Veisautaka na Vakawati na Vakaluveni

E rawa ni rau marautaka na veiwatini na sucu ni luvedrau, e rawa tale ga ni vakavu lomaleqa. Ni drau se itubutubu vou, drau na rairai kurabuitaka na levu ni gauna kei na sasaga e taura mo drau qaravi luvemudrau kina. E rawa ni vakaleqa nomudrau veimaliwai na lailai ni moce kei na veiveisau drau cakava ena itavi vakaitubutubu. Drau na cakava vakaveiwatini na veiveisau mo drau rawa ni qarava na luvemudrau, me taqomaki tale ga kina nomudrau vakawati. Ena vukei kemudrau vakacava na ivakasala vakaivolatabu ena ituvaki qori?

1 KILA NA SALA E VEISAUTAKA KINA NA BULA NA VAKALUVENI

NA KA E TUKUNA NA IVOLATABU: “Na loloma e vosovoso qai yalovinaka.” Na loloma tale ga e “sega ni kauaitaka ga na ka e baleti koya, e sega ni cudrucudru.” (1 Korinica 13:4, 5) Ni o sa dua na tina, o sa na kauaitaki luvemu vakalevu. Ia ena rairai nanuma o watimu ni o sega ni kauaitaki koya, mo nanuma tiko ni vinakata tale ga mo vakayagataka nomu gauna vua. Ni o vosovoso qai yalovinaka, o sa vakaraitaka tiko vei watimu ni o lomani koya, o vinakata tale ga nona veivuke ena nona susugi o luvemudrau.

“Kemuni . . . na tagane vakawati, moni kilai ira vinaka tiko ga na watimuni ena nomuni bula vata.” (1 Pita 3:7) Nanuma tiko, ena vakayagataka o watimu e levu na nona gauna kei na nona kaukaua vei luvemudrau. Ena vou vua na itavi vakatina, ena rairai wawale se lomaocaoca sara ga kina. Ena so na gauna ena rairai cudruvi iko, ia tauri iko vakamalua, ni “vinaka o koya e berabera ni cudru, e ca na tamata qaqa.” (Vosa Vakaibalebale 16:32) Mo vakaraitaka na yalomatua ena nomu tokoni watimu ni vinakata sara tu ga qori.—Vosa Vakaibalebale 14:29.

NA KA O RAWA NI CAKAVA:

• Kemuni na tama: Vukei watimu ena nona qaravi o gone ena veigauna kece, ke mani bogi mada ga. Vakalailaitaka na gauna o vakayagataka ena so tale na cakacaka, me levu na gauna mo vakayagataka vei watimu kei luvemu

• Kemuni na tina: Ni via vukei iko o watimu ena nona qaravi o gone, ciqoma na nona veivuke. Ke sega ni qarava vinaka sara na itavi, kua ni vakalewai koya, vakaraitaka ga vakayalovinaka vua na kena icakacaka

2 VAQAQACOTAKA NA NOMUDRAU VEIMALIWAI

NA KA E TUKUNA NA IVOLATABU: “Erau na lewe dua ga.” (Vakatekivu 2:24) Nanuma tiko, o iko kei watimu drau se “lewe dua,” veitalia ke drau sa vakaluveni. Saga ena nomu vinaka kece mo vaqaqacotaka tiko ga na nomudrau vakawati.

Kemuni na yalewa vakawati, ni vakavinavinakataka na veivuke kei na veitokoni i watimuni. E rawa ni “veivakabulai” se vaqaqacotaka nomudrau vakawati na nomu dau vakavinavinaka. (Vosa Vakaibalebale 12:18) Kemuni na tagane vakawati, tukuna vei watimuni ni oni lomani koya vakalevu, oni vakamareqeti koya tale ga. Vakacaucautaki koya ena ivakarau ni nona qarava na vuvale.—Vosa Vakaibalebale 31:10, 28.

“Me kua ni dua e qara na ka e yaga ga vua, me qara tale ga na ka e yaga vei ira tale eso.” (1 Korinica 10:24) Mo dau cakava na ka ena vinaka vei watimu. Me tiko na gauna mo drau dau veivosaki kina, veivakacaucautaki, kei na nomudrau veirogoci. Drau dau yalorawarawa ena veika e vauca na veiyacovi. Kauaitaka na ka e gadreva o watimu. E tukuna na iVolatabu: “Kua ni bureitaki iko vei watimu, vakavo ga ke drau lomavata kina.” (1 Korinica 7:3-5) Mo drau veivosakitaka vakadodonu na tikina qo. Ena vaqaqacotaka nomudrau bula vakawati na vosovoso kei na veikauaitaki.

NA KA O RAWA NI CAKAVA:

• Kua ni guilecava me tiko na gauna mo drau dau vakayagataka vata

• Cakava eso na ka lalai mo vakaraitaka kina vei watimu ni o lomani koya, me vaka nomu soli iloloma se volavola vua

3 NONA TUBERI O LUVEMU

NA KA E TUKUNA NA IVOLATABU: “O kila . . . na iVolatabu ni o se gone dramidrami, qo e vakavukui iko mo rawa kina ni vakabulai.” (2 Timoci 3:15) Lalawataka na ka o na cakava mo vakavulici luvemu kina. E vakasakiti na sala e rawa nira vuli kina na gone, ni se bera mada ga nira sucu. Nira se tiko ena kete i tinadra, e rawa nira kila na gone na domodrau na itubutubu, e rawa nira kila tale ga na ivakarau ni yalo erau vakaraitaka. Mo wilivola gona vua ni se gonedramidrami. De dua ena sega ni kila na ka o wilika tiko, ia ena vukei koya me taleitaka na wilivola ni sa qase.

E gauna vinaka tale ga qori mo tukuni Jiova kina vua. Me rogoca sara ga o koya ni o masu vei Jiova. (Vakarua 11:19) Ni drau qito, talanoataka vua na veika e bulia na Kalou. (Same 78:3, 4) Ni tubu tiko o luvemu, ena siqema ni o lomani Jiova, ena vulica tale ga me cakava qori.

NA KA O RAWA NI CAKAVA:

• Kerea sara ga vei Jiova na vuku mo vakavulici luvemu kina

• Tokaruataka vei luvemu eso na vosa o vinakata me vulica ni se gonedramidrami