Na Rai ni iVolatabu

A Mate Dina Beka o Jisu ena Kauveilatai?

NA KAUVEILATAI e dua na ivakatakarakara vakalotu e kilai levu vei keda na kawatamata. Era rokova e vica vata na milioni, era nanuma ni oqo na iyaya tabu a mate kina o Jisu. O Adolphe-Napoleon Didron, e dua na dauvolaivola ni lotu Katolika, e daunivakekeli tale ga e kaya: “E via tautauvata na kena sokaloutaki na kauveilatai kei na nona sokaloutaki na Karisito; e via tautauvata tale ga na kena rokovi na kauveilatai kei na nona rokovi na Kalou.”

So era kaya ni kauveilatai e vakavolekati ira vua na Kalou ena gauna era masu kina. So tale era vakayagataka me itaube se dua tale na iukuuku, nira nanuma ena taqomaki ira mai na veika ca. Ia, e dodonu beka vei ira na lotu Vakarisito mera rokova na kauveilatai? A mate dina beka o Jisu ena kauveilatai? Na cava e kaya na iVolatabu me baleta na tikina oqo?

Na Cava e Vakatakarakarataka na Kauveilatai?

Ni se bera sara na gauna vakarisito, era a vakayagataka na kai Papiloni makawa na kauveilatai ena nodra sokaloutaki Tamusi, na kalou ni vakatubukawa. Na kena vakayagataki na kauveilatai e tete sara i Ijipita, Idia, Siria, kei Jaina. Ni oti tale e vica na senitiuri, era vakadukadukalitaka na Isireli na nodra sokalou vei Jiova ena nodra qarava na kalou lasu o Tamusi. E dusia na iVolatabu ni “ka vakasisila” na ivakarau ni sokalou vaka oqo.​—Isikeli 8:13, 14.

E vakayagataki ena Kosipeli i Maciu, Marika, Luke, kei Joni na vosa vakirisi na stau·rosʹ me dusia na ka a vakamatei kina o Jisu. (Maciu 27:40; Marika 15:30; Luke 23:26) Na vosa na stau·rosʹ e kena ibalebale e dua na tolonikau se duru kau. A vola o J. D. Parsons ena ivola The Non-Christian Cross ni vosa vakirisi e vakayagataki ena Veiyalayalati Vou me baleta na kau (stauros) e mate kina o Jisu, e sega vakadua ni vakaibalebaletaka e rua na tolonikau erau veilatai, e dusia tiko ga e dua na tolonikau.

Me vaka e volai ena Cakacaka 5:30 e vakayagataka na yapositolo o Pita na vosa na xyʹlon ni tukuna tiko na “kau” a vakamatei kina o Jisu. Na vosa na xyʹlon e balebale vata kei na stau·rosʹ, e dusia tiko ga e dua na tiki ni kauvaro se vunikau, sega ni rua na kau erau veilatai. Ni sa oti e 300 na yabaki na mate i Jisu, sa ra qai tokona e so era kaya nira lotu Vakarisito na vakasama ni a vakamatei o Jisu ena kauveilatai. Ia, na rai oqo e yavutaki ena ivakavuvuli vakatamata kei na kena vakaibalebaletaki cala na vosa vakirisi na stau·rosʹ. E vakavure vakasama ni so na droini makawa ni nodra veivakamatei na kai Roma e laurai kina na tolonikau se na vunikau.

‘Ni Taqomaki Kemuni Mai na Veimatakau’

E dua na tikina bibi meda vakasamataka na lotu Vakarisito dina: E dodonu beka me rokovi na iyaya a taurivaki me vakamatei kina o Jisu? Ke a vakayagataki na kaunirarawa, na kauveilatai, na gasau ni dakaititi, na moto, se na isele, e dodonu beka me vakayagataki na iyaya oqo ena sokalou?

Kaya mada ke vakamatei vakaloloma e dua na wekamu voleka, sa qai soli ina mataveilewai na iyaragi a vakamatei kina. O na tovolea beka mo taura na iyaragi oya, mo tabaka na kena itaba, oti oya mo qai cakava e levu na ilavelave ni itaba oqori mo veisoliyaka? O na bulia beka na kena ivakatakarakara, so era ka lalai so tale era ka lelevu? Oti oya o qai cakava e so mera itaube se sau? Se o na bulia na kena ivakatakarakara mo qai volitaka vei ira nomu itokani kei ira na wekamu, na kena inaki mera rokova? Sega ni vakabekataki ni o na sevaka sara ga na vakasama vaka oqo! Ia, oqo sara ga na ka sa caka tu ina kauveilatai!

Kena ikuri, na vakayagataki ni kauveilatai ena sokalou e sega ni duidui mai na qaravi matakau​—e dua na ivalavala e vakacala sara ga na iVolatabu. (Lako Yani 20:2-5; Vakarua 4:25, 26) E vakamatatataka na yapositolo o Joni na ivakavuvuli dina vakarisito ena nona uqeti ira na tacina lotu Vakarisito mera ‘taqomaki ira mai na veimatakau.’ (1 Joni 5:21) Era muria na ivakaro oqo dina ga nira na vakamatei ena nodra raraniqito na kai Roma.

Ia, era taura vakabibi na lotu Vakarisito ena imatai ni senitiuri na nona mate vakaisoro o Karisito. E vaka tale ga kina nikua vei ira na lotu Vakarisito dina, era sega ni sokaloutaka na iyaya a vakayagataki me vakararawataki qai vakamatei kina o Jisu, ia era vakananuma ga na nona mate, ra vakabauta ni sala oqo e vakabulai ira kina na tamata ivalavala ca na Kalou. (Maciu 20:28) Na ivakaraitaki uasivi oqo ni loloma ni Kalou ena kauta mai e levu na veivakalougatataki vei ira kece era lomana na ka dina, okati kina na inuinui ni bula tawamudu.​—Joni 17:3; Vakatakila 21:3, 4.

[iYaloyalo ena tabana e 10]

E laurai ena so na droini makawa na kena vakayagataki na tolonikau ena nodra veivakamatei na kai Roma

[Credit Line]

Rare Books Division, The New York Public Library, Astor, Lenox and Tilden Foundations