Na Kena iWali Duadua​—Ena Yaco Dina Beka?

E KENA irairai ni sa ivakarau tudei tu ni bula ena gauna oqo na itovo kaukaua. Dina nira saga vagumatua me vinaka cake na ivakarau ni noda bula na dauveiqaravi raraba, o ira na ovisa, kei ira na kenadau era tuberi ira na kaivesu, ia sa qai vakarerevaki ga na ituvaki kei vuravura. E rawa beka ni wali?

Na iVolatabu e vakaraitaka ni sa na vakarau yaco e dua na veisau levu. Ia, ena sega ni rawati oqo ena kaukaua ni matanitu vakatamata. Ni vakaiyalayala ga na ka era cakava rawa na iliuliu vakatamata, se mani uasivi vakacava na nodra sasaga. E sega vei ira na kaukaua kei na veika e gadrevi me cavuraki kina na vu ni itovo kaukaua se tauyavutaka e dua na ituvaki ni bula e kune dei kina na vakacegu.

Na veisau e cavuta na iVolatabu ena vakayacora o koya e buli keda. Ni a bulia na lomalagi kei na vuravura, e tu vua na kaukaua kei na dodonu vakalawa me vakayacora na ka e sega ni cakava rawa na tamata. E vakamacalataki koya na iVolatabu me “sai koya ga sa vakasivoi ira sara na tui; ia ko ira na turaga ni lewa kei vuravura sa cakava ko koya me ka wale sara . . . , ka sa daugumatua sara.” (Aisea 40:23-26) Na veisau cava soti e yalataka na Kalou, ia eda na rawata vakacava na inuinui dina ni dua na vuravura ena vinaka cake?

E tukuna vei keda na Same 37:10 na vosa ni iyalayala ni Kalou: “Malua mada vakalailai, ena qai takali na tamata ca; io, ko na vakananuma na nona yasana, ia sa na yali kina ko koya [na tamata ca].” E nona inaki na Kalou me vakarusai ira era domoqa kei ira era sega ni via veisau. Ia, ena sega ga ni vakarusa kece na tamata. O ira era tu vakarau mera yalomalua, yalomalumalumu, qai veivakacegui, e yalataka na daunisame: “Waraki Jiova, ka muria na nona sala, ena qai laveti iko cake mo taukena na vanua: ni ra sa muduki tani na tamata ca, ko na raica.” Nira vakarusai na tamata ca, o ira na bula era na marautaka na “veivakacegui vakaidina”​—e dua na vuravura ena sega kina na itovo kaukaua cava ga.​—Same 37:11, 34.

Gadrevi me Veisau na Vakasama kei na Loma ni Tamata

Ena sega ni walia vakadua na leqa ni itovo kaukaua na nodra vakarusai na tamata ca kei na nodra vakabulai na tamata vinaka. Na itovo kaukaua e vu mai na kena sega ni vakavulici vinaka na vakasama kei na loma ni tamata. Ia, oqo na vuna e uasivita kina na veimatanitu tale e so na Matanitu ni Kalou. E vakarautaka na veidusimaki kei na veivakavulici yaga mera tuberi kina na tamata mera lomana na ivalavala dodonu. E kaya na Aisea 54:13: “A luvemu kecega ena vakavulici ira ko Jiova, ena ka levu talega na nodra vakacegu na luvemu.”

E vakasakiti dina na ka ena vuataka! Na iVolatabu e vakayagataka na vosa vakatautauvata me vakamacalataka na veisau era cakava e so era a dau itovo tu vakamanumanu. E kaya: “Ena tiko vata na wolifa kei na lami, ka na davo vata na lepate kei na luve ni me; ena tiko vata talega na luvedratou na pulumokau kei na laioni kei na manumanu uro.” Ena rawa vakacava oya? “Ni na roboti ko vuravura e na veikilai kei Jiova, me vaka sa ubia na wasa titobu na wai.” (Aisea 11:6, 9) Ia, ena sega ni gadrevi vei iko kei na nomu vuvale mo dou waraka sara tiko me yaco na veisau vaka oqo ena gauna sa bera mai. Baleta na cava?

Ena Yaga Vei Iko Nikua

Era tiko nikua o ira era raica ni dodonu mera veisau mera vakarautaki ira mera bula ena dua na vuravura e sega kina na itovo kaukaua. Era sa tokara tiko na itovo vou, na mataqali itovo e vinakata na Kalou mera vakaitovotaki ira kina o ira era na bula ena nona vuravura vou. (2 Pita 3:13) Era cakava oqo ena nodra bulataka na ivakavuvuli vakaivolatabu. Dikeva mada na kena ivakamacala totoka ena iVolatabu: “Dou vakavoui mai e na yalomudou kei na lomamudou; ka mo dou vakaisulu e na tamata vou, o koya sa caka me vaka na Kalou e na yalododonu kei na yalosavasava ni dina.”​—Efeso 4:23, 24.

Na Kolosa 3:12-14 e tomana ni vakamacalataka na veitovo vinaka era sa bucina tiko e levu na tamata lomadina ena gauna oqo. E kaya: “Mo dou qai vakaisulu me vaka dou sa nona digitaki na Kalou, oi kemudou sa yalosavasava ka daulomani, e na yalo dauloloma, e na yalovinaka, e na yalomalumalumu, e na yalomalua, e na dauvosota vakadede: dou veivosoti vakai kemudou, ka kakua ni veicudruvi, kevaka sa dua na ka sa rarawa kina e dua; me vaka sa sega ni cudruvi kemudou na Karisito, mo dou vaka talega kina. Ia me liu e na ka kecega oqo na dauloloma, o koya sai vau vinaka sara.”

O na vinakata beka mo vukei ena nomu bulataka na itovo vou ni dua na lotu Vakarisito? Era le vica na milioni na tamata ena veiyasa i vuravura era sa cakava sara tiko ga oqori ena nodra veivuke na iVakadinadina i Jiova. Ena veisoqoni e dau vakayacori ena Kingdom Hall, kei na soqo cokovata lelevu, e laurai kina ni o ira sara mada ga era a dau cakava na itovo voravora era sa mai vulica mera veiyaloni.a Ke o taleitaka me yaga vei iko na porokaramu vakaivolatabu totoka oqo, kua ni tu suka na veitaratara kei ira na tabaka na ivoladraudrau oqo. Era tu vakarau me vukei iko mo bau mai maliwai ira tale ga era vakarautaki ira tiko nikua mera bula ena vuravura vou ni Kalou, ena sega kina na itovo kaukaua.

[iVakamacala e ra]

[iYaloyalo ena tabana e 10]

Era sa vakavulici tiko e vica na milioni mera bula ena vuravura ena sega kina na itovo kaukaua