Veivakacegui na iNuinui
A DAVO bibi koto o Joe ni tauvi koya tiko e dua na mate e sega na kena iwali. O Kirsten, na watina, kei na vica tale na nona itokani eratou a veivosaki toka ena yasa ni nona idavodavo. A raica o Kirsten ni drodro tu na wainimata i watina, qai nanuma ni momosi na yago i Joe. E rairai vaka kina, ia a vakaraitaka vei watina o Joe ni sega ni vakavuna na drodro ni wainimatana na momosi ni yagona.
E kaya o Kirsten: “Ena gauna rarawataki oya era gole mai na itokani voleka i Joe mera mai vakaukauataki koya. Kena ikuri, e dei na yalona ni na vakayacori na nona inuinui vakamareqeti qai kila ni sega ni dua ena kauta laivi vua. E tukuna o Joe ni tuturu na wainimatana ena levu ni nona marau. Ena bogi tiko ga oya, a takali kina o koya.”
Na inuinui cava a vakaukauataki Joe ena gauna a davo bibi tu kina? Oya na vosa ni yalayala ni Kalou o Jiova nira na bula tawamudu na tamata ena vuravura parataisi, era na qai bulabula vinaka tu ga. (Same 37:10, 11, 29) E kaya na Vakatakila 21:3, 4: “A vale ni Kalou sa tu vei ira na tamata. . . . Na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa [okati kina na levu ni leqa nikua].”
iNuinui me Baleti Ira Sara Mada ga na Mate
Ena vakavotukanataki na inuinui i Joe ena gauna ena vakaturi kina. Io, e vakacegui koya na vosa ni yalayala i Jisu ni o “ira kecega e nai bulubulu” e nanumi ira tu na Kalou, era na tucake mai na mate. (Joni 5:28, 29) O rarawataka beka na nona takali e dua na lewe ni nomu vuvale se e dua na nomu itokani? Ke vaka kina, ena vakaukauataki iko tale ga na inuinui ni veivakaturi. E sega ni kena ibalebale oqo ni sa na yali vakasauri na levu ni rarawa eda vakila ni takali e dua na wekada lomani. Ni o Jisu mada ga a “tagi” ena gauna a takali kina o Lasarusa, na nona itokani. Ia e veivakacegui na noda inuinui.—Joni 11:14, 34, 35; 1 Cesalonaika 4:13.
“Au nanuma ena gauna e takali kina o Joe,” e kaya o Kirsten, “au sa na sega tale ni vakila na marau dina. Ena gauna mada ga oqo, ni sa oti e vica na yabaki, au kila ni noqu bula ena ituvaki kei vuravura oqo ena sega ni taucoko sara baleta ni sa yali na watiqu. Ia, au sa vakila tale na lomavakacegu.”
Na veika e kaya oqo o Kirsten e vukei keda meda kila tiko nida na sega ni mamarau tu ga ena veigauna kece ena ituvaki ni vuravura oqo. Eda na sotava na gauna vinaka kei na gauna ca. E tiko tale ga na gauna eda na rarawa kina, na gauna vaka oqori eda na sega ni dau galeleta kina na marau. (Dauvunau 3:1, 4; 7:2-4) Kena ikuri, e so vei keda e valuta voli na lomabibi, e levu na ka e rawa ni vakavuna. Ia, na vosa ni yalayala ena iVolatabu e ivurevure ni vakacegu levu, kei na vuku uasivi eda kunea kina ena vukei keda meda qarauna na veituvaki e rawa ni vakavuna na rarawa. E kaya na Kalou: “Ko koya sa vakarorogo vei au ena tiko vinaka, ka na vakacegu ka sega ni rerevaka e dua na ka ca.”—Vosa Vakaibalebale 1:33.
Io, e kauaitaka vakalevu o Jiova na noda bula. E vinakata meda marau—na marau e sega ni laurai wale ga e matada ia e vu dina mai lomada, qai sega ni vakilai ena vica wale ga na yabaki ia e tawamudu! E cavuta gona kina o Jisu na Luvena na veivosa e sega ni madra rawa oqo: “Era marau o ira era kauaitaka na nodra gagadre vakayalo.” (Maciu 5:3, NW) E ka vakayalomatua ke da muria na nona ivakasala.
[Kato/iYaloyalo ena tabana e 9]
Ciwa na Sala Mo Marau Kina
1. Kauaitaka na nomu gagadre vakayalo.—Maciu 5:3, NW.
2. Lomavakacegu ena ka sa tu vei iko, mo kua ni “daulomana nai lavo.”—1 Timoci 6:6-10.
3. Kua ni vakaliuca na ka ni veivakalasai kei na ka o taleitaka.—2 Timoci 3:1, 4.
4. Dau lomasoli, qai cakava na ka era marau kina na tani.—Cakacaka 20:35.
5. Dau vakavinavinakataka na veika vivinaka o sotava.—Kolosa 3:15.
6. Dau veivosoti.—Maciu 6:14.
7. Digi ira vinaka na nomu ilala.—Vosa Vakaibalebale 13:20.
8. Qarauna vinaka na nomu bula, qai muduka na itovo dukadukali.—2 Korinica 7:1.
9. Mo “reki e nai nuinui” e volai tu ena iVolatabu.—Roma 12:12.
[iYaloyalo ena tabana e 9]
E veivakacegui dina na inuinui e volai koto ena iVolatabu me baleta na bula ena dua na vuravura vou