Na Rai ni iVolatabu

E Cala na Veimoceri Vakamataqali Vata?

E LEVU na vanua e sa ciqomi tiko kina na veimoceri vakamataqali vata. E kerea mada ga e dua na ilawalawa era lewena e dua na lotu mai Merika, me veisautaki na ivakavuvuli ni iVolatabu me baleti ira na veimoceri vakamataqali vata, me salavata ga kei na “vuku ni gauna qo.” Dua na turaga e italatala mai Brazil, a vakawati kei na dua tale na turaga, a tukuna me “caka eso na veisau ena ivakavuvuli vakaivolatabu,” me rawa ni ciqomi kina na ivakavuvuli qori ena nona lotu.

Ena yasana ka dua, o ira era dau sega ni ciqomi ira na veimoceri vakamataqali vata, era raici mera lomaqa se dau veivakaduiduitaki. Ia vakacava na iVolatabu, na cava mada e tukuna me baleti ira na veimoceri vakamataqali vata?

Cava e Tukuna na iVolatabu?

Na iVolatabu e sega ni vakaduiduitaki ira na tamata. Ia, e matata vinaka ga na ka e tukuna me baleti ira na veiyacovi vakamataqali vata.

“Mo kakua ni koto vata kaya na tagane me vaka kei na yalewa: oqo sa ka vakasisila.”—Vunau ni Soro 18:22.

Qori e dua vei ira na Lawa a soli vei Mosese, era vakaroti kina na matanitu o Isireli me baleta na itovo savasava. Ena nona tukuna o Jiova, “Oqo sa ka vakasisila,” eda kila kina na nona rai me baleta na veiyacovi vakamataqali vata vei ira na Jiu se vei ira na sega ni Jiu. Era dau veimoceri vakamataqali vata na lewenivanua ena veimatanitu voleka, era veiyacovi vakaveiwekani, veidauci, ra qai cakava eso tale na ivalavala e vakatabui ena Lawa. O Jiova e vakasisilataki ira na veimatanitu qori. (Vunau ni Soro 18:24, 25) Ia vakacava sa veisau na ivakavuvuli vakaivolatabu ena nodra gauna na lotu vaKarisito? Raica mada eso na tikinivolatabu qo:

“E laivi ira kina na Kalou mera vakaceguya na nodra garogaro vakasisila, nira vakatanitaka na nodra yalewa na veiyacovi e kilikili ra qai muria na kena e sega ni kilikili. Vaka kina o ira na tagane, era muduka na veiyacovi kei ira na yalewa qai waqa na nodra veigarovi, na tagane kei na tagane, era cakava na ka e velavela.”—Roma 1:26, 27.

Na cava e tukuna kina na iVolatabu ni vakatanitaki qai velavela na veiyacovi vakamataqali vata? Baleta ni ivalavala ni veiyacovi qori a sega ni nona inaki na Dauveibuli. Na veiyacovi vakamataqali vata e sega ni rawa ni vakatubura na kawa. Na iVolatabu e okata na ivalavala ni veiyacovi vakamataqali vata me tautauvata kei na nodra veiyacovi na agilosi talaidredre se timoni kei ira na yalewa ni vuravura ni bera na Waluvu ena siga i Noa. (Vakatekivu 6:4; 19:4, 5; Juta 6, 7) Na Kalou e raica na ivalavala qori me velavela.

So na iUlubale

Eso era na vaqaqa, ‘Vakacava, e tiko eso na ka e rawa ni uqeti ira eso mera veimoceri vakamataqali vata, de dua eso era sucu ga mai va oya, se ena vuku ni nona isususu, ituvaki dredre e sotava mai me vaka nona vakacacani se kucuvi?’ Sega, e sega ni iulubale qori. Vakasamataka mada qo: Ke dua e gunu sivia, era dau kaya na sainitisi ni rawa ni sucu kaya mai o koya na ivalavala qori se susu ena vuvale era dau gunu sivia. Macala ga ni levu era na lomani koya dina e sotava mai na ituvaki vakaloloma qori. Ia vakacava, era na uqeti koya me tomana nona gunu sivia se me vakaiulubale me kua ni vorata na ivalavala qori baleta ni sucu kaya mai se susu ena vuvale era dau gunu sivia? Sega.

Na iVolatabu tale ga e sega ni vakalewai ira era sasagataka tiko mera valuta na veimoceri vakamataqali vata, ia e sega ni uqeta mera vakaiulubale mera vakayacora na ivalavala qori, veitalia ke ra mani sucu kaya mai se dua tale na vuna. (Roma 7:21-25; 1 Korinica 9:27) E vakarautaka ga na iVolatabu na idusidusi yaga me vakayaloqaqataki ira me rawa nira valuta na veimoceri vakamataqali vata.

iNaki i Jiova me Baleti Ira na Veivinakati Vakamataqali Vata

Na iVolatabu e tukuna ni inaki i Jiova me “bula na veimataqali tamata kece, mera kila tale ga na ka dina.” (1 Timoci 2:4) Na iVolatabu e sega ni uqeta meda cati ira na veivinakati vakamataqali vata, ia e vakacala ga na nodra ivalavala.

Me kua ni raici vakamamada na rai i Jiova me baleti ira na veimoceri vakamataqali vata. Ena 1 Korinica 6:9, 10, e vakamatatataka na iVolatabu ni o ira na “tagane era mocera na tagane” era wili kei ira era “sega ni rawata na matanitu ni Kalou.” Ia e veivakacegui na ka e tukuni ena tikina e 11: “Eso sara ga vei kemuni oni a va tu ya. Ia oni sa vakasavasavataki, oni vakatabui, oni vakadonui ena yaca ni noda Turaga o Jisu Karisito kei na yalo tabu ni Kalou.”

Ena imatai ni senitiuri, o ira era vinakata mera qarava na Kalou ena kena ivalavala e vinakata o koya, era sega ni vakaduiduitaki vei ira na vo ni lotu vaKarisito. E tautauvata tale ga nikua vei ira era vinakata na nona veivakadonui na Kalou—o ira qori era sega ni veisautaka na ivakavuvuli ni iVolatabu—era veisautaka ga na nodra bula me salavata kei na kena ivakavuvuli.

O DAU VAQAQA?

● Na cava na rai ni iVolatabu me baleta na nodra ivalavala o ira na dauveimoceri vakamataqali vata?—Roma 1:26, 27.

● Vakacava na iVolatabu e dau vakaduiduitaki ira na veivinakati vakamataqali vata?—1 Timoci 2:4.

● E rawa meda vorata na veivinakati vakamataqali vata?—1 Korinica 6:9-11.

[iYaloyalo ena tabana e 28]

Vakacava, e dodonu me veisautaki na rai ni Kalou me baleta na veimoceri vakamataqali vata?