Sucu Vou—Na Veisau Cava e Rawati Kina?
NA CAVA e tukuna kina o Jisu na ‘sucu ena yalo tabu’ ena nona ivakamacala me baleta na papitaiso ena yalo tabu? (Joni 3:5) Na vosa “sucu” ni vakayagataki vakaivakatakarakara e kena ibalebale “itekitekivu,” kena ivakaraitaki na malanivosa “sucu ni matanitu.” Koya gona, na “sucu vou” e dusia e dua na “itekitekivu vou.” Na vosa vakaivakatakarakara “sucu” kei na “sucu vou” e vakabibitaka ni na tekivu vou na nodra veiwekani kei na Kalou o ira na papitaiso ena yalo tabu. Ena sala cava ena veisau kina vakadua na veiwekani qori?
Ena nona vakamacalataka na yapositolo o Paula na nona vakarautaki ira na lai veiliutaki e lomalagi na Kalou, a vakayagataka e dua na vosa vakatautauvata me baleta na vuvale. E vola vei ira na lotu vaKarisito ena nona gauna nira na ‘yaco mera luve ni Kalou,’ ena cakava vei ira na ka “me vaka vei ira na luvena.” (Kalatia 4:5, VV; Iperiu 12:7) Meda raica tale mada na vosa vakatautauvata me baleta na gonetagane e via vuli ena nodra koronivuli na gone itaukei. Eda na kila ena ivakaraitaki ni gonesusu na veisau e yaco vua e dua e papitaiso ena yalo tabu.
Veisau e Yaco
Na gonetagane e tukuni ena vosa vakatautauvata e sega ni rawa ni vuli ena koronivuli ni sega ni gone itaukei. Ia kaya mada ni yaco e dua na veisau levu. E susugi koya e dua na tama itaukei. E yaga vakacava qori vei gonetagane? Ni gonesusu, ena rawa ni soli tale ga vua na dodonu ni gone itaukei—oka kina me vuli e koronivuli. E dua sara na veisau levu oya ni vakasamataki na veika sa rawa ni cakava o gone.
E va tale ga qori na ka era vakila na sucu vou. Vakasamataka mada eso na ka e rau tautauvata kina. Ena rawa wale ga ni vakadonui me vuli na gonetagane ena vosa vakatautauvata ke rawata na kena ivakatagedegede—oya me dua na gone itaukei. Ia ena sega ni rawata vakataki koya qori. Ena vakasama vata qori, eso era na vakadonui mera veiliutaki ena Matanitu ni Kalou se matanitu vakalomalagi, ia mera rawata na kena ivakatagedegede—oya mera “sucu tale.” Era na sega ni rawata ga vakataki ira qori ni vakatau vua na Kalou na sucu vou.
Na cava e veisautaka na ituvaki kei gonetagane? E vakalawataki na nona susu. Qori e sega ni veisautaka nona itovo, ia e veisau ga na ka e rawa ni cakava ni vakayacori oti kece na ka vakalawa me baleta na nona susu. E dua na itekitekivu vou vua ya—e vaka sara ga e sucu vou. Qo ni sa gonesusu, e tu vua na dodonu me vuli ena koronivuli, me marautaka tale ga na vuvale vou e sa lewena.
Era vakila tale ga na veisau e dua na ilawalawa tamata ivalavala ca, ni vakalawataka o Jiova na yavu ni nodra vakadonui mera luvena vakacabecabe. E lewe tale ga ni ilawalawa qori na yapositolo o Paula, e vola vei ira na nona itokani ena vakabauta: “Na yalo ga sa qisi kemuni mo ni luve ni Kalou ka yaco rawa kina mo ni kaya vua na Kalou, ‘Apa! Tamaqu.’ A yalo oqo sa vakadinadinataka ki na yaloda ni da sa luve ni Kalou.” (Roma 8:15, 16, VV) Ni veivakadonui na Kalou, o ira na lotu vaKarisito e vakamacalataka o Paula era sa lewe ni vuvale ni Kalou se vakatokai mera “luve ni Kalou.”—1 Joni 3:1; 2 Korinica 6:18.
E sega ni veisautaka na kedra ituvaki nira se ivalavala ca tiko ga. (1 Joni 1:8) Ia me vaka e tukuna o Paula, e vakadonui ira na Kalou mera luvena ni vakayacori oti kece na ka vakalawa. Na yalo tabu ni Kalou e vakadeitaka tale ga vei ira nira na bula kei Karisito e lomalagi. (1 Joni 3:2) Na veivakadeitaki qori ni yalo tabu e veisautaka sara ga nodra rai me baleta na bula. (2 Korinica 1:21, 22, VV) Qori e dua na itekitekivu vou vei ira—e vaka ga era sucu vou.
Na iVolatabu e tukuna me baleti ira na luvena vakacabecabe na Kalou: “Era na bete ni Kalou kei Karisito, ka ra na lewa vata kaya ka dua na udolu na yabaki.” (Vakatakila 20:6) O ira na luvena vakacabecabe na Kalou era na veiliutaki kei Karisito ena Matanitu ni Kalou se matanitu vakalomalagi. E tukuna na yapositolo o Pita vei ira eso tale na lotu vaKarisito ni na soli vei ira “nai votavota sa sega ni ca rawa, a sa sega ni dukadukali, a sa sega ni malai mai [“seavu,” NW], sa maroroi mai lomalagi” me nodra. (1 Pita 1:3, 4) Sa dua dina na ivotavota talei!
E dua tale na taro e vure cake mai me baleta na veiliutaki. Ke ra veiliutaki vakatui mai lomalagi o ira na sucu tale, era na liutaki cei? Ena saumi na taro qori ena ulutaga tarava.
[iYaloyalo ena tabana e 10]
Na cava e kaya o Paula me baleta nona yaco e dua me luve ni Kalou?