Na Rai ni iVolatabu

Vakawati Vakatagane se Vakayalewa​—E Vakadonuya Beka na Kalou?

ENA gauna e caka tiko kina na lotu ni vakamau, rau sa mai duri tu e rua na tagane ena mata ni dua na bisovi kilai levu ni lotu Episcopal. Rau “veiyalayalati . . . e mata ni Kalou vaka tale ga kina ena lotu.” Na bisovi e tokara tu na nodra kote vulavula e ukutaki ena koula, sa qai vakalougatataka e matanalevu na nodrau vauci vata na tagane oqori. Oti oya rau veimoko rau qai regu, ra tucake na tiko e kea ra qai vakasausau. Na nona rai na bisovi ni nodrau vakawati na vakasalewalewa e “ka savasava qai dodonu me vakalougatataki, . . . e ganita vinaka me tukuni: vakatatabutaki.”

Ia, e so tale na iliuliu ni lotu era vakaraitaka sara ga nodra sega ni duavata ena nodrau vauci vata e rua na tagane se rua na yalewa. “Keimami sa bau rarawataka dina na nona vakatulewa na [bisovi] oqo,” e kaya o Cynthia Brust, na mata ni American Anglican Council, e dua na ilawalawa ni Episcopal era sega ni dau duavata kei na veiveisau. “Nodrau vakalougatataki na vakawati vakatagane se vakayalewa e veisaqasaqa sara ga kei na ivakavuvuli matata ni iVolatabu me baleta na vakawati kei na veiyacovi,” qai kuria ni kilikili ga me rau “veiyacovi . . . e dua na tagane kei na dua na yalewa erau sa vakamau.”

E sega wale ga ni katakata na kena veivosakitaki na ulutaga oqo ena buturara ni lotu. Sa veiletitaki tale tiko ga ena buturara ni politiki e vuravura raraba na veiwatini vakatagane se vakayalewa, baleta na veika e vauca na bula raraba, politiki, kei na veika vakailavo, e okati kina na wasei ni ilavo ni peniseni, na veiqaravi vakavuniwai e dau qaravi kina o kena isa e se bula tiko me vaka e dau caka vei ira na veiwatini kei na saumi ni ivakacavacava.

E dau dredre me wali na veika e vauca na nodra dodonu na lewenivanua kei na veivakadonui vakalawa, qai duidui kina na nodra nanuma na leweni vanua. Na lotuVakarisito dina ena sega sara ga ni veitovaki ena veileti vakapolitiki. (Joni 17:16)a Ia, e so era dau doka na iVolatabu sa ra veilecayaki tale ena vuku ni kena sa dau veivosakitaki tiko na vakawati vakatagane se vakayalewa, kei na vakasalewalewa. Na cava na nomu rai ena tikina oqori? Na cava na ivakatagedegede ni Kalou me baleta na bula vakawati? Ena cakayaco vakacava ena nomu veiwekani kei na Kalou na nomu rai?

Kotora na iVakatagedegede na Dauveibuli

Sa tauyavutaka sara tu mai liu na Dauveibuli na lawa me baleta na bula vakawati ni bera nira qai bulia na kena lawa na veimatanitu. E kaya na imatai ni vola ena iVolatabu: ‘Ena biuta na tamana kei tinana na tagane, ena kabita na watina, rau sa na lewe dua ga.’ (Vakatekivu 2:24) Na vosa vakaiperiu e vakadewataki me “watina” e “vakaibalebaletaki tiko ga vua e dua na yalewa” me vaka e kaya na Vine’s Expository Dictionary of Biblical Words. O Jisu a vakadeitaka ni dodonu me rau vauci vata ena bula vakawati na “tagane kei na yalewa.”​—Maciu 19:4.

