Ra Taroga na iTabagone . . .

Na Cava Au Mai Susu Tani tu Kina?

“Vaka sara ga e tauvi au tu e dua na mate e sega na kena wai.”​—Robert.

A CAVUTA na veivosa oqo e dua na turaga a kau me lai susu tani ena gauna ga e sucu kina, ni vakamacalataka tiko na dredre ni nona bula. E tomana: “E dau mosi na lomaqu e veisiga ena levu ni ka au lomatarotarotaka. Au dau vaqaqa se o cei o ira na wekaqu dina? E vei era tu kina? Cava era biuti au kina?”

E kaya ena rarawa o Chantial, a susu ena duatani na vuvale o tamana, ni sega ni kila se o cei na tukana kei na buna dina. E tomana: “Au vakuai ena veimaliwai e dodonu meu marautaka ni sega na tamaqu levu kei na tamaqu lailai, sega na noqu nanalevu se nanalailai, sega noqu nei, taciqu, se tavalequ.” E sega ni vaka kece oqo na nodra nanuma na gone era susu tani. Ia e so era vaka oqo. Ena vuku ni cava?

Vu ni Rarawa

Ena rawa ni veilecayaki sara ga na gone ke kila ni sa tawasei tani mai vei ira na wekana dina. O Catrina, e dua na goneyalewa a soli me lai susu tani ni se gonedramidrami, e kaya: “Au sega ni dau lewa rawa noqu cudru niu sega ni kila rawa na vuna e soli au kina o tinaqu dina meu lai susu tani. Au nanuma ni biuti au beka o tinaqu niu rairai ca qai votivoti beka vua na noqu itovo. Ke a solia vei au na gauna keu rawa ni vakaraitaka vua niu gone vinaka. E dau tubu noqu dra ena gauna kece au dau nanumi tinaqu kina.”

Mai leqa tale ga kina na veimaliwai nei Catrina kei rau na nona itubutubu vakacabecabe. “Au sa lai beitaki rau noqu itubutubu vakacabecabe ni rau kauti au tani mai vei tinaqu dina,” e kaya o koya. “Mani lai tini wale vei rau na noqu rarawa.” Io, era dau rarawa vakalevu e so era kila nira a soli mera susu tani.

E rawa ni vakavuleqa na rarawa vaka oqo. Me vaka e yaco vei Catrina, so na gauna e rawa ni lai tini na cudru vei ira era sega sara ga ni kila e dua na ka. E veivakasalataki na iVolatabu: “Kakua so ni cudru, biuta ga na daulesavi.” (Same 37:8) O na cakava vakacava oqo? E kaya tale ga na Vosa ni Kalou: “A nona yalomatua na tamata sa vakaberabera kina na nona cudru.” (Vosa Vakaibalebale 19:11) Na nomu yalomatuataka na kemu ituvaki ena rawa ni dau vakaseavutaka na nomu cudru. Ena sala cava?

Vakadodonutaka Nomu Rai Cala

Na yalomatua ena vukei iko mo vakalewa kina e so na ka e dau vakavuna nomu cudru. Me kena ivakaraitaki, o nanuma beka ni rau a soli iko na nomu itubutubu mo lai susu tani baleta ni dua na ka e leqa vei iko? Oqori na ka a nanuma o Catrina. Ia, e dau dina tu ga na nanuma oqori? E rawa ni dredre me kilai na vuna erau soli iko kina nomu itubutubu mo lai susu tani, ia e tiko na vuna vinaka meda kua kina ni vakasama vakaca. Ke da vakasamataka vinaka, na cava e dua na vuna levu era dau solia kina na luvedra na itubutubu me dua tale e susuga? Vakalevu mera nanuma ni sa sega tale nira cakava rawa e dua na ka.

Vakasamataka mada na ivakaraitaki kei Mosese. E vakaraitaka na iVolatabu ena Lako Yani wase 2 ni gauna e lewa kina na Fero ni Ijipita mera vakamatei na gonetagane kece e Ijipita, sa qai vunia toka o Jokapeti na luvena me vula tolu. Lakolako sa sega ni vunia rawa, ia e sega ni via rai tu o koya me vakamatei na luvena. O koya gona, “ni sa sega ni vunia rawa tiko, sa cakava e dua na waqa kuta, ka boroya ena qele dregadregata kei nai boro, ka vakotora kina na gone; a sa la’ki kotora e na loma ni veikuta mai na bati ni uciwai.”​—Lako Yani 2:3.

E macala ni na sega ni rawarawa vua me lai biuta tu vaka oya na luvena. Ia, na cava tale me qai cakava? Dua na ka nona lomani luvena, oya na vuna sa cakava kina o koya na ka e nanuma ni na vinaka duadua vua. Eda kila ni qai lai vakararai lo tu na luvena yalewa me yacova ni raica nona sa qai kau na tacina. De dua a masuti koya o tinana me lai raica tu se o cei ena lai taura.

E duidui na ka e dau yaco, ia vakalevu me dau tautauvata ga na kena inaki. E kaya o Robert: “A se goneyalewa o tinaqu ena gauna e kunekunetaki au kina. Kevaka ena susugi au, sa na tarabi sara ga na bula ena nona vuvale me vaka ni sa levu rawa tu mada ga kina na gone. De dua a nanuma kina o koya niu na qaravi vinaka cake ke soli au meu lai susu tani.”

Sega ni vakabekataki ni levu na vuna era dau soli kina na gone mera lai susugi e vale tani. Ia, e macala mai na vica na ivakaraitaki oqo ni nodra soli na gone mera lai susu tani e sega ni sa kena ibalebale sara nira cati, se sega ni taleitaki beka na kedra ibulibuli. E levu na gauna e dau vu sara ga ena nona vakabauta o tina ni na qaravi vinaka cake o luvena ke lai susu ena dua tani tale na vuvale.

Raica Vakabibi na Loloma e Vakaraitaki Vei Iko

E rawa ni vakayaloqaqataki iko tale ga nomu kila na vuna a bolea kina e dua tale na vuvale me susugi iko. Dikeva tale mada na ivakaraitaki i Mosese. Oti “sa qai kauti koya na luve ni Fero yalewa, ka susuga me luvena.” (Cakacaka 7:21, VV) Na cava a vakavuna me lai maroroya kina na luve yalewa i Fero e dua na luvedra na Iperiu e dodonu me vakamatei? E kaya na iVolatabu: “Sa kunea na gone; ka raica, sa tagi na gone. A sa lomani koya.” (Lako Yani 2:6) A sega ni susu tani o Mosese baleta ni cati se sevaki, e lai susu tani ena levu ni nona lomani.

Sa ra raica rawa e levu na gonesusu ni a sega ni vakanadakui ira na nodra itubutubu​—e dina ni sa dau yaco vakalevu oqori nikua​—ia era soli ira na luvedra na itubutubu ina so na isoqosoqo se vanua ni susu gone era kila nira na qaravi kina vakavinaka na luvedra. Na nodra ciqomi tale ga vei ira na veisusu e vakaraitaka nira a lomani, era taleitaki. De dua e via vaka tale ga oqo na ka e yaco vei iko. Nomu vakasamataka kei na nomu raica vakabibi na loloma a vakaraitaki vei iko ena rawa ni bau kauta laivi e so na rarawa kei na mosi o rairai vakila voli.

E rawa nira lomani iko tale ga e so me ikuri ni loloma eratou sa vakaraitaka tiko vei iko na vuvale o sa lai susu kina. Ke o lewe ni ivavakoso vakarisito, o na vakila na marau levu ni o raica e levu sara na tinamu, tamamu, ganemu, kei na tacimu vakayalo era lomani iko. (Marika 10:29-30) O ira na qase lotu Vakarisito era na “vaka nai vunivuni mai na cagi, kei nai vakaruru mai na cava; ena vaka na uciwai e na vanua dravuisiga, ka vaka na yaloyalo ni vatu levu e na vanua dauveivakaocataki.” (Aisea 32:2) Kua ni tu vakasuka ena nomu qara na nodra veivuke na lotu Vakarisito matua, nuitaki ira. Vakaraitaka vei ira na ka o vakasamataka tu kei na ka e tu e lomamu.

E vakila o Robert ni bibi me qaqaco nona veiwekani kei ira ena loma ni ivavakoso vakarisito. “Se dau tu ga na yalolailai,” e kaya o koya. “Ia, e vakacegui au na nodra loloma na lewe ni noqu vuvale vakayalo, e vaka e taluva sara ga kina mai usousonidomoqu e dua na icolacola levu.”

Rawa ni O Tamata Yaco

Saga sara mo valuta na vakasama cala kei na rai cala. Me vaka beka nodra dau nanuma e so nira sa na sega ni tamata yaco baleta nira a gone susu. E rawa ni veivakayalolailaitaki na rai vaka oqo! (Vosa Vakaibalebale 24:10) E sega tale ga ni rai dodonu.

Kua ni guilecava ni a vakayagataka vinaka o Mosese na ituvaki a sota kaya. E kaya na iVolatabu: “A sa vakavulici ko Mosese e na nodra vuku kecega na kai Ijipita, a sa kaukauwa e na nona vosa kei na cakacaka.” (Cakacaka 7:22) Kena ilutua ni a tuberi vinaka sara vakayalo o koya​—yacova na ivakatagedegede me vaka e sa raica sara tiko ga na Tamana vakalomalagi o Jiova. (Iperiu 11:27) A qai tamata yaco beka?

Qai yaco me liutaka o Mosese e dua na matanitu qaqa era lewena e rauta ni tolu na milioni se sivia. Yaco o koya me parofita, turaganilewa, turaganivalu, daunitukutuku makawa, idewadewa ni Lawa ni veiyalayalati, e vola tale ga na imatai ni lima na ivola ena iVolatabu. Kena ikuri, e vakabauti ni vola tale ga o koya na ivola i Jope kei na ika90 ni Same. Io, a tamata yaco o Mosese. Sa ra tamata yaco e levu tale era gonesusu, rawa ni o tamata yaco tale ga.

E qarava vinaka o Robert e rua na luvena, nikua sa qase tiko ni ivavakoso vakarisito. E kaya ni raica lesu nona bula vagonesusu: “Au sa vulica meu kua ni dau vakasamataka na ka au sa na sega ni cakava rawa kina e dua na ka, ia meu vakavinavinakataka na ka ni veivakalougatataki au sotava.”

Rawa ni vakayalolailaitaki iko ena so na gauna na rai cala ke o susu tiko ena dua na kena vale, se o susu voli ena dua tale na vuvale. Ia, vakaisosomitaka ena so na rai vinaka, se rai dodonu. E yalataka na Filipai 4:8, 9 ni na ‘qai tiko vata kei iko na Kalou ni veivakacegui’ ke o ‘dau nanuma na veika’ e vinakata na Kalou. Ia, na cava tale e so na ka o rawa ni cakava mo tamata yaco kina ni o susu tiko ena dua tani tale na vuvale? Ena qai saumi na taro oqo ena itabataba e tarava.

[iYaloyalo ena tabana e 14]

Nona ciqomi iko o koya e susugi iko e vakaraitaka ni lomani iko, e vinakata mo tiki ni nona vuvale, e kauaitaki iko