara ga se rawa beka vei ira na mate mera veitaratara kei ira na bula ena tadra​—na ka era vakabauta e vuqa na Gypsy. A sureti au e dua na iVakadinadina o Jean-Paul meu vuli iVolatabu ena kena vakayagataki na ivola E Rawa Mo Bula Tawamudu ena Parataisi e Vuravura.a

Au wilika na ivola oya ena dua ga na bogi, e tarai au sara ga. Au sa mai kunea oqo e valeniveivesu na galala dina! Ena gauna au sere kina au vodo sitimanivanua lesu tale i vale, e sinai na noqu kato ena ivola vakaivolatabu e so.

Au gole ena Kingdom Hall e Martigues meu veitaratara kina kei ira na iVakadinadina ena noqu yasayasa. Au tomana tiko ga na noqu vulica na iVolatabu ena nona veivuke e dua na itabagone e cakacaka tiko vakaitalatala vakatabakidua, na yacana o Eric. Oti ga e vica na siga au sa sega ni vakatavako, au sa biuta na ilala ca. Au vakadeitaka sara ga ni veika au cakava me salasalavata kei na Vosa Vakaibalebale 27:11, ni kaya: “Mo vuku, na luvequ, ka vakamarautaka na lomaqu, me dua na vosa me’u tauca vua sa beitaki au.” Au sa mai kunea oqo na Tamaqu dau loloma au vinakata meu vakamarautaka, oya o Jiova.

E Ka ni Bolebole na Veisau

E via dredre toka vei au meu muria na ivakavuvuli vakarisito. Kena ivakaraitaki, au tekivu vakayagataka tale na wainimate gaga me vica na macawa. Na ka e dredre duadua oya meu kauta laivi na yalo ni via sauma na ca. E sega ni kila o Eric niu dau kauta voli ena veigauna na dakai, au sa nakita tale tiko ga na ka meu na qai cakava vei ira na vakamatei momo. E dau taura e dua taucoko na bogi na noqu vaqarai ira tiko.

Gauna au tukuna kina vei Eric na ka oqo, e vakamacalataka vakamatata vei au ni sega ni rawa ni vinaka na noqu veiwekani kei na Kalou kevaka au tauri iyaragi tiko, kei na noqu nakita tiko meu sauma lesu na ca. E dodonu meu na vakatulewa kina. Au vakasamataka vakatitobu na nona ivakasala na yapositolo o Paula ena Roma 12:​19: “Dou kakua ni sauma na ca sa caka vei kemudou, ia mo dou laiva vua na Kalou me sauma.” Na ka oqo e vukei au sara ga kei na noqu dau masu vagumatua meu valuta na gagadre ni lomaqu. (Same 55:22) Oti oya au sa kauta laivi kece na iyaragi e tu vei au. Ena 26 Tiseba, 1986, ni oti e dua na yabaki na noqu vuli iVolatabu, au yalataki au vei Jiova na Kalou ena noqu papitaiso.

Ratou Veisau na Wekaqu

Na veisau ni noqu itovo e uqeti rau na noqu itubutubu me rau vulica tale ga na iVolatabu. Rau vakamau tale, qai papitaiso o tinaqu ena Julai 1989. Toso na gauna sa ra ciqoma tale ga e so na lewe ni noqu vuvale na itukutuku ni iVolatabu, era mai iVakadinadina i Jiova.

Au nakita ena Okosita 1988, meu cakacaka vakaitalatala vakatabakidua. Oti oya keirau mani veidomoni kei na dua na goneyalewa ena neitou ivavakoso, na yacana o Katia. Keirau a vakamau ena 10  June, 1989. E dredre na imatai ni yabaki ni neirau bula vakawati, ni se gadrevi tiko ga vei au meu veisautaka e so na noqu rai me baleti ira na yalewa. E dredre vei au meu muria na ivakasala ena 1 Pita 3:7, e uqeti ira kina na tagane vakawati mera dokai ira na watidra. Vakawasoma na noqu dau masulaka me soli vei au na kaukaua meu kauta laivi na dokadoka, meu veisautaka tale ga na noqu rai. Au sa qai vinaka tiko ni toso na gauna.

E se mositi au tiko ga vakalevu na mate nei momo, so na gauna au sega ni dau tarova rawa na wainimataqu ena noqu dau vakasamataki koya. Au dau yalorarawa sara ga niu nanumi koya lesu. Sa oti e vica na yabaki na noqu papitaiso, ia au se dau taqayataka tiko ga na gauna au na sotavi iratou kina vakasauri na vuvale keitou a veileqaleqati tiko. Cava beka au na cakava ke ratou vakasagai au? Ena lesu tale beka mai vei au na noqu itovo makawa?

Au lai vunau ena dua na siga ena dua na ivavakoso. Au raici Pepa kina, e wekadratou na vakamatei momo. Au rawa ni tukuna ni noqu raici koya e bolea sara ga na noqu bula vakarisito. Ia au biuta vakatikitiki na vakasama vaka oya. E muri, ena siga a papitaiso kina o Pepa, au mokoti koya qai vakavinavinakataki koya ni sa digia me qaravi Jiova. Dina ni a levu na ka e yaco ena keitou maliwa, au ciqomi koya ga me dua na ganequ vakayalo.

Au vakavinavinakataki Jiova e veisiga ni sereki au mai na ivesu ni veicati. Kevaka e sega na loloma i Jiova au na tu beka e vei nikua? Na nona veivuke au marautaka kina na noqu bula vakavuvale. E tiko tale ga na noqu inuinui ena gauna sa tu oqo e liu​—na vuravura vou e sega kina na veicati kei na itovo kaukaua. Io, au vakadeitaka ni na vakayacori kece na veika e yalataka na Kalou: “A ra na dui tiko ga na tamata yadua e na ruku ni nona vaini, kei na ruku ni nona lolo; ka sega e dua me na vakarerei ira: ni sa kaya na gusu i Jiova ni lewe vuqa.”​—Maika 4:4.

[iVakamacala e ra]

[iYaloyalo ena tabana e 28]

Ena mataivalu ni veitaqomaki ni Matabose kei Vuravura e Lepanoni ena 1985

[iYaloyalo ena tabana e 30]

Keitou vata kei Katia kei rau na luvequ tagane o Timeo kei Pierre