O koya gona, na inaki ni Kalou me baleta na vakawati oya me dei me rau qai veivolekati na tagane kei na yalewa. E buli na tagane kei na yalewa me rau dau veivukei me rawa kina ni rau vakaceguya na nodrau gagadre vakayago, vakayalo, gagadre ni veiyacovi vaka kina na lomadrau.

Na itukutuku vakaivolatabu kilai levu me baleti Sotoma kei Komora e vakavotuya sara ga na nona rai na Kalou me baleta na veiyacovi vakatagane se vakayalewa. E kaya na Kalou: “Sa ka levu nai tukutuku kei Sotoma kei Komora, a sa ka tani sara na nodraui valavala ca.” (Vakatekivu 18:20) E laurai na torosobu ni nodra ivalavala ena gauna erau sikovi Loti yani kina e rua na vulagi yalododonu. “Io ko ira na kai Sotoma, era sa vakavolivolita na vale, na gone kei na qase, [“gonetagane kei na turaga,” NW] io na tamata kecega mai na veiyasana kecega: a ra sa kaci vei Loti, ka kaya vua, Sa evei na tamata [“tagane,” NW] erau a lako mai vei iko e na bogi oqo? mani kauti rau mai kitautuba, me keimami veikilaki [“veiyacovi,” NW] kei rau.” (Vakatekivu 19:4, 5) E kaya na iVolatabu: “A ra sa tamata [“tagane,” NW] ca na kai Sotoma, kai valavala ca sara e na mata i Jiova.”​—Vakatekivu 13:13.

O ira na tagane e “waqa na nodra veidomoni vakai ira: a ra sa kitaka ko ira na tagane na ka velavela sara kei ira na tagane.” (Roma 1:27) Era “sa sega ni vaka na i tovo ni tamata.” (Juta 7, VV) Ena veivanua e valataki tu kina vakalevu na nodra dodonu na vakasalewalewa, e so era cata na kena vakayagataki na vosa “sega ni vaka na i tovo ni tamata” me vakaibalebaletaki ira na dau kitaka na itovo oqori. Ia e sega li ni dodonu me vakatulewa ga o Jiova me baleta na veika e vauca na nona ibulibuli? E vakaroti ira na nona tamata ena gauna makawa: “Mo kakua ni koto vata kaya na tagane me vaka kei na yalewa: oqo sa ka vakasisila.”​—Vunau ni Soro 18:22.

O na Saumitaro Vua na Kalou

Sa matata tu na ka e kaya na iVolatabu: E sega ni vakadonuya na Kalou na nodra veiyacovi na vakasalewalewa. E sega tale ga ni vakadonui ira na “dauvinakati ira . . . era sa daukitaka” na itovo oqori. (Roma 1:32) Na “vakawati” e sega tale ga ni ka mera rairai dokai kina na vakasalewalewa. Na nona ivakaro na Kalou ni “kilikili kei ira na tamata kece na vakawati” e sega ni okati kina nodra na vauci vata na vakasalewalewa, na ka e vakasisila vua.​—Iperiu 13:4.

Ia, ena veivuke ni Kalou ena rawa kina vua e dua me “kakua ni dau veibutakoci,” okati kina na veimoceri vakatagane me ‘maroroya na yagona me savasava qai dokai.’ (1 Cesalonaika 4:3, 4) Sa matata tu ga ni sega ni ka rawarawa oqo. E kaya o Necani,b a dau nona ivakarau tu ni bula na veiyacovi vakatagane: “Au nanuma sara ga niu na sega ni biuta rawa na itovo oqo.” Ia, a qai vukei koya na “Yalo ni noda Kalou” me veisau. (1 Korinica 6:11) E vakadinata o Necani ni sega ni dua na ka e dredre vei Jiova, ni rawa ni solia na kaukaua kei na veivuke e gadrevi me muri na nona ivakatagedegede, qai rawati nona veivakalougatataki.​—Same 46:1.

[iVakamacala e ra]

[iTaba ni Credit Line ena tabana e 14]

Photo by Chris Hondros/Getty Image