E Rawa ni Vukei Ira na Matenisuka na iVolatabu
E BIBI ena bula i koya e matenisuka tiko na rai dodonu, me lewai koya tale ga vakamatau. Ia me bucini na itovo oqori ena gadrevi na veitokoni. Mera kua gona ni temaki tale na sa tauvi matenisuka tu vei ira na nodra lewenivuvale se itokani mera kania na kakana e sega ni bulabula, era na rairai kaya, ‘Ena sega sara ga ni dua na kena leqa ke o kania ga oqo.’ “E tokoni au vinaka na watiqu,” e kaya o Harry, e tauvi koya tiko na mateniuto kei na matenisuka na Type 2. “E sega ni dau biuta tu vakarawarawa o watiqu na kakana e sega ni vakatarai meu kania. E dau dredre toka vei au meu raica na veimataqali kakana e vakatabui meu kania, na ka oqo era sega ni dau taura rawa e so.”
Ke o drau dau veivolekati kei na dua e tauvi matenisuka, nanuma tiko e rua na ivakavuvuli totoka oqo mai na iVolatabu: “Me kakua e dua me qara na ka sa yaga duaduaga vei koya, a ka talega sa yaga vei koya na tani,” kei na “loloma . . . sa sega ni qara na ka me nona ga.”—1 Korinica 10:24; 13:4, 5.
O ira na dau kauaitaka nodra bula—ke ra tauvi matenisuka se sega—era na qarauna na ka era kania ra qai dau vakaukauayago tale ga. E veivuke ena tikina oqo na iVolatabu, ni vakabibitaka ni gadrevi vei keda kece meda saga me rawa nida lewai keda, se meda lewai keda vakamatau. O sa nakita beka mo bucina na itovo oqo ena nomu bula? (Kalatia 5:22, 23, VV) E tu tale e so na ivakaraitaki yaga ena iVolatabu, me vaka na yapositolo lotu Vakarisito o Paula. “E lauti koya tu vakadua na votonikau,” e kaya e dua e matenisuka me baleti Paula, “ia e qarava tiko ga na Kalou ena yalodina kei na nona vinaka taucoko. Au rawa tale ga ni cakava vaka kina!”
Io, e ciqoma o Paula na kena ituvaki, ni sega ni rawa ni cakava kina e dua na ka, mani yaco me marautaka tiko ga na vinaka ni nona cakacaka vakaitalatala. (2 Korinica 12:7-9) O Dustin, yabaki 18, e sucu mataboko, qai matenisuka ni se qai yabaki 12. E vola: “Au kila ni sega ni dua e vinaka taucoko na nona bula ena vuravura oqo. Au vakanamata ena vuravura vou ni Kalou, sa na sega tale kina na matenisuka. Ena lekaleka ga na kena tauvi au na mate oqo. Dina ni ca sara mai na mate ni batabata se na matetaka, ia e sa voleka ni vakaoti vakadua.”
E vaka oya na ka e tukuna o Dustin ni vakasamataka tiko na inuinui ni na sega tale na tauvimate ena parataisi e vuravura ena ruku ni veiliutaki ni Matanitu ni Kalou. (Vakatakila 21:3, 4) E yalataka na iVolatabu ena gauna sa na veiliutaki kina na Kalou, “na lewe ni koro ena sega ni kaya, Ka’u sa tauvi mate.” (Aisea 33:24; Maciu 6:9, 10) O taleitaka beka mo vulica tale e so na ka e vauca na parofisai vakaivolatabu oqo? Ke oni taleitaka, mo ni veitaratara kei na dua na iVakadinadina i Jiova, se volavola mai ena itikotiko veiganiti ena tabana e 5.
[iYaloyalo ena tabana e 12]
E bibi vua e matenisuka me lewai koya vakamatau, me donu tale ga nona rai