Na Cava e Kaya na iVolatabu me Baleta na Veimoceri Vakamataqali Vata?

Kena isau vakaivolatabu

E bulia na tagane kei na yalewa na Kalou me rau marautaka na veiyacovi ena loma ni bula vakawati. (Vakatekivu 1:​27, 28; Vunau ni Soro 18:22; Vosa Vakaibalebale 5:​18, 19) E vakatabuya na iVolatabu na nodrau mocevata e rua rau sega ni veiwatini se mani tagane kei na tagane, yalewa kei na yalewa se dua na tagane kei na dua na yalewa. (1 Korinica 6:​18) Okati kina na veiyacovi, veiyamoci ni yago tabu, kei na vakayagataki ni gusu ena yago tabu.

E sega ni tukuni ena iVolatabu meda cati ira qori, e tukuna ga ni sega ni tokona na veiyacovi vakamataqali vata. Ia era uqeti na lotu vaKarisito mera “rokova na tamata kece.”​—1 Pita 2:​17.

E rawa ni sucukaya mai e dua na gagadre ni veimoceri vakamataqali vata?

E sega ni tukuna vakamatata qori na iVolatabu, e vakaraitaka ga nida sucu ivalavala ca e rawarawa kina nida saqata na ivakaro ni Kalou. (Roma 7:​21-​25) E sega ni yaga meda vakasamataka vakalevu na vuna e basika kina na gagadre va qori, e bibi ga meda kila ni vakatabuya na iVolatabu na veiyacovi vakamataqali vata.

O rawa ni vakamarautaka na Kalou ke o vinakata e dua drau mataqali vata?

E kaya na iVolatabu: “Me kua ni lewai iko na yagomu. Vakamatea na gagadre kece ni veiyacovi tawadodonu.” (Kolosa 3:5, Contemporary English Version) E vinakati me qarauni na ka e dau vakasamataki me kua ni basika na gagadre ca, lai vakavuna na ivalavala ca. Ke o dau vakasamataka na veika vinaka, ena sega ni basika na gagadre ca. (Filipai 4:8; Jemesa 1:​14, 15) E sega ni rawarawa qori ena imatai ni gauna, ia ena vinakati kina na sasaga. Ena vukei iko na Kalou me “vakavoui ena igu e lewa na nomuni ivakarau ni vakasama.”​—Efeso 4:​22-​24.

Qori tale ga na sasaga era cakava tiko e milioni na tagane kei na yalewa era vinakata mera muria na ivakatagedegede vakaivolatabu. Kena ivakaraitaki, o ira na dawai se o ira na vakawatitaka e dua e vakaleqai tu na yagodra, era qarauna me kua ni basika mai na gagadre ni veiyacovi ena gauna era temaki kina. O ira qori era vakila na marau, qori tale ga na ka era rawa ni muria o ira na dau vinakati ira na mataqali vata ke ra vinakata mera vakamarautaka na Kalou.​—Vakarua 30:19.