Sucu ena Vuravura Tawaloloma!

E SUCU e dua na gone ena vuravura voravora e sega kina na loloma, qai levu tale ga kina na lomaocaoca. Dina ni na sega ni tukuna rawa na lomana na gonedramidrami, ia era vakabauta e so na saenitisi ni sa tekivu vakila na ka na gone ni se tiko sara ga e kete i tinana.

E kaya na ivola The Secret Life of the Unborn Child: “Eda sa qai kila oqo nira se qai vula ono ga na gone e kete i tinadra (se ni bera nira vula ono), era sa tekivu vakila na ka me vakataki ira ga na tamata bula.” Dina ni na sega ni nanuma o gone na veika oqori, ia era se vaqaqa tiko ga na saenitisi ke dau lai tara na nodra bula mai muri na mosi ni nodra vakasucumi.

Ni sa sucu oti ena lomaocaocataki tiko ga na nona qaravi. Ena sega ni qai vakani tale tiko me vaka nona a tiko e kete i tinana. Sa gutu laivi na wa ni vicovico e cegu qai kana tiko kina. Me rawa gona ni bula, sa dodonu me tekivu saga me cegu qai kana. Ena gadrevi me dua e vakani koya, qai qaravi na veika tale ena vinakata.

E gadrevi me yalomatua na gone, me tubu cake tale ga vakayalo. E vinakati gona me qarava na tikina oqori e dua. O cei sara mada e ganiti koya na itavi oqo? Na cava e gadreva o gone vei rau nona itubutubu? Ena rawati vakacava? Ena saumi oqori ena ulutaga e tarava.