Me Dau Bobo Beka na Gonedramidrami?

DAUVOLAVOLA NI YADRA! MAI SIPENI

O ANITA, e dua na tina mai Nigeria e dau boboka vakamalua na luvena ena gauna e vakasilima oti kina. Na gauna vaka oqo e marautaki dina vei rau na veitinani. “Oqo e ivalavala vakavanua vei ira na tina e Nigeria ena nodra dau qaravi ira na luvedra dramidrami,” e vakamacalataka o Anita. “O tinaqu sara mada ga e dau boboki au kei rau na ganequ. Na bobo e sala vinaka me vakaukauataka qai vakaceguya na yago ni gone. E dau taleitaka na luvequ na noqu dau boboki koya, e dau yavavala qai dredre baleta niu dau lagasere, au qai vosa tale ga vua. Totoka dina na ka e sotavi oqori!”

Levu na vanua e sega ni ka vou kina na nodra dau bobo na gonedramidrami, na ivalavala oqo e sa ivakarau tale ga ena so na vanua mai valagi. Me vaka e kaya e dua na isoqosoqo na Spanish Association for Infant Massage, ni veibobo e dua na sala malumu, totoka, qai vinaka e rawa kina vua na itubutubu me veivosaki kei luvena qai vakaraitaka tale ga na nona lomani koya. E okati kina na kena dau droloki vakamalua na yava ni gone, na dakuna, mabuna, ketena, ligana, vaka kina na matana.

Na cava ena vakila na gonedramidrami mai na bobo? Ena vakila na loloma kei na veikauaitaki. Na gone se qai sucu e sega wale ga ni gadreva me vakani, ia e gadreva tale ga na nona veikauaitaki na itubutubu. Me vaka ni tekivu taudonu ena bula ni tamata na kena vakilai na ka, na nona dau boboka vakamalua na gonedramidrami o tina se o tama e sa vakila tiko kina o gone na loloma. Levu sara na itukutuku—vakayago vaka kina na kena e vauca na vakasama—e vakasavui vua na gonedramidrami ena gauna vaka oqori. Na bobo e rawa ni vukea me qaqaco na nodrau loloma na itubutubu vei luvedrau ena gauna sara se qai sucu mai kina.

Me ikuri ni kena vakaraitaki na loloma, na bobo ena rawa ni vulica kina na gone me wele, moce lutu qai sega ni tagitagi. Ena vakaukauataka tale ga nona masela, vinaka na drodro ni nona dra, vinaka nona kana, qai tau vinaka nona icegu. So era kaya ni yaga tale ga ina itataqomaki ni yagona na gone. Ni sa tekivu me vakila na gone na ka e tara, raica, kei na ka e rogoca, na bobo e rairai yavalata tale ga na vakasama vaka kina na vulici ni ka.

E so na valenibula era sa vakadikeva tale ga na yaga ni bobo vei ira na gonedramidrami. Kena ivakaraitaki, e dua na vakadidike e kaya ni o ira na gone sucudole era dau bobo e sega ni dau dede sara nodra curu tu e valenibula ni vakatauvatani kei ira era sega ni dau bobo. E tubu ena 47 na pasede na kedra bibi na gone era dau bobo ni vakatauvatani kei ira na sega ni bobo.

Macala gona ni sega ni uabula wale ga e yaga vei ira na bobo! Io, vei ira na gonedramidrami, na bobo e sega wale ga ni vakaukauataka nodra masela ia e levu tale na ka e vauci kina. Era vakila na ivakaraitaki ni loloma ena malumu ni liga e boboki ira, lako vata kei na matadredredre